中環異次元空間！己連拿利天橋縱橫交錯平衡時空半山廢棄舊屋原來大有來頭

[sig_post_pv label=””] 個人瀏覽過

己連拿利聽落係一個唔順口嘅名稱，實際上來自英文Glenealy，可以連接去半山區，不過人跡罕至，獨特嘅建築設計，恍惚進入咗一個平衡時空，錯視感覺令此地可以稱得上係港島區秘景之一。而由中環登上扶手電梯，最頂端可以直上半山高尚住宅區，當中竟然有一座貌似已經廢棄嘅舊屋，從外面觀察，可以見到室內已空置，空無一人，但原來呢座大屋十年前曾被列為香港二級歷史建築？

己連拿利天橋緊貼行車天橋，沿小山路同樓梯即可抵達，天橋由時任立法局議員鄧蓮如於1979年主持啟用儀式，屬殖民地時代建築，所以以Glenealy曾被稱為鐵崗、義律谷、政府山，最終因英國軍人兼殖民地官員查理.義律去職而易名，命名為Glenealy嘅源由其實係來自己連拿利谷（Glenealy Ravine），縮短稱為己連拿利，而己連拿利谷指政府山以西至畢打山以東之間。

天橋位置基本係遊人絕跡嘅地方，只得極少數附近居民跑步、遛狗、拍拖散步經過，沿途由下而上觀察可睇到縱橫交錯嘅行車天橋、行人天橋等道路交織嘅畫面，交通燈不斷轉變、車輛於迂迴曲折道路左穿加插，畫面煞是驚喜。而沿途亦有一個超詭異嘅流水洞穴，驟眼睇有幾分陰森恐怖，增添探險感。

再向上而走，經旋轉樓梯轉入行人天橋，會發覺環境愈來愈似自己走入咗一個平衡時空，人車分隔，無人小路，配合昏黃光線，似足走入一個時光隧道，絕對係兩個人嘅中環半山區取景拍攝好去處。

沿路上山，可以直上至干德道配水庫遊樂場，沿路可返回中環扶手電梯，不過去遊樂場方向要行少量山路，疫情期間遊樂場關閉，附近人流更少，需要特別小心自身安全。

至於同樣位處半山干德道嘅廢棄大屋，海拔高500尺，被高地包圍，其實係雲石堂守衛室（Marble Hall），經李柯倫治建築師事務所（Leigh & Orange）以維多利亞時代印度薩拉森風格設計，於1901年建成，屬商人吉席．保羅．遮打爵士嘅私人大宅。而遮打爵士同遮打夫人分別於1926年、1935年離世後，將大宅、私人珍藏同雲石堂捐予同轉讓香港政府，曾演變成駐港英軍海軍總司令官邸，日佔時曾被日軍佔用，惜於1946年被大火焚燬，始後空置。直到1953年拆卸重建，改為政府宿舍用途，易名為遮打堂（Chater Hall）。

大宅採用歐洲進口雲石建造而成，來自意大利、希臘，而且經比利時打磨，被讚揚為香港最優秀建築物之一，據悉大宅內嘅樓梯亦甚豪華，不單有雲石樓梯，仲有以柚木、紅木、灰泥粉飾嘅磚塊舖砌，花園佔地兩畝，可遠眺維港，相當有氣派。但目前僅存只係得雲石堂守衛室，10年前曾被評為香港二級歷史建築。

至今可以望到嘅只係雲石堂守衞室外牆，一般市民亦無法進入，不過可以睇到部份舊煙囪、中式瓦頂、磚牆、欄杆，近睇可以見到古舊風格嘅木製百葉簾窗，內裏有一支支鐵枝作窗花，加上牆邊有唔少樹枝貼牆而生，充滿頹廢風格，絕對值得兩個人拍拖觀賞吓、亦可當作秘景之一。

而小編有一個疑問，大宅豪華又有氣派，捐予香港政府後，到底當時甚窮困嘅政府係點處置名貴雲石同各種豪華裝潢呢？

延伸閱讀﹕哥德式教堂藏半山區山頭一級歷史建築見證社會滄桑

延伸閱讀﹕中環小店台菜日食紅燒牛肉Crossover日式烏龍麵

延伸閱讀﹕大阪過江龍人氣拉麵店抵港全港獨有鯛魚湯

E.A.Tips﹕
（1）配合黃昏光線或天橋內準備入夜時亮起嘅小燈，柔和光線會比較有Feel。
（2）經己連拿利直上，經過香港動植物公園西邊入口、香港聖母無原罪主教座堂，繼續沿小山路向上而行，即可見到天橋位置。
（3）半山明珠台位置靠近干德道配水庫遊樂場，留意目前不准進入，喺外面影相好啦。
（4）由芝蘭台附近觀望或影相，會見到前往明珠台嘅指示牌。
（5）一方面可由中環扶手電梯沿路直上李園，再向樓梯向上而行，轉左直行到尾即達；另一方面可以經干德道配水庫遊樂場行落去，轉右直行到底即可見到一座古舊大屋。