[sp_html5video category=”2953″]
平時食三層架下午茶都係去酒店食，酒店英式下午茶雖然未必完美，但質素上大多有保證，今次試吓去普通餐廳睇吓質素如何。小編發現觀塘工業區有一間德國菜西餐廳最近喺IG宣傳一款命名為「夏午茶」嘅夏日特色下午茶，限時優惠由$298劈價到$198，睇落好抵食！每人叫一款甜品，每款甜品仲可以分別畫上個人最喜愛嘅卡通公仔，小編見到有得畫Hello Kitty，覺得好特別！
位處觀塘工業區中海日升中心商場樓上舖嘅February，原本係一間主打德國菜嘅西餐廳，今次推出一款精緻夏午茶，包含10幾款鹹點、甜品，粗略計算有18至19款，每款的骰小巧，件件唔同味道，Miss A同閨蜜兩個人食嗰時，每款都要開心Share。二人份量嘅夏午茶不足之處係唔包飲品，需要另加$18叫cappuccino、latte或mocha，或另加$38叫smoothies或mocktails，或者散叫其他飲品。
餐廳為一間德國菜酒吧，室內佈局浪漫，一盞又一盞土耳其式彩繪玻璃吊燈好精緻，充滿異國感，昏暗燈光適合小酌或慶祝活動，不時播放少少舊式音樂或外語情歌，加上電視播住nowtv，員工拎咗份蘋果日報返嚟，令餐廳幾有氣氛，情調滿滿，適合宵夜或談心。
今次夏午茶鹹點、甜品分別大概有9件，鹹點中有唔同種類包點，酥脆嘅牛角包、有微量朱古力內餡嘅酥皮麵包、內餡有奶黃香嘅酥皮麵包、麵包手指條、似前菜嘅清新三文治，再加上4款撻，有牛肉撻、雞肉撻、菜撻、鮮茄點綴而有香濃芝士味嘅軟心芝士撻。
而甜品就包括有配搭奇怪嘅Parma ham配檸檬蛋糕、微甜嘅檸檬味macaroon、香甜嘅焦糖味macaroon、杏仁蛋糕、好有咬口嘅蘿蔔蛋糕、兩件方形同圓形嘅朱古力蛋糕、紅莓忌廉蛋糕、甜度適中嘅覆盆子Donut。
只要另叫一款甜品，即可要求免費畫一款自選卡通公仔，非常適合慶祝拍拖紀念日或食生日飯，甜品可以揀特濃朱古力心太軟配雲呢嗱雪糕 $68、意大利檸檬撻 $68、法式焦糖燉蛋 $58或藍莓芝士蛋糕 $58，小編當日遇著無晒焦糖燉蛋，所以只能叫心太軟同檸檬撻。心太軟切開後流心朱古力馬上湧出，好有朱古力味，表皮輕脆，配搭暖笠笠嘅朱古力溶岩，入口外脆內軟。至於檸檬撻就略為遜色，雖然都有檸檬酸甜味，但檸檬味唔夠重。不過，最大特色係畫得好似嘅卡通公仔，畫功了得，繪圖寫字的確相當特別，但係大概因為版權問題，公仔部份位置同原型有少少出入，Hello Kitty蝴蝶結由左邊去咗右邊，小新塊臉由黃色變白色。
| e.a.tips （1）餐廳推出嘅夏午茶原價為$298，目前限時優惠為$198，另收加一服務費，只需喺官方IG留言「只限堂食」即可享用優惠。* （2）夏午茶為二人份量，供應時間為14:00 – 17:30，僅限堂食享用。 （3）疫情期間有限聚令，記得先打電話查詢有無位，先訂枱會比較穩陣。 （4）甜品畫卡通公仔方面，最好預先講低畫咩公仔，到埗後再講甜品上寫咩字。 *最新優惠詳情請參考該店官方IG |
延伸閱讀﹕小資女三層架下午茶 觀塘全新粉紅系Cafe歎櫻花茶兼打卡
February
| 地址﹕ | 觀塘駿業街56號中海日升中心2樓A號舖 |
| 營業時間﹕ | 星期一至四 11:30 – 00:00、星期五至六 11:30 – 02:00、星期日17:30 – 01:00、公眾假期17:30 – 00:00、公眾假期前夕 11:30 – 00:00 |
| 電話﹕ | 2237 1119 |
在〈觀塘工業區歎$198夏午茶 叫甜品免費幫你畫最愛卡通公仔〉中有 2 則留言
留言功能已關閉。