小資女三層架下午茶觀塘全新粉紅系Cafe歎櫻花茶兼打卡

[sp_html5video category=”3256″]

現時，愈來愈多香港女仔都學貴婦一樣去酒店歎High Tea，但一個酒店嘅英式三層架下午茶往往$200至$300起跳，只能間中食吓，做一個拜金女先可以經常歎酒店下午茶，如果你自己做唔起拜金女，但又唔想委屈做便利貼女孩，只能做一個小資女孩，想多啲食吓下午茶享受生活，可以挑選啲價錢比較相宜嘅英式下午茶。最近觀塘工業區有一間滿滿少女感嘅全新Cafe，開業僅一個月，目前仍然試業中，有一個價錢親民嘅英式下午茶，仲有限定花茶，而且係一間同路人嘅店，一於同閨蜜去打卡啦！

呢間全新嘅少女Cafe室內環境幾Relax，有偌大窗戶採光，以粉紅色為主調，粉紅系咖啡店往往都受歡迎，甫踏入門口已經見到一個特長韆鞦架，店員稱係一個幾受歡迎嘅打卡位。室內梳化、座椅、霓虹燈都以粉紅色設計，配合眾多同樣以粉紅色為主嘅道具裝飾，各位粉紅迷絕對可以瘋狂打卡。

每Set三層架下午茶都有花茶一壺，可以揀玫瑰花茶、苿莉花茶或桂圓紅棗杞子茶，甚至期間限定嘅日式櫻花茶，略嫌兩個人只得一壺，需兩份飲。店員提醒櫻花茶會比上述三款花茶淡，不過問一問店員得知全部花茶都係用茶葉，而唔係茶包，茶味方面應該比較有保證，所以日式櫻花茶可以一試。第一泡櫻花茶色澤甚深，焗一焗茶味會較香，味道清新，茶味唔算淡，唔會有俗氣感覺，亦係解渴嘅茶品；櫻花茶嘅第二泡顏色唔會一下子變得極淺色至無色，只係由深茶色變成淺茶色，顏色似鐵觀音或香片，大概使用茶葉都係比較有誠意。

Cafe推出嘅英式三層下午茶有6款鹹點同4款甜品，數量唔算多，但全部二人份量亦合理，唯獨欠缺英式下午茶最重要嘅鬆餅。以牛角酥同朱古力酥取替鬆餅，兩舊都有層次，入口酥脆，啖啖酥香感，麵包軟熟；脆炸蝦卷無咩蝦味，味道稍淡，對比牛角酥無咁香脆；而吞拿魚蛋沙律多士、煙三文魚沙律菜法包亦份量充足，吞拿魚混入蛋沙律內，兩者都並非只得少少餡料同細細塊煙三文魚；香草蕃茄冷扁麵係少數略有飽肚嘅款式，略嫌唔夠蕃茄味，入口比較淡。

至於甜品就有經常都有嘅一口Macaron，一啖就食晒，味道有兩款，杏仁同抹茶味，相比平時嘅Raspberry口味，甜度無咁重；日本泡芙為朱古力口味，比平時忌廉口味係比較特別；另有特色Mousse Cake兩件，每位都有唔同款式，記者試嘅係莓果口味同咖啡口味，前者以粉紅色豬仔設計，後者以大大粒栗子設計，形狀非常特別，而甜度適中，唔會過於甜膩。食完甜品，仲有一小碟生果拼盤，內有士多啤梨粒同藍莓粒，可以Refresh一下。

E.A.Tips﹕
（1）三層架下午茶供應時間為15:00至17:30，兩個人$288，不過一壺花茶需要兩份飲，可Refill一次。
（2）上IG打卡Tag返餐廳，有95折優惠，人均約$136。
（3）新張期間，會免收加一服務費。
（4）室內座位唔多，記得先從Whatsapp號碼或IG Book位，確保有座位。
（5）有朋友生日或慶祝拍拖紀念日可預先講聲，據悉生日可提字等。

延伸閱讀﹕觀塘東廣場3間素食店到底邊間最抵食？

延伸閱讀﹕小資收藏觀塘零打卡位法餐穿越普羅旺斯歎足2小時