長洲高空觀景文青遊登小長城睇怪石抖抖氣

平時去長洲，一般人都只會行東灣、張保仔洞，又或喺市中心飲飲食食、影吓壁畫打卡，其實長洲仲有好多地方值得發掘吓，比如上山。長洲都有山行？唔好以為行山要好長時間同好辛苦，長洲不單可以輕鬆登山，仲可以兩個人上去睇小長城同睇新奇怪石，絕對可以加入拍拖文青遊嘅行程。

由中環去長洲，乘搭渡輪只係35至60分鐘船程，視乎快船定慢船，到達長洲可以搵地方飲飲食食、行吓沙灘之餘，仲可以上山行吓。武漢肺炎期間，大家被困良久，間中想搵地方抖吓氣，又怕人流聚集，不妨行吓長洲小長城啦！唔好以為中國先有萬里長城，香港長洲一樣有一條小長城，容易到達之餘亦非常安全。

小長城位置近長洲東面，只要沿海岸線行走，經過東灣海灘、觀音灣沙灘，就可以見到小路上山，沿路會經過觀音古廟，繼續行好快就到，東面位置人流較少，自己出汗量亦少，絕對係抖抖氣嘅好地方。小長城其實處於一條遠足家樂徑，名副其實係迷你版長城，山徑小路旁邊滿滿獨特設計嘅麻石柱圍欄，麻石扶手似足長城，沿水月宮、明暉路連綿不絕，有迂迴感，行到涼亭回望時，真係有幾分似長城。

小長城附近仲可以去到芝麻坑觀景台，算係長洲高點，清山綠水，海天一色，令人心曠神怡，回望東灣海灘、觀音灣，景色怡人，同時可眺望喜靈洲、南丫島，景觀遼闊，絕對係賞景同休息嘅好地方。

從觀景台嘅涼亭繼續行，可以飽覽怪石群，沿路會見到一個又一奇形怪狀嘅石頭，每塊都栩栩如生，從介紹中可見各個奇石景，包括最近嘅花瓶石、叮噹石、人頭石、玉璽石，遠啲仲有金鷹石、大象石、骷髏石、殭屍石、烏龜石、駱駝石、火炬石，太空人石、坦克車石、五行石、鰻魚石等，加埋被稱為十六肖石頭，大部份都係呈蜂窩狀嘅風化石頭，大多位處山崖邊，背景為藍海景色，部份怪石有幼細窄縫可以穿過，不過就有一定危險度。不過要搵齊16個就有啲困難，而且需要發揮個人想像力先可以睇得明，亦需要比較長時間，但就會係一個非常有趣嘅文藝清新遊。

E.A.Tips﹕
（1）由東灣行上小長城，頭段大多係樹林，腳程大概係30至40分鐘。
（2）雖然大部份路段有樹蔭，但夏天太陽猛烈，上山蚊亦比較多，最好預先噴定蚊怕水、搽定太陽油。
（3）沿路一直為水泥路，簡單易行，不過行到奇石路段時，部份稍為陡峭，而且靠近海邊，要小心安全。
（4）建議分段參觀奇石，因為奇石路段唔少，一次過行比較花時間。
（5）謹記要小心山火，唔好吸煙留低火種，仲有唔好亂拋垃圾同失禮香港人。
（6）疫情期間，靠近路段嘅所有沙灘洗手間都被關閉，所以要去洗手間最好喺碼頭附近去咗先。

延伸閱讀﹕長洲小店到此一遊到底係台式定港式？

延伸閱讀﹕長洲避人流！樹下藏韆鞦離島人先知道嘅秘密沙灘

延伸閱讀﹕下一站長洲！長洲角酪網紅人氣店鐵路牆打卡唔使怕封站

延伸閱讀﹕賣飾物嘅木系文青咖啡店長洲島中坊研歎小清新Brunch