長洲小店到此一遊

長洲小店到此一遊 到底係台式定港式?



周末兩個人入長洲飲飲食食、去沙灘附近散步,係情侶其中一個幾好嘅拍拖活動,入長洲當然都唔好忘記要繼續支持黃店啦!靠近市中心嘅小店到此一遊係其中一間長洲良心店,網絡睇到小店被稱為台灣菜,但睇菜式就似港式大雜燴,到底餐廳售賣台式定港式美食呢?

小店大部份款式嘅價錢都係維持人均$45左右,唔會太吊高嚟賣,價錢方面幾親民。餐廳由早開到晚,如果一早入長洲可以去呢間小店食過早餐,因為長洲早餐店唔多。小店喺網絡介紹係主打台灣菜,但從餐牌選擇中所見,中式、西式、日式、越式、泰式、馬拉式、甚至港式都有,偏偏無台灣菜,食物似乎係港式大雜燴,即係乜都有。

平時沙茶係配牛肉,而子薑係配豬肉,小店竟然炮製沙茶豬扒撈粗子薑牛肉撈粗,完全係Crossover,的確幾新奇,即管試吓。粗麵底味道雖同平時茶記差唔多,但份量幾多,豬扒略有香味,但偏乾身,肉質幾硬,沙茶醬似乎唔太配合豬扒,完全唔入味,而子薑配牛肉就好少少,牛肉無咁硬,切得幾厚,相對豬扒比較容易入口,

基本會有果汁茶送,+$3可以加大,試吓芒果綠茶士多啤梨紅茶,大杯裝嘅大概多三份一左右份量,綠茶入口奇怪,紅茶比較順口少少,不過果汁入口偏甜,上面有一層厚泡沫,飲到一半會慢慢散。

優點係平同菜式多元化,味道基本同一般茶記差唔多,室內同餐牌有唔少動漫卡通,愛好動漫嘅朋友可以去逛吓。

E.A.Tips﹕

(1)周末假日最好避開食飯時間,否則要排隊。

(2)室內外都有座位,外面座位就可以帶同寵物一齊食。

(3)大多室內座位都係卡位,而座位全部2人一枱,比較狹窄。

延伸閱讀﹕長洲高空觀景文青遊 登小長城睇怪石抖抖氣

延伸閱讀﹕長洲避人流!樹下藏韆鞦 離島人先知道嘅秘密沙灘

延伸閱讀﹕下一站長洲!長洲角酪網紅人氣店 鐵路牆打卡唔使怕封站

延伸閱讀﹕賣飾物嘅木系文青咖啡店 長洲島中坊研歎小清新Brunch

到此一遊

長洲新街市里6號地舖
08:00 – 18:00
2986 8126

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!