「東方威尼斯」水鄉小島賞無遮擋醉人日落 大澳珍珠形寶珠潭藏海星紅蟹仔 迆遊虎山浪漫紅木橋打卡

「東方威尼斯」水鄉小島賞無遮擋醉人日落 大澳珍珠形寶珠潭藏海星紅蟹仔 迆遊虎山浪漫紅木橋打卡

[sig_post_pv label=””] 個人瀏覽過



大澳有咩景點?最多人識嘅係虎山觀景台,但其實地圖上另一邊亦有一個大澳觀景台,沿路會經過超有特色嘅寶珠潭,相比虎山,人流稀少,不單充滿原始大澳水鄉嘅小島風情,而且湖光山色,秀麗風景亦好吸睛,絕對係一個「東方威尼斯」!

由大澳巴士總站落車,進入大澳市區,經永安街橫過藍色嘅大澳涌行人橋,見大澳街市轉右會見到二級歷史建築嘅大澳關帝古廟,沿吉慶後街前行,經過香港離島婦女聯會時,會發現右方有一條紅色木橋,被稱為新基大橋,橋中心可觀賞大澳棚屋風景。相比永安街旁嘅藍色大橋,紅色大橋人流較少,古老棚屋夠迷人,環境清靜而舒服。

繼續沿吉慶後街向入行,直到見到大嶼山寶珠潭公廁、燒烤場,轉右即達寶珠潭,對面會同時見到屬法定古蹟嘅大澳楊侯古廟、大王公廟。靜謐小徑會見到旁邊村莊村民曬菜乾、鹹魚,原始風味甚濃,不遠處就會到達狀似珍珠嘅寶珠潭,有傳獅山、象山、虎山、鳳山包圍爭奪寶珠潭,四靈爭珠影響居民同風水,所以旁邊建有楊侯古廟,廟宇好有古樸感。寶珠潭旁邊佈滿棚屋,小艇隨意停泊,風光如畫,但非常寧靜,河面亦平靜,有人落水時,可見近岸邊水深僅及膝,不時可見小魚跳躍、小蟹爬動,甚至會出現超靚海星!

再經吉慶後街右邊小路走,行到盡頭會見到一個人跡罕至嘅大澳觀景台,盡頭既可近距離觀望港豬先行嘅港珠澳大橋同南中國海,亦可遠眺人工島,觀景亭可望無盡大海,旁邊有免費望遠鏡,直視可清晰望到港珠澳大橋嘅人工島。大橋上車輛極少,頂頭飛機經過比橋上車輛更多,若無大橋同人工島阻擋視線,海灣風景會更遼闊而優美。由觀景台折返路段,轉右行到盡頭可見渠務處標示牌,靠近黃昏時間,兩個人可以喺了無人煙之處觀賞日落,最啱拍拖情侶談吓心。

不過,要數大澳網紅點,一定係虎山觀景台!虎山係大澳最高點,路段清爽易行,毋須流汗,既有涼亭,亦有超長浪漫紅木橋,似足小型長城,最啱拍拖情侶行逛。從虎山可眺望港珠澳大橋、南中國海、珠三角海灣、大嶼山山脈,亦可180度觀賞超美日落,鹹蛋黃般嘅夕陽景色美不勝收。

虎山山頂海拔有75米,位處大嶼山西面,一道海豚徑依山而建。由大澳街市沿海旁行,沿石仔埗街行約5分鐘,穿梭大澳水鄉棚屋、大澳郵政局,甚至會見到村民曬嘅鹹魚、鹹蛋黃、蝦膏等,直行見指示牌往右行,會見到一個小廣場,直望左邊係香港少林武術文化中心,右邊係大澳洪聖古廟。

只需沿香港少林武術文化中心左邊小山徑上山,路段全為碎石磚,簡單易行,即使兩個人無行山Look都可以輕鬆步行上山,全條紅木橋可以幾分鐘行完,小編當日甚至聽到有高跟鞋聲音!小路段會經過唔少菠蘿樹同木瓜樹,但中途會有少量墓穴,小徑有大量樹蔭,沿山徑可輕易步上虎山觀景台,但就唔係虎山山徑。到達虎山觀景台路段,初段會見到四條中華白海豚模型雕塑,算係一個地標。

基本上,虎山係非常安全嘅小山丘,兩旁都係紅木色欄杆,顏色鮮艷奪目,好搶眼!行到盡頭回望,會發現呢道紅木橋驟眼睇有幾分似小型長城,非常壯麗,難怪成為網紅們打卡熱點。盡頭涼亭處同大澳觀景台一樣有一座免費望遠鏡,可遠望港珠澳大橋。從虎山可望遼闊大海景觀之餘,晴空萬里下景觀更優美,令人心曠神怡。黃昏時間亦可睇超靚日落景,相比金黃色嘅日落光線,橙黃色嘅鹹蛋黃狀日落更吸睛,光線景射下虎山一帶更壯觀!


E.A.Tips﹕

(1)由大澳市集向吉慶後街行,大概見大澳街市後向右邊行,見到公廁轉右,由市集行過去約5至10分鐘可達寶珠潭。

(2)寶珠潭位置喺楊侯古廟旁,左邊小路可以直達大澳觀景台。

(3)大澳觀景台路段有山路可以直接通往虎山觀景台,不過若裝備不足就唔建議行啦,最好行返出大澳街市,沿石屎路段上虎山啦!

(4)可乘抬大嶼山巴士1號/11號/21號,分別來往大澳至梅窩、東涌市中心、昂坪,仲有渡輛可來往屯門、東涌。

(5)虎山路段非常易行,路段無補給位,補充完先行就得。

(6)虎山係一個網紅打卡點,人流可能會偏多,唔建議假日去。

(7)四條中華白海豚模型雕塑旁邊其實有一條小徑,可通往海岸邊,仲可睇埋綑邊將軍石,不過裝備不足就唔建議行啦。

(8)山上空間係公眾地方,並唔係閣下打卡專用,影相還影相,請尊重他人,唔好長時間霸晒成條路影相,讓路俾人行過,同時請勿喧嘩或大聲傾偈,仲有自己垃圾請自己帶走。

(9)行虎山可沿路折返,亦可沿山徑繼續行走,可以行返去大澳觀景台方向,不過路段為山路,唔建議無充足準備情況下行。


大澳觀景台

大澳吉慶後街112-136號

寶珠潭

大嶼山大澳吉慶後街

虎山觀景台

大嶼山大澳

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!