[sig_post_pv label=””] 個人瀏覽過
元朗隱藏一間又一間小店，今次呢間麻辣冷麵小食店位於小巷之內，由商場搬到巷弄當中，仍然堅持以「辣」會友，講到明係「爆辣」，你又敢唔敢挑戰呢？每份冷麵都有中學時期袋裝冷麵嘅懷舊感，拍拖情侶可以兩個人走入小巷內試一試呀！
原店位處元朗又一新城商場內，目前新店則轉到富盛大廈地下小巷當中，由商場冷氣間轉為街邊小店，雖然氣溫較高，但就更有舊時小食店感覺。店名非常點題，以招牌爆辣冷麵為主打，亦有懷舊袋裝冷麵，撈麵可配搭唔同配料，加上獨特辛辣冷麵汁，一直吸引唔少同區街坊前往挑戰，係受歡迎嘅掃街小食。而每款冷麵都可以自由挑選辛辣度，由蚊仔辣、小辣、中辣、大辣、爆辣、爆爆爆辣，6級辣度真係唔係人人敢試，最啱無辣不歡之人。
延伸閱讀﹕堪稱本土版KFC！ 屯門人氣炸雞髀店殺入大角嘴 即叫即炸皮脆肉嫩 8種調味6種辣度任你揀
爆辣賽螃蟹杯麵 $30 以杯麵為藍本，將平常茶飲店珍珠奶茶嘅杯改為盛載冷麵嘅器皿，最底層為冷麵，冷麵之上既有賽螃蟹，即蛋白、蟹柳，亦有蟹籽、粟米、西蘭花，增添層次感，配搭上確實有幾分似即食杯麵。冷麵份量大概有舊時幾蚊一包袋裝冷麵店嘅3至4包冷麵嘅份量，質感亦如同袋裝冷麵嘅質素，即係韌度一般，質素平平。以蚊仔辣為例，編輯奉勸大家唔好睇少最輕微嘅辣度，比譚仔3小辣更有辣味（雖然編輯好憎食譚仔，但呢個係幾好嘅例子）。
爆荽蟹籽冷麵 $40 份量更多，除咗有紫菜絲外，無論蟹籽定芫荽，都舖滿全份冷麵盒，完美覆蓋冷麵，每一啖都可以滿口芫荽，絕對係芫荽迷必點之選。而冷麵份量就比杯麵多，大概有4至5包袋裝冷麵，門口宣傳就指有足足100g冷麵，當正餐都得。當中嘅中辣級數比很得輝炸雞髀嘅魔鬼辣辣粉更重辣味，其冷麵汁包含多款辣椒，如指天椒、燈籠椒等，麻辣中帶辛香味，麻辣味好過癮，不過辛辣味唔算停留口腔好耐，隔一陣就已經散走。
E.A.Tips﹕
(1) 舊店位處元朗又新街37-51號又一新城1樓F066，而新店則轉到元朗西菁街9號富盛大廈地下89號舖，位於小巷當中。
(2) 小店只收Cash或Payme，唔收其他支付工具。
(3) 內有限量$10/個嘅3.6牛乳焦糖燉蛋，亦有售賣自制辣醬爆辣油生蒜$25/樽。
(4) 小巷位置靠近元朗千色匯。
爆辣冷麵
元朗西菁街9號富盛大廈地下89號舖 
11:00 – 00:00 
5541 4896、6381 2115 (WhatsApp)、2698 9997
