想去旅行又去唔到？去到邊都掛住日本，就唯有一個人或兩個人食吓日本嘢止癮先。呢間手卷駅顧名思義以手卷為主打，但亦有丼飯同便當選擇，沙田、旺角、大角嘴都有分店，沙田分店絕對係街坊店之一。
位處沙田禾輋邨嘅分店，不單有即叫即製手卷，主力做外賣，似足快餐店落單，價錢亦相宜，室內座位唔多，佈局簡單，只得兩至三張枱，兩個人拍拖去食都可以容納到。
便當選擇中，一份丼飯、冷麵或沙律，可再配搭3件壽司同小食，今次挑選咗炸蝦丼 $46，既有蟹棒反卷，再加自選嘅黃金魷魚、榮螺、生虎蝦，小食必揀嘅一定係厚燒玉子。炸蝦好香脆，蝦肉算爽口，加上沙律醬幾開胃，而黃金魷魚夠滑溜，榮螺有咬口，生虎蝦欠缺辣醬，蟹棒反卷同厚燒玉子反而有驚喜，玉子夠厚，燒得恰到好處，熱辣辣上枱，加上芝士好惹味，蛋香、芝士香好濃。
醋飯偏暖，魚生丼 $68 可自由配搭4款魚生，今次挑選咗蒲燒鰻魚、油甘魚、劍魚、三文魚，寫明每樣2片好均真。另外，加$38可以有一份馬糞海膽，加$18可以有一份日本三文魚籽。食材保存算唔錯，三文魚不過不失，算肥美，劍魚、油甘魚都好正常，有油脂感，鰻魚亦軟嫩，蒲燒醬汁多少少會更好。
醫肚後，可以行過隔離商場行埋Abouttai阿布泰超市，產品總類比普通分店多，有時間可以去掃貨。
E.A.Tips﹕
（1）學生11:30前Whatsapp落單可再減$2，優惠至每日18:00。
（2）便當加$3有紙包飲品，丼飯送紙包飲品，罐裝飲品加$2。
（3）出面既有巴士總站，附近亦可以泊吓車，交通算幾方便。
（4）若叫軍艦，一定要盡快食，否則紫菜好快會淋晒。
手卷駅
沙田德厚街3號禾輋邨厚和樓地下SU22號舖 
12:00 – 20:30 
9868 4872
ABOUTHAI 阿布泰國生活百貨 – 禾輋店
沙田德厚街廣場2樓210A號舖 09:00 – 22:00
在〈沙田街坊小店手卷駅 便當丼飯性價比高〉中有 1 則留言
留言功能已關閉。