【區區有小店】元朗4間海南雞飯外賣比拼邊間最正宗？邊間最平？

[sig_post_pv label=””] 個人瀏覽過

被稱為獨立區域嘅元朗國，區內有唔少特色美食，當中雞飯更加係鋪天蓋地，不過良心圈認可嘅雞飯基本上只有4間。既有泰式雞飯，亦有星馬雞飯，到底邊間最好？

（1）水門泰式海南雞飯專門店

靠近茶飲店清玉嘅水門泰式海南雞飯專門店，以黃色招牌為主，內裏亦絕對黃到金，無論招牌定立場都非常好認。當中，最平嘅係唔正宗去骨海南雞飯 $45，加多$10可以歎泰式去骨海南雞飯 $55，飯量係4間中最多，一盒內至少有兩大碗白飯，容易飽肚，兩個人都夠食。小店唔提供餐具之餘，亦只有呢間係採用紙盒包裝，唔用膠盒，比較環保，而等候時間亦係4間當中最短，落單轉頭好快就有得攞。不過，雞飯質素就可圈可點，感覺似足玩俄羅斯輪盤，記者被分到嘅只係雞翼，無雞髀，連雞胸都只得好少，說好的去骨呢？雞翼略有醃料香味，雞肉有骨之餘亦有啲嚡口。飯量雖然充足，但比較遜色，明顯無炒勻，無油香，並非油飯，只係白飯，可以夾起一糰糰飯，但有大量青瓜、配菜，都算係一分錢一分貨標準。至於醬料，兩個醬混合後，辣味唔重，酸甜中帶鹹味。價錢雖平，但欠缺傳統配搭雞飯嘅雞湯，食雞飯時有啲Dry。

水門泰式海南雞飯專門店

元朗青山公路元朗段34號任安樓地下C號舖

（2）肥仔海南雞

另一間同樣以賣海南雞為主嘅肥仔海南雞，位處鳳攸北街，主打係星馬雞飯，一份至尊無骨海南雞飯 $32，外賣加$1，有提供餐具，比水門泰式海南雞飯專門店更平，而且有例湯，價錢上係4間當中最平，拍拖去食一人一碗$70有找，絕對係平食之選，不過亦係份量最少嘅一間，僅限一人份量。而等候時間亦只係約15mins，算中規中矩，速度唔算慢。白飯略有雞油，仲添加咗甜豉油，亦有少量青瓜伴碟，外賣醬汁只有辣醬，無薑蓉，辣醬的確係辣味重，酸甜味較輕。雞肉份量相對極少，只得2、3舊，雞肉同飯量比例大概係1:4至1:5，大食者最好加$15叫多份雞，不過採用雞髀肉比較可取，啖啖肉無骨，4間中只得佢自動自覺俾雞髀肉，雞肉嫩滑無骨，有少少雞油，但雞肉味道稍淡。例湯係冬瓜湯，隔咗1hour仲有微溫，入口暖笠笠，冬瓜湯用杯裝，內有煲得熟透嘅冬瓜粒，有雞味，唔算油膩，係4間當中最有鮮甜味。

肥仔海南雞

元朗鳳攸北街5號順豐大廈地下31號舖

（3）南香雞飯

至於位處西菁街嘅南香雞飯，係另一間主打星馬菜嘅馬來西亞餐廳，海南雞飯係受歡迎菜式之一。一碟海南雞飯 $63，價錢上係4間當中最貴，可以配搭中式例湯或薏米水，外賣加$2，並無提供餐具。南香雞飯同肥仔海南雞一樣係星馬嘅海南雞飯，外賣拎上手比較重，驟眼睇係份量最多嘅一間。不過，南香雞飯嘅等候時間係4間當中最長，等咗4、5個字先有得攞。白飯飯量適中，只係無咩味，仲有啲中學午餐飯盒嘅膠味，不過明顯有炒勻，飯粒乾爽，而且粒粒分明。而南香雞飯嘅雞肉係4間當中最嫩滑，雞肉無骨，雞皮亦爽彈，色澤鮮明，呈金黃狀態，雞皮同雞肉中間有一層薄薄雞油，閃閃發光般，雞肉份量充足，同飯量係1:1，大多數雞肉都有水準，只有1、2舊唔太熟。而醬汁就係分開鹹辣醬，有濃黑豉油同艷紅嘅酸辣醬汁，前者濃稠兼鹹中帶甜，後者辣味比酸甜味重，比較惹味，雖然自行混合蘸汁，同泰式雞飯有分別。至於例湯就係中式湯，採用碗裝，湯內有紅蘿蔔、蜜棗，鮮甜味重，似家庭式湯水，入口暖笠笠。

南香雞飯

元朗西菁街10號地下6號舖

（4）水門雞飯

最後一間係位處教育路嘅水門雞飯，係泰國曼谷過江龍，嚟香港開分店，水準相對係4間當中比較穩定同最正宗，招牌水門雞飯 $50，價錢中規中矩，配有餐具。雞飯等候時間唔長，大概5mins就攞得，速度都好快。雞飯配上油飯，雞油滲透飯內，係4間當中最香口，配菜亦有少量青瓜，幾爽脆。主菜雞肉採用雞胸肉，無骨，雞肉嫩滑程度係半滑半嚡，有一半雞肉屬白滑嫩身，但有一半雞肉偏向嚡口，唔夠嫩滑，而雞肉色澤比較暗淡，雞油唔多，色澤唔夠金黃同嫩白。而醬汁混合上枱，入口偏辣，但非常惹味，同泰國曼谷店幾乎一樣，有一秒穿越曼谷感覺。至於例湯就係冬瓜湯，以碗盛載，湯內有冬瓜粒，胡椒味強烈，但記者依稀記得水門雞飯曼谷店嘅雞湯係無胡椒，不過水門雞飯香港店喺冬天食應該好暖胃，飲完暖笠笠。