靠近旺角！大角嘴典型打卡咖啡店食物遜色驚喜Bailey’s加咖啡/白朱配抹茶反高潮

大角嘴街坊搵食唔難，十足十舊城區內，單單咖啡店已經不下5間，其中離旺角最近嘅一間要數Easy Joe，門口仍堅持派發區報，不過兩個人去價錢比較貴，午市食物加飲品超過$400，對唔少經濟型拍拖情侶嚟講算係Over Budget。

以「Easy Joe」命名嘅咖啡店，取自「二世祖」諧音，據悉由3位年輕人集資打理，開業至今一直受到歡迎，被分類為多國菜餐廳，即乜都可能有。店內裝潢設計以灰調工業風為主，壁畫牆身為自行髹上，的確幾特別，而且環境闊落，座位舒適。

最簡單名比較平嘅飽肚菜式係意粉，當中明太子櫻花蝦配青瓜絲扁意粉$148 份量適中，麵條黏滿白汁，混有大量明太子、櫻花蝦碎，麵條滿滿濃稠醬汁，入口較膩，頂端舖上一大堆青瓜絲亦無補於事，只係略為減膩。

而片皮鴨醬鴨肉意大利飯$178 價錢較高，但醬汁幾特別，味道酸甜，Risotto同樣將米粒混合忌廉，形成濃稠質地，稍稍黏口，但比平常軟腍、濕潤，並非如正宗Risotto般偏硬，似乎係遷就港人口味。不過，原來所謂嘅鴨肉絲就係平常買餸$9至$11嘅煙鴨胸肉，Aeon嘅日式煙鴨胸肉就賣$15定$17，而且比較乾身，純粹單靠醬汁覆蓋，以$178一份嚟講，材料上係比較失望。

食物方面整體比較遜色，低成本製作，味道唔算太突出，但價錢較其他咖啡店高，感覺心思唔多但食水頗深。但一嚐店內飲品，就有反高潮嘅感覺，意外地有心思、有水準。

加入Bailey’s 嘅百利甜酒鮮奶咖啡$48 甚有新意，當以為加入酒會太搶味時，呷一口先發現酒精經熱力已經逐漸揮發，取而代之只係啖啖酒香，無咗酒精嘅苦澀味，混入鮮奶咖啡內又唔會太突兀，甚至乎為咖啡增添層次，尤如戀愛中苦中帶甜，甘苦與共。

被稱為「期間限定」飲品嘅特濃宇治抹茶白朱古力奶$48，聲稱採用明治4.3鮮奶配宇治抹茶，將苦中帶甜嘅白朱古力配搭抹茶粉，再加上鮮奶，味道唔會太甜或太苦，白朱古力味稍輕，抹茶味則比較搶，只係少量白朱古力加入一支凍Matcha Latte，個玻璃樽又幾靚。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 留意逢星期一休息，公眾假期除外。

❷ 星期二至四及日最後落單時間為21:00，星期五及六則為21:30。

❸ 朱古力、甜品及奶昔不設外賣。

❹ 晚市只接受電話預約、午市只有walk-in。

❺ 繁忙時間一般用餐時間限時90分鐘。

❻ 留意有落場時間，如15:30至18:00。

❼ 留意只收現金，無任何電子支付。