普慶餐廳

平食自助餐! 普慶餐廳半自助甜品Buffet $120任食10款Mövenpick雪糕



好少酒店自助餐係良心店,要搵一間可以食嘅都唔容易,今次推介逸東酒店旗下嘅普慶餐廳,無海景打卡位,無華麗裝潢,純粹係同路人,最近以低至$120嘅價錢推出下午茶甜品自助餐,加$68起重可以挑選頭盤同主菜,兩個人埋單都係$400,絕對係抵食之選!

Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】

今次Eaton HK普慶餐廳The Astor推出半自助式甜品下午茶自助餐,限時優惠$120可任食各款精緻甜品,當中有即叫即整嘅香脆窩夫或夾餅,可以自由配搭配料,窩夫本身得麵粉味,需要加上配料先有味。亦有10款口味Mövenpick雪糕、麵包布甸、迷你鬆餅、抹茶奶凍、朱古力蛋糕、芝士蛋糕、3款水果等,通通無限量供應,甜品永遠係第二個胃,甜品愛好者絕不能錯過,拍拖情侶不妨去Sweet返吓。

鬆餅、布甸、葡撻等比較有質素,反而奶凍、蛋糕等唔算特別,10款口味嘅Mövenpick雪糕包含覆盆子雪葩、熱情果芒果雪葩、焦糖、藍莓芝士蛋糕、意大利芝士蛋糕、冧酒提子、薄荷朱古力、瑞士朱古力、士多啤梨、呍呢嗱夢幻口味,2款雪葩雪糕綿軟又冰涼,2款芝士蛋糕味好濃郁,有興趣可以試足10款口味呢!

除咗去甜品專櫃攞自助甜品,每位upgrade吓加$68至$148,即可升級套餐揀埋一款頭盤同一款主菜,而且包一杯餐茶,價錢合理,最平只係$188,最啱想平食自助餐嘅朋友。

香煎北海道帶子溫室豆苗牛油果芥末蓉係其中一款頭盤,以豆苗點綴帶子,3粒帶子體積唔大,但幾香口同鮮甜,唔黐牙,表面淋上牛油果芥末蓉,本身醬汁有微微青味,帶酸,但配合香煎過嘅帶子,中和煎香後嘅油膩感,反而幾開胃。凍虎蝦、醃蘿蔔、紅椒汁係另一款頭盤,以為係一隻隻虎蝦,原來係一粒粒煮熟嘅虎蝦肉,以醃蘿蔔、紅椒汁點綴,帶酸甜味,幾醒胃。

香草烤羊架黑水欖羅勒薯泥係主菜之一,羊架嘅羊羶味唔重,容易入口,份量充足,有2件羊架,擺盤上顯得賣相不俗,底層有煮到薯蓉質感嘅薯仔粒,7成熟都仍然軟嫩,肉汁豐富,好有油脂香,不過略嫌肥膏多咗啲。烤焗豬柳、粟米蓉、脆薯蓉球係另一款主菜,豬柳剛剛熟,特別軟腍,烤焗後更香口惹味,而Menu上總共有5款頭盤同7款主菜可以選擇。

E.A.Tips﹕


(1)下午茶甜品自助餐僅於逢星期六、日及公眾假期15:00至17:00供應,供應日期由即日起至另行通知,每位最低$120,而每位加$68至$148,最平每位$188,可加一款頭盤同一款主菜,另收加一服務費。
(2)頭盤同主菜Menu可以預先喺網上睇到,網上Book位可按此
(3)通常Buffet一開波,全部人都會一湧而上,其實唔需要咁心急,因為甜品係會繼續有,大部份人只係食第一轉,第二轉基本上已經無咩人攞嘢食。
(4)普慶餐廳位置喺佐敦至油麻地之間,自助餐區喺地牢,行落樓梯到底層就會見到。
(5)最好預先打電話Book位確認,保證唔會白行一趟。
(6)自助餐只會於前5至10分鐘先俾入場,早到可以喺樓上Food Court坐吓先。


延伸閱讀﹕尖沙嘴海旁3+5下午茶 Amelia Hong Kong米芝蓮級數真係有特色?

延伸閱讀﹕落地玻璃望海景 實試尖沙嘴矜貴松露下午茶

延伸閱讀﹕油蔴地雙層咖啡店勁寫意 珍寶牛角包啖啖牛油香

延伸閱讀﹕尖東死場驚現文青咖啡店 藍莓味貝果勁煙韌

延伸閱讀﹕《暖男爸爸》取景地 古蹟地有來頭 實試ODEA法式庭園果香下午茶

普慶餐廳The Astor

佐敦彌敦道380號香港逸東酒店B1樓層
06:30 – 21:30
2710 1901

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!