慈雲山既屬小區，亦屬老區，區內人口逐漸老化，餐廳大多都以街坊口味為主導，少有配合年輕市民嘅小店，慈雲山毓華里就有一間以日式美食同串燒為主嘅小餐廳，吸引唔少90後、00後幫襯，套餐重有珍珠奶茶送，睇落性價比極高，但記者發現食物材料上有一個問題。
餐廳貌似一間家庭式餐廳，但翻查資料，係由2位90後年輕人創業，餐牌內主打嘅都係年輕市民鍾意食嘅日式小食，風味獨特，而且兩個人去食，價錢亦屬合理範圍。
咖哩吉列豬扒飯 $52 以大塊豬扒舖滿咖哩飯，豬扒厚切，炸成金黃色，炒粉唔厚，豬扒仍有肉汁，淋上開胃醬汁，令炸物更滋味。炸豬扒僅放白飯表面，入口依舊香脆，未有被咖哩汁浸軟，的確有心思。
一碗丼飯基本份量充足，亦好足料，比如原條滑蛋鰻魚飯 $68 就以大條鰻魚上枱，鰻魚幾肥美，質感軟嫩，醬汁鹹中帶甜，幾濃郁，底層有輕微蛋香味，撈飯一流。
部份即日套餐甚至送珍珠奶茶，但餐牌部份套餐+$5先有，奶茶偏甜，但珍珠都夠煙韌，而一杯珍珠奶茶同出面茶飲份量差唔多，夠晒飲。
睇咗成篇，睇埋相都未搵到有咩問題？而家開估啦！餐廳菜式味道上雖然有水準，但就忽略選材問題，竟然唔用珍珠米，改用絲苗米。珍珠米本來入口煙韌，配搭日式丼飯好適合，但廣東絲苗米形狀尖細，比較乾爽，入口偏硬，僅適合配搭炒飯或煲仔飯等廣東菜，缺乏珍珠米嘅飽滿同軟糯感，所以白飯選材上需要略為扣分。
延伸閱讀﹕無人山徑你夠唔夠膽行？ 山腳睇寮屋區遺址 慈雲山東南坡直通沙田坳道
E.A.Tips﹕
（1）平日午市以學生客為主，套餐大概$46至$52一餐。
（2）午市可朝早10:30前預先Whatsapp叫午市套餐，唔使等咁耐。
（3）據悉外賣自取有9折優惠，膠盒另加$1。
（4）foodpanda外賣較耐，可以揀lingduck或openrice或打電話送貨或自取，但要叫滿$80兼屬慈雲山範圍。
（5）拍拖去食最好避開食飯時間，以免人流過多，等候時間過長。
延伸閱讀﹕新蒲崗時光倒流價定食 香蔥豚肉卷肉汁豐腴大驚喜 仲有Yell Card抽！
延伸閱讀﹕真正平民食堂 加藤屋20蚊牛肉飯超抵食
蒲點
慈雲山毓華里28號萬寶大廈地下6號舖 
星期一至日 12:00 – 21:00；公眾假期、公眾假期前夕 12:00 – 21:00 
5313 0365
在〈慈雲山年輕人美食蒲點 大碗鰻丼有咩係美中不足？〉中有 3 則留言
留言功能已關閉。