日日食美食廣場part2

【區區有小店】將軍澳CP值最高美食廣場4間小店中西任你揀 斧頭炸髀似咖哩炒蟹? (下)

[sig_post_pv label=””] 個人瀏覽過

 

 

 

上回提到,將軍澳有一個叫「日日食美食廣場」嘅「全黃Food Court」,全場100%由良心小店組成,試過一次就知道有別於其他美食廣場,價錢平,有水準,同時係同路人,由各小店店主、以至負責清潔嘅工作人員,都好勤力做好自己崗位,絕對係拍拖兩個人醫吓肚首選Food Court!

延伸閱讀﹕實試將軍澳日日食3間小店 全港唯一全黃Food Court(上)

今次再到該美食廣場,試埋淨返4間,既有港式,亦有西式,相信總會有一間啱心水。

(1)Upper Room

菜式以西式為主,包含意粉、漢堡包,推廣期間更減$5,雖然大部份係葷食,但亦有素食選擇。今次叫一客檸檬汁蟹肉扁意粉 $85,加$10 有一碗手打濃湯,幾抵飲,湯底類似南瓜蓉,入口綿軟,未有creamy嘅膩感,表面有香草點綴。而意粉份量超多,只有微量檸檬汁,意粉混合蟹子、蟹肉碎,的確有蟹肉味。麵條略有鬆散,意粉擺盤未算完美,但可接受。

(2)柴石燒

去到呢間小店,最應該叫嘅係石燒牛扒$88起,價錢唔貴,不過記者好奇石燒配魚類,所以先叫咗日式蒲燒鰻魚 $78,石燒定食同樣包含沙律、珍珠白飯、味噌湯,配日式燒汁,白飯份量唔太多,未必夠飽肚,尤其男仔。相對牛扒,鰻魚嘅熱石明顯無咁熱,大概怕魚類比牛類更快燶,感覺熱石同鰻魚係兩回事,熱石只係鰻魚嘅上碟用具。醬料有燒汁、蒜蓉汁、黑椒汁,呢款日式燒汁內有薑味,但就唔適宜蘸鰻魚,不過鰻魚本身表皮有焦香,魚肉係幾肥美,厚肉而嫩滑,只係唔適宜配搭熱石同醬汁。

(3)出爐

燒味飯嚟講其實唔算太平價,都係一般單拼或雙拼燒味飯,最特別只係雙拼飯本身$56,轉為比較少有嘅乳豬都只係加$2 ( 店主稱為期間限定 )。乳豬叉燒雙拼飯 $58,乳豬、叉燒份量都大概有5件,叉燒比較瘦,肉質唔嚡,但偏乾,反而乳豬就有驚喜,表皮輕脆,有肉感,皮肉之間肥膏唔多,都算難得。

(4)珠記冰室

望落似賣Hea爆碟頭飯或常餐嘅冰室,味道上反而係幾有驚喜嘅一間,尤其記者叫咗一碟秘制咖哩雞髀飯 $60。以雞髀飯嚟講,價錢的確唔算平,不過一碟飯份量唔少,雞髀大大隻,似足斧頭炸髀!炸髀本身係生炸式,淋上特制咖哩汁,表面呈金黃色,極吸睛。而咖哩汁本身同平常坊間食到嘅咖哩汁有分別,並非滑溜感,亦非重椰香,發現咖哩汁內都有內餡,不單有咖哩香,亦有洋蔥香,更滲出啖啖蟹肉香味,的確滋味無窮。一口又一口撕出炸雞髀肉嘅同時,入口感覺亦有幾分似食咖哩炒蟹!咖哩汁撈飯一流,而咖哩汁淋上炸雞髀表面的確係金黃色靚啲,略嫌太多咖哩汁淋於炸雞髀表面,令炸雞髀表皮稍為浸軟。而白飯變得少咗咖哩汁,如果咖哩汁另上,又或多啲淋於白飯表面,咁就Perfert池啦!

(5)奶茶聯盟

奶茶聯盟係唯一一間飲品店,想飲嘢就一定要跨店購買,Food Court於呢方面做得幾好,以實際環境示範良心圈運作。上次飲過紫薯奶茶,今次試吓奶茶紅豆冰 $32,跨店餐飲$21,奶茶同紅豆冰嘅火花不俗,奶茶唔太甜膩,粒粒紅豆軟稔微甜,有咬口,唔輸蝕上次嘅紫薯奶茶;即使普通一杯奶茶,跟餐$9至$12,奶味、茶味亦恰當。

Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】

E.A.Tips﹕

(1)經將軍澳唐俊街、寶邑路十字路口,由PopCorn、將軍澳廣場方向沿海邊行,位置於寶盈花園對面,於至善街轉右,1分鐘即達The Parkside商場日日食美食廣場入口;另可經天晉匯商場,由小路直入,沿路會經過Cafe蜜蜜見,The Parkside商場另一個入口靠近大型露天停車場,步行2分鐘即達日日食美食廣場。

(2)沿扶手電梯直上,左邊為「日日·食良」街市,包含街市魚檔、菜檔,右邊則為「日日食美食廣場」,而「日日食美食廣場」左邊亦有少量乾貨店,如鮮花店、單剪理髮店、水族店、冷氣水電店、養生店。

(3)場內不時有折扣優惠,例如聖誕期間全場有9折,早輪全場有8折;更有跨店優惠,如買主食後,飲品有折扣優惠。

(4)由即日起至2021年1月31日,更有抽獎,只需於「日日·食良」街市憑有效會員卡以電子消費滿$80,亦可合拼消費,即可於每日08:00 – 20:00到G/F顧客服務部換領抽獎券獲得抽獎券乙張,每張可抽獎一次,獎品有iPhone 12 64GB、飛利浦空氣無油炸鍋、樂聲牌25公升微波爐、特福9公升焗爐,抽獎結果會於下年2月5日公佈,會有專人聯絡領獎,有需要請自行聯絡顧客服務部電話3974 5085。

日日食美食廣場 / 日日食良 Day Day Fresh – The Parkside

將軍澳唐俊街18號日日食良商場一樓
08:00–20:00
3974 5085

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈【區區有小店】將軍澳CP值最高美食廣場4間小店中西任你揀 斧頭炸髀似咖哩炒蟹? (下)〉中有 1 則留言

留言功能已關閉。