西灣炮台 西灣山

柴灣西灣山270度瞰海景賞日落 2條秘道闖炮台窺探戰時遺跡

[sig_post_pv label=””] 個人瀏覽過



一般人上柴灣西灣山,大多會經過西灣炮台晨運徑,起點路段靠近鯉魚門公園及渡假村,不過現時渡假村因疫情轉為隔離營而封閉,行山嘅朋友亦未能途經西灣炮台晨運徑而步行上西灣山同西灣炮台。記者今次實地考察,發現有兩條小路都可以直上西灣山同西灣炮台,今次帶大家行吓呢兩條神秘通道,闖入目前極少人流嘅西灣山。

大概係原本路線於疫情下被封閉,以致西灣山、西灣炮台變成人跡罕至嘅地點,都算遠離繁囂。不過,其實另有兩條小路可直通上山,一條由柴灣北配水庫遊樂場背後山徑上山另一條則從水務署柴灣北二號抽水站旁邊樓梯上山。西灣山僅為柴灣一座小山,僅高約197米,路段同樣簡單易行,沿路多樹蔭,兩個人可輕鬆上山,都算係柴灣嘅市區後花園,絕對係閒遊之選。

倘若從柴灣起步,建議先穿過柴灣公園,經祥民道休憩花園,沿祥民道而走,右邊係東區尤德夫人那打素醫院,左邊係樂民道休憩處,直行到盡頭可達柴灣道,再步行2分鐘即到達柴灣北配水庫遊樂場。而祥民道休憩花園並非一個普通公園,秋冬季節時,園內亦有楓香樹,相對人頭湧湧嘅元朗大棠楓香林,可以暫且安靜地欣賞楓葉。

走上位處柴灣坳樂民道、靠近柴灣道嘅柴灣北配水庫遊樂場,內有一個七人硬地足球場,疫情期間已經封閉,表面睇嚟平平無奇,的確無乜特別。不過,只要行到配水庫遊樂場嘅最右方,即會發現旁邊有兩條樓梯,沿左邊閘內嘅樓梯行,可以從配水庫遊樂場高點睇風景;而從右邊閘外嘅樓梯向上走,先為樓梯,後為小山路,就係可以闖入西灣炮台嘅第一條秘道,路段只係幾分鐘腳程。

西灣山內嘅鯉魚門公園渡假村曾經係英軍鯉魚門軍營,山上亦有炮台、堡壘、防禦軍事等遺跡,而西灣炮台由1880年起興建,15年後建成堡壘,其後再加上6吋後裝炮嘅海防炮炮台,以抗敵艦,最終炮台23年先完工。不過,英軍顧問團3年後質疑海防炮需要,其後被撤裝,丟空至1920年代,英軍再用作防空炮台用途。走向炮台嘅晨運徑上,會發現有幾個軍火庫依舊保留,兩邊遍佈林蔭。目前山上既有140年歷史嘅碉堡、炮台遺跡,細心留意,不難發現地下更有唔少炮座螺栓痕跡,牆身亦有彈藥箱痕跡,甚至炮床、槍眼,周圍有唔少似足防空洞嘅洞口,大概係防守時用作逃走或遊擊用途。

依舊屹立山上嘅西灣炮台曾經歷二戰時期,包含英國應付德國攻勢,甚至經歷日軍入侵香港時期,而西灣炮台亦曾被日軍攻佔,炮台守軍既有陣亡,亦有被俘、被屠殺,但都有成功撤離,屬當時嘅主要戰場同防衛設施。駐港英軍最終管理鯉魚門軍營至1987年先交予香港政府,軍營可分為3個部分,只係目前只有1個西灣炮台部份可以24小時免費遊覽,原為高地炮台,另外2個部份分別係中央兵房區域、高低地炮台,位置係鯉魚門公園及渡假村、香港海防博物館同配水庫,都因為疫情而被封閉。目前軍營已被列入法定古蹟,部份建築物更被評為一、二、三級歷史建築,每一處都充滿英殖時代感覺。

炮台上英殖時期嘅大炮早於30幾年前已撤走,現時大炮已不復見,從頂端會見到已經改建成鯉魚門公園,坳頂既可望日出,亦可於黃昏觀賞夕陽靚景,同時俯視山下柴灣市景,亦可以從北炮台最高點環瞰270度海景,拍拖上山吹吹海風,浪漫又愜意。山頂位置既可望九龍灣、鯉魚門、杏花邨方向,亦可望釣魚翁、將軍澳工業邨、堆填區,甚至遠眺東龍島,視野極廣闊。不過,山頂處嘅堡壘有一座數碼電視訊號轉發站,禁止遊人內進。



至於另一條秘道,則可以從筲箕灣東大街電車總站起步,沿柴灣道行至柴灣道兒童遊樂場,橫過馬路後,經水務署柴灣北二號抽水站旁邊樓梯上山,即可連接西灣炮台晨運徑,比原本經鯉魚門公園及渡假村嘅路線快2至3倍!

延伸閱讀﹕歌連臣角夏日懶人路線 直闖舊軍事建築探險打卡

延伸閱讀﹕皇冠郵筒起步!柴灣屋邨後山藏舊式鐵滑梯 引水道側百年英式石橋點解叫猛鬼橋?


E.A.Tips﹕

(1)柴灣北配水庫遊樂場內無照明系統,亦無洗手間、更衣室,不宜夜間行走,而且內有security,下晝6點會關門,謹記要留意時間。

(2)2條秘道路段雖然簡單,但總算山路梯級,亦要小心上落。

(3)路線一可經柴灣北配水庫遊樂場,沿旁邊小樓梯上山,一半為樓梯、一半為山路,最快5分鐘可走完秘道,直接連接西灣炮台晨運徑中段,算係shortcut,比路線二接近炮台。

(4)路線二由柴灣道兒童遊樂場起步,對面係聖馬可小學,然後行上水務署柴灣北二號抽水站,再於旁邊樓梯上山,同樣5分鐘可以走完秘道,毋須經配水庫遊樂場,路段由山路同石屎樓梯結合,不過梯級就比路線一陡峭。

(5)謹記愛護環境,自己垃圾自己帶走。
(6)炮台為歷史遺跡,切勿胡亂破壞。
(7)炮台靠近鯉魚門公園,基本上圍繞而走,不過山頂處有數碼電視訊號轉發站,即電視發射站,高電壓範圍禁止遊人進入,謹記唔好闖入,免生危險。
(8)連接炮台嘅西灣炮台晨運徑原為車路,不過現時因鯉魚門公園及渡假村封閉,就未有車輛行駛,平時就需要留意車輛出入啦。
(9)西灣炮台山上同西灣炮台晨運徑都不時會見到有禁區牌,寫住「嚴禁進入本告示後面的地區」,屆時需要自行選擇行邊一條路。
(10)始終係舊軍事之地,謹記於山上唔好隨便執起任何可疑物件,確保個人安全。
(11)乘搭新巴巴士8,8H,9,14,81,81A,82,106,682 或城巴巴士8S,8X,19,780,118,606 等可於鯉魚門公園站落車,又或綠色小巴65號於鯉魚門公園及渡假村落車。


建議路線(1)﹕

建議路線(2)﹕

柴灣北配水庫遊樂場

西灣山
07:00–18:00

配水庫路線﹕

西灣炮台Former Sai Wan Battery

西灣山
24hours
2568 7455

原本路線﹕

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!