經配水庫遊樂場登玉桂山穿梭連島沙洲闖鴨脷排

上回行過被稱為假玉桂山嘅小玉桂山，今次行返真玉桂山啦！靠近鴨脷洲配水庫遊樂場嘅玉桂山，為鴨脷洲東部最高嘅山峰，南面沙碮更連接小島鴨脷排，登上玉桂山，由難到易嘅山徑都有，兩個人拍拖想行邊條路線都得。

先經過鴨脷洲配水庫遊樂場，位置靠近利東邨、利東商場，遊樂場於配水庫頂，內有足球場、120米緩跑徑、健身徑等，旁邊欄杆通通髹上粉藍色，甚搶眼。

從鴨脷洲配水庫遊樂場觀望，景觀同玉桂山配水庫休憩處基本上差唔多，都可望南區海景，可眺望南丫島、海洋公園方向，而背後山腰則為利東邨、漁安苑、深灣軒。

折返分岔路口，向山上而走即可沿路走上玉桂山，而玉桂山高約196.2米，比假玉桂山高約50米，歷史可追溯至1841年。山上有鴨巴甸炮台（Aberdeen Battery），炮台又稱香港仔炮台，英文來源亦只因鴨脷洲原本叫Aberdeen Island，英軍用以鎮守本地南面海岸至南丫島一帶。不過，炮台於香港保衛戰期間被守軍破壞，以防落入日軍之手。戰後，玉桂山被削成利東臨時房屋區，即現時嘅利東邨。

玉桂山有三條登山路線，毋須10分鐘可登頂，經樓梯、藍色水渠、鴨脷洲配水庫遊樂場，旁邊有幾條山徑，左邊比較容易行走，中間就遍佈沙石，較為崎嶇不平，而右邊路段就係最驚險。事實上，玉桂山比假玉桂山更陡峭，有一定難度，而且容易滑倒，不時需要手腳並用。

從玉桂山山頂處可居高臨下欣賞香港仔海峽、南中國海，一望無際景觀盡入眼簾，之後更可以穿過形成連島沙洲嘅沙堤，到對面嘅鴨脷排，經少量攀爬路段後，可登上高68米嘅純白色鴨脷排燈塔，於岸邊吹吹海風，極愜意。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線171, 94, 97, 99都可到達鴨脷洲。

❷ 走到鴨脷洲配水庫遊樂場、玉桂山，可於同一入口進入，但入口比較隱秘，需經小路走入小樓梯，其後從分岔路轉右可通往鴨脷洲配水庫遊樂場，直行可去玉桂山。

❸ 玉桂山路段比較崎嶇，需要特別小心安全。

❹ 謹記愛護環境，自己垃圾自己帶走。

❺ 沿路無補給點，記得準備充足糧水，於利東商場補給後先上山。

❻ 若要走到鴨脷排，需事前了解潮漲潮退時間。

❼ 從玉桂山走到鴨脷排，需下行而走，路後相當陡峭，要小心安全。