平時商場內好少可以搵到良心店，通常數量上都係比較少，九龍灣Megabox亦唔例外，絕對係3隻手指數得晒，靠近中庭嘅西餐廳就係其中一間。據稱，本來係來自元朗嘅阿茶茶館，現時易名為Achacha Food & Beverage Boutique。
餐廳以半開放式設計，都算寬敞，室內以深色為主調，既有高腳枱櫈，亦有梳化座位，位置方便之餘，亦算有情調，而透過半身欄杆，可直視可望商場中庭嘅活動。菜式本身以法式為主，例如法式鹹、甜薄餅，目前午市套餐就以西式為主，每份均附送麵包、餐湯或沙律、飲品，環境、價錢、菜式亦唔失禮，適合兩個人初次拍拖約會。
餐湯為南瓜湯，湯底有南瓜蓉，入口甘甜，有南瓜味，雖然略有杰身，未至於稀，但就偏薄，唔夠Creamy；麵包則為蒜蓉包，微暖，表皮同法包一樣夠硬身、脆口，麵包內算軟身，塗滿蒜蓉、牛油，蒜香同牛油香亦足夠，令麵包夠香口。
午市套餐其中一款係紅酒煮牛肉 $72，套餐可配牛油飯、薯蓉或法包，紅油味唔重，牛肉粒有咬口，有絲絲纖維，但總算唔韌，有肉汁，醬汁內有甘筍，帶有甜味，令牛肉蘸上醬汁後鹹中帶甜，中和膩感，只係醬汁偏稀，After Taste唔多。牛油飯只有少量油飯感覺，比較似白飯，飯粒軟硬尚算適中。
另一款係青醬大蝦扁意粉 $72，意粉為扁意粉，上碟有待改善。大蝦就有4大隻，都算唔少，蝦肉都算煮得爽口，配料有三色椒、蘑菇粒。意粉乾爽，軟硬適中，油份唔算多，調味雖然恰好，不過青醬味就唔多。
除咗有咖啡或茶，重有鮮果茶、自家製Lemonade檸檬特飲，唔使加錢。Lemonade夠冰爽，檸檬味十足，好Fresh，入口酸中帶微甜，開胃消滯。
延伸閱讀﹕CoCo Espresso登陸九龍灣 罕見氮氣咖啡綿密有餘韻
延伸閱讀﹕九龍灣版嘉頓山 624級直長階梯望獅子山 快閃登平山睇芒草
E.A.Tips﹕
(1)既可從德福花園乘搭穿梭巴士到Megabox，亦可從德福花園自行步行到Megabox，腳程約15至25分鐘。
(2)餐廳收加一服務費，若想午市套餐同時有餐湯同沙律，需加$10，蒜蓉包比較乾身，最好蘸住餐湯嚟食。
(3)商場食飯時間會較多人，唔想等位就最好避開人流多嘅時間。
Achacha Food & Beverage Boutique
九龍灣宏照道38號MegaBox L5 3及4號舖 
11:45 – 22:00 
2651 5232
