小編有朋友住喺蝴蝶灣附近,約咗朋友打牌,見未夠鐘同朋友食住嘢等,要食當然要揀黃店嚟食啦,蝴蝶灣本身環境好Chill,拍拖兩個人嚟呢度食嘢勁適合。
呢間小茶角有牛角包食,朋友話想食,平時唔多鍾意食牛角包嘅小編都食咗舊,又真係出奇地好食,焗得好酥脆可口,入口唔油膩,入面好軟熟,食嗰時酥皮一層又一層剝落好療癒。
屯門牛
餡料有蛋、蘑菇、芝士、煙肉、蕃茄、生菜,味道比較濃厚,炒蛋香口,芝士蘑菇煙肉配搭向來都係香濃美味,以鮮甜蕃茄同爽脆生菜作底,可中和返味蕾,加上酥脆牛角包,配搭唔錯 。
煙三文牛
餡料相對比較簡單同健康,有煙三文魚、蕃茄、生菜,成大塊煙三文魚等餡料夾喺牛角包入面,微燻煙三文魚加鮮甜蕃茄配爽脆生菜,好fresh。加上酥脆口感嘅牛角包配搭得宜,味道唔搶 適合愛清淡嘅人。
跟餐牛角包+嘢飲仲有炸薯條/炸薯角作小食,兩者其實唔係太大分別,新鮮炸出嘅薯條同薯角熱辣辣,好香脆,入面都軟熟。
宇治抺茶Latte 味道比較濃厚,抺茶味同幼滑嘅鮮奶味融合,香濃抺茶配鮮奶,茶香帶有幾分香甜。
茉香綠茶 味道較清新,無咁濃厚,適合喜好清淡嘅人,綠茶清香味可以為剛剛食嘅小食解解膩,呢個配搭唔錯。
小茶角
地址﹕屯門湖翠路138號啟豐商場地下1A4號舖
營業時間﹕11:00 – 21:00
電話﹕5726 0927
在〈蝴蝶灣爆餡牛角包 入口酥脆 層層剝落超療癒〉中有 7 則留言
留言功能已關閉。