葵涌北食水配水庫>城門水塘主壩>城門下水塘至大圍

30分鐘由新界西行到新界東!窺探隧道底搶眼翡翠之鏡 葵涌配水庫經城門水塘下降至大圍市中心





荃灣嘅城門水塘係唔少人都行過嘅地方,路線清晰而簡單,拍拖閒遊向來都係合適路線,部份人甚至會連住菠蘿壩、金山而走,甚至接住行俗稱針草帽嘅針山、草山、大帽山,但記者今次想行嘅係經城門水塘,從荃灣至葵涌直接行到沙田大圍方向,你以為好難?事實上,由葵涌行到大圍,幾乎全程石屎路,兩個人要由新界西行到新界東,其實不難!

由梨木樹巴士總站起步,步行約10分鐘,先經過葵涌北食水配水庫,即可到達城門水塘。葵涌北食水配水庫係香港其中一個有蓋配水庫,內裏明顯可見大片碧綠草地,打波、散步、野餐都好適合,可惜政府將其封閉,好地方往往唔俾一般人進入。

由配水庫步行約5至10分鐘,經樓梯可到達城門燒烤區,再行10分鐘平路即達位處荃灣城門谷嘅城門水塘主壩,位置被稱為上城門水塘或銀禧水塘,用作儲存水,為首個將儲存水由新界窮往港島嘅水塘。上城門水塘嘅主壩、鐵橋、水掣房、鐘形溢流口都係香港一級歷史建築,水塘紀念碑更加係香港法定古蹟,而水塘比較深,但從中段離開上城門水塘,經鐵梯走向壩底,穿過溪澗更可走到下城門水塘!

下城門水塘被劃為沙田區,同屬於荃灣區嘅上城門水塘有別,不過兩者其實只係相距30分鐘步程。途中可見以1990年通車嘅城門隧道分隔,從隧道底仰望可見一道道高架橋,橫越城門峽。

穿過壩底鐵梯,只需沿溪澗旁邊藍色欄杆走,路線甚明顯,經大鐵橋下行至城門隧道底,會聽到嘈雜車聲,附近更隱藏咗一個「翡翠之鏡」!「翡翠之鏡」同大受歡迎嘅「天空之鏡」近似,但倒影則為翡翠色調,碧綠色湖水青翠奪目,狀似翡翠,比一般天空之鏡值得打卡。



繼續沿引水道路段直行,會發現都係繞下城門水塘而行,20至30分鐘後可到達下城門水塘,沿途嘅路都闊落而清晰,不時有樹蔭,而且人跡罕至,比較清靜。下城門水塘靠近針山、大圍富山,並無郊野公園,面積只係上城門水塘嘅三份一,曾經係船灣淡水湖供水計劃一部份,曾經係醉酒灣防線之一,屬香港保衛戰遺跡。

下城門水塘內有青翠碧綠草地,當踏入主壩範圍時,既有綠油油草披斜坡,地方空曠,亦不難發現唔少人都專程揸車兼攜帶遙控模型飛機同行,一小段路瞬間演變成私人放飛機路。

呢邊水塘同樣雄偉,逾40年歷史嘅水掣塔同樣被列為香港一級歷史建築,而閘主軸、導流壩、鐘形溢流口都被列為香港二級歷史建築,至於主壩、供水槽就被列為香港三級歷史建築,從水壩上方逾200米嘅小路可探視水塘全景。


E.A.Tips :

(1) 巴士路線278X, 312, 36, 36B, 36M, 40X, 48X, 73X, 94A 皆可到達梨木樹巴士總站,對面就有小路直上葵涌北食水配水庫;另小巴路線82, 94S亦可到達城門水塘。

(2) 由城門水塘主壩中段,可以經小路通往水塘秘路,穿過城門水塘壩底後,可以一直沿石屎路步向大圍方向。

(3) 若要走到城門水塘壩底,必須預先留意有無放水,否則水淹或山洪暴發就極危險,無得行走同穿過溪澗。

(4) 上城門水塘壩底有一道狹窄圓拱形鐵梯,只需向下行,再越過溪澗叢林,即可走到城門隧道底,再繼續前行,上斜前基本上只有一個分岔路口,向右邊斜路直上,繼續沿石屎路前行,逐漸會到達下城門水塘。

(5) 走到城門水塘壩底時,鐵梯梯級比較狹小,要注意安全。

(6) 勿喧嘩吵鬧;謹記自己垃圾自己帶走。

(7) 若要步入溪澗就要更小心安全,最好先著防滑鞋。

(8) 唔少人都會從大圍起步,經下城門水塘行到上城門水塘,最後以荃灣作結。不過,編輯比較建議由荃灣或葵涌起步,先行上城門水塘,再行下城門水塘,以大圍作結,因為此路段上斜、上樓梯較少,稍為輕鬆。若由大圍起步,不單多暗斜,而且最後更要上斜度頗高嘅樓梯到上城門水塘。

(9) 由下城門水塘離開,經下城門道會經過富山火葬場,前行至寶福紀念館對面會有小巴路線64K,可以直接到達大圍市中心。而繼續沿路前行,轉入大圍新村路,穿過大圍新村,仰望可見青沙公路,穿過橋底即可到達大圍街市、大圍市中心,腳程約15分鐘。


延伸閱讀﹕元荃古道石龍拱段環瞰青荃 廢校水泥滑梯探秘打卡

延伸閱讀﹕老圍村廢校連接佛教勝地芺蓉山 大帽山山腳引水道瞰荃青葵

葵涌北食水配水庫

葵涌
24hours
2824 5000

城門水塘主壩

荃灣麥理浩徑7段
24hours

下城門水塘主壩

金山下城門道
24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!