Muse Furniture Lab

2021年人氣打卡店! 元朗近郊復古傢俬舖重開 型格咖啡店連歐陸風小花園 歎自家製法式可麗餅/櫻花冰蜜桃梳打

[sig_post_pv label=””] 個人瀏覽過





元朗錦田隱藏一間又一間特色小店,以下呢間店舖原為古董傢俬舖,12月宣佈停業,最近又於另一舖位重新開業,副業繼續做埋咖啡店,更提供一個私家大花園俾客人打卡,最啱情侶拍拖兩個人去放鬆吓,花園有幾分異國風情,加上空間咁大,睇怕都唔應該稱之為「小店」啩?

延伸閱讀﹕全部自由定價! 秒到日式鄉郊 錦田市中心咖啡館秘點似世外桃源

最近從元朗錦田舊舖搬到新舖嘅Muse Furniture Lab,空間明顯擴大咗,但依舊以黑色主調小屋為主,傢俬舖內有乾坤,內有小花園同細小停車場。從錦上路大馬路邊嘅黑色招牌一步步踏入店內,即走入元朗錦田區內一個秘密花園,令本地人於繁忙都市中感受片刻慢活空間,充滿度假風,總算係可以來一個快閃小旅行。

黑色為主嘅小屋相當型格,設計帶有幾分瑰麗英倫風格,相比一般以少女風為主調設計嘅咖啡店有特色,室內既有透明餐枱櫈,盡顯高貴華麗感,充滿格調。而盡頭更有一面由一個個古董行李箱搭建嘅特色牆身,可裝飾同儲物,不過價錢就比較離地,並非一般人可以購得,屬於中六合彩或者先買得起嘅價錢。事實上,呢間傢俬店確實專門售賣度身訂造嘅傢俱,更自設廠房,尤其係18世紀歐洲貴族嘅傢俬。

戶外茶座為有蓋位置,羅馬式柱子、天花水晶吊燈都貫徹以黑色為主調,置身其中一邊用餐,一邊放空,望向花園有陣陣田園風,更覺悠閒,適合同情人談心、同閨蜜閒聊。

食物選擇唔少,包含沙律、意粉、小食、飲品,重有自家製法式可麗餅,每個item有3至6個選擇。最飽肚嘅莫過於意粉,當中有雞肉、藍青口、大蝦、黑松露帶子、黑松露野菌可擇,而烤雞肉配車打芝士忌廉醬意大利粉$108,意粉軟硬度不過不失,醬汁比較少,雞肉份量適中,夠飽肚,驚喜不大。而小食其中一款係泰式炸蝦餅$68,份量足,蝦餅炸成金黃色,酥脆可口,略有蝦味,不過蝦肉唔多。

飲品有唔少期間限定選擇,包括櫻花蜜桃梳打$68、士多啤梨綠茶冰$68,櫻花蜜桃梳打內有白桃肉,亦有櫻花冰,冰粒溶化後會留低粉紅色櫻花花瓣,連匙羹都係櫻花形狀;而士多啤梨綠茶冰夠香甜,但綠茶味唔重,其他如西柚蒟蒻梳打$63 內含兩大塊蒟蒻,有咬口,亦係清爽解渴之類飲品,適合夏天飲用。



比較值得推介嘅係自家製法式可麗餅,即Crepe,餡料可揀雞肉、三文魚、黑松露帶子大蝦,更有素菜選擇,當中烤雞肉配車打芝士法式可麗餅$108 有幾分似手抓餅。餅皮偏薄身,質感柔軟,煎過後夠香口,同時略有煙韌感,餡料豐富,但雞肉一般,配料有半熟蛋、車打芝士、大量椰菜絲、mayonnaise,整體無膩感,幾清新。

甜品有歌劇院蛋糕芒果意大利芝士蛋糕,重有紅莓乾脆脆蛋糕$68,蛋糕綿軟,配搭輕脆嘅紅莓乾,層次豐富,微甜,屬正常蛋糕味道。

大門口旁邊有一間傢俬舖,內裏有唔少亮麗傢俱、擺設,歐式水晶吊燈、高級啡色皮革梳化夠Grand又夠高貴,買唔起都可以觀賞吓兼影吓相。其他復古傢俱如酒櫃、時鐘茶几、咕臣、米字形英倫小梳化等都幾特別,同時帶有時尚感,似足一個小型復古博物館。

咖啡店位置近郊,地方偌大,外連一個歐陸風小花園,戶外庭園一片翠綠草原,人造草地上有鞦韆、盆栽,異國風滿滿,超有外地感覺,似世外桃源。隨時沐浴於陽光中,可以感受悠閒嘅一日,愜意得似度假,愛打卡嘅朋友確實可以影幾個鐘。

呢間Muse Furniture Lab 原本位處荃灣工廠大廈內,2014年起創立,後來於2020年搬入元朗錦田,以雙層獨立屋姿態同時打造咖啡店,及後於年尾宣佈搬遷,最近搬到元朗錦田另一處地方,包含小花園、停車場,亦擴大咗活動空間。

延伸閱讀﹕錦田街坊茶記爆汁牛漢堡 低調高手製超濃蕃茄湯

延伸閱讀﹕錦田隱世正宗泰國菜 平價濕炒河粉極惹味


E.A.Tips﹕

(1) 小店靠近南苑海鮮酒家,回頭行1分鐘即達,大概隔3間大屋,位置於馬路邊;而從上村公園步行到店內,腳程約3分鐘。

(2) 必須要預約,Walk in 未必俾入,留意目前逢星期二休息。

(3) 乘搭巴士路線64K, 64S, 251A 於上村新村站/上村球場站落車,而乘搭小巴路線72, 72M 亦可於上村公園站落車,巴士、小巴都可於錦上路站公共運輸交匯處上車。另一邊廂,可同樣乘搭巴士路線64K由太和向元朗方向前進,同樣於上村新村站落車。

(4) 乘搭的士或Uber,由錦上路站公共運輸交匯處到Muse Furniture Lab,車費約$50,時間約15分鐘,比較適合兩個人或以上嘅朋友。

(5) 餐牌可於枱面Scan QR Code自行查看,再向店員落單。

(6) 店內座位較昏暗,而店外有蓋座位比較適合影相,不過留意花草甚多,戶外座位會超多惡蚊,嚴格嚟講係一隻又一隻比蚊更細小嘅蠓!由於多花草、盆栽、泥面,所以比較多蠓,蠓本身尤其生長於潮濕陰暗之地。店家並無任何防蚊措施,受蠓嚴重攻擊嘅編輯表示,萬二分溫馨提示,必須要自備防蚊用品,著長衫長褲兼採取防蚊措施先好去,不過就唔好向住啲花草噴蚊怕水。

(7) 草地小花園玻璃枱唔可以進食,只可影相。

(8) 花園外有停車位,可以自駕進入,但最好預先同店家講聲。

(9) 每人最低消費為$150,不過一杯梳打類飲品都$60幾,好難唔超越限額。

(10) 愛惜花草,勿採摘或破壞。

(11) 近門口位置有一個店家嘅傢俬舖,雖然可以影吓相,但謹記唔好隨意碰觸展品。

(12) 繁忙時間會實施限時用餐,每張枱約可以食1.5小時,不過就可以喺場草地上、傢俬舖內任打卡。

(13) 小花園盡頭有洗手間,可供客人使用。

延伸閱讀﹕錦田紅磚屋前身係蠟燭廠 室內市集52間小店驚喜尋寶

延伸閱讀﹕【2021賞花地圖】紅棉列隊石崗軍營兩側 雷公田村賞火紅木棉花極清靜


Muse Furniture Lab

元朗錦上路26C號地鋪
星期一 12:00 – 17:00;星期二全日休息;星期三至日 12:00 – 17:00
9332 6168 (whatsapp)、6388 8824 (WhatsApp)

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!