moono合舍

深水埗超輕盈100%純素甜點 限定玄米茶溝Latte似足日式抺茶

[sig_post_pv label=””] 個人瀏覽過





近年,香港人著重健康,素食店愈開愈多,呢間位於深水埗嘅蛋糕店moono亦以純素甜品為主,唔少食物均配合生酮飲食,部份亦不含麩質、牛奶,既有純素卷蛋糕、純素Macaroons,甚至純素法式撻,拍拖想輕盈啲可以兩個人去試吓呢!

店內堂食位置唔多,大概只有10個座位,加上戶外2個座位,小店以網店起家,由網店轉為實體店,選址深水埗「合舍」內,售賣純素蛋糕。室內以更大空間擺放書本,唔知情嘅人會覺得比起Cafe,其實更似一間書店。

事實上,「合舍(Form Society)」位於大南街,店內為共用空間,環境清靜,本身係由藝術家開設,以複合式營造一個小型文藝創意空間,不時有工作坊、展覽。室內外皆以全木為主調,裝潢簡約,門口旁邊有個小窗口,店內間隔四正,左右皆有擺放唔少展覽、文學雜誌、書本、手作產品,都算係小社區內嘅小確幸。

蛋糕款式唔多,款款簡約而略帶清新感,大多以純素為主,官方稱無添加蛋、奶、人造色素。卷蛋糕更會不時轉換款式,選料方面都幾有驚喜,純素拿破侖蛋糕、純素Tiramisu都未算特別,反而印度香料茶香蕉純素卷蛋糕 $52 都算係一大突破,令人更嘖嘖稱奇。印度香料茶為重口味原材料,配上清淡嘅純素蛋糕到底係咩感覺?



卷蛋糕質感比一般蛋糕稍乾同硬身,無咁鬆軟,氣孔較多,但入口都略有軟綿感,內餡配上軟滑豆奶忌廉、黑糖豆乳,甜度唔高,亦無一般忌廉咁濃味,亦無咁重膩感,可減輕負擔,而蛋糕內既有唔太突出嘅冰凍香蕉片,亦特別加入印度香料茶。本身Masala Tea以紅茶葉混合多種香料,印度香料茶包括孜然、玉桂、豆蔻、丁香等,再加入牛奶,濃香而香滑。變成蛋糕材料後,香料味更搶,好有新鮮感,但就未必個個都接受。

期間限定玄米茶Latte焙茶Latte $48/杯,當中玄米茶望落貌似一杯抺茶Latte,玄米茶清香配上Latte幾特別,既有茶味,亦有咖啡味,清新又醒神。


E.A.Tips﹕

(1) 小店只開逢星期四至日,最後落單時間為18:30,而18:00後只會提供外賣。

(2) 由深水埗黃金電腦商場步行過去,腳程約10分鐘。

(3) 若堂食嘅話,記得將餐具等自行回收到櫃台。

(4) 甜點無添加牛奶、雞蛋,對蛋奶敏感嘅人都可以食。

(5) 除咗上述提過嘅食物、飲品,曲奇、蝴蝶酥、冷泡茶等亦可以預定或外賣。


moono

深水埗大南街186號地下合舍內
星期一至三全日休息;星期四至日 12:00 – 19:00

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!