[sig_post_pv label=””] 個人瀏覽過
飛鵝山、獅子山、大帽山都係熱門行山路線，當中飛鵝山路線連影帝周潤發都不時走過，近年大多數人走飛鵝山都會行上自殺崖打卡，而事實上飛鵝山道又點只自殺崖一條路線，以下就係極少數人會走嘅一條路線，人流極少，石砌步道平坦易行，有與世隔絕感覺，該小路可以直通西貢，終點可以直達一間香港舊有電視台嘅遺址。
今次路段可以由九龍行到新界，穿過一條比較少行山人士走過嘅西貢古道，由九龍灣行到西貢，倘若唔上飛鵝山頂，汗水亦無需要出，屬拍拖兩個人初夏漫步閒遊之選。
由九龍灣起步，經得寶商場、彩盈邨，穿過彩禧路公園、彩榮路公園到佐敦谷公園，路線同上平山一樣，想減省腳骨力可以連續乘搭3座電梯代步，亦可以直達佐敦谷晨運徑。想更輕鬆可以直接乘搭巴士或小巴路線，於順利消防局落車，然後步行到佐敦谷公園門口。20至25分鐘可由九龍灣市中心走出佐敦谷公園大門口，接上新清水灣道，沿左邊路繼續前行，中途會經過高架橋，圍欄已經被加高，可從橋上俯視新清水灣道幾十米下嘅景色，眺望彩雲邨一帶市景。
從新清水灣道走到舊清水灣道，只係5分鐘腳程，交叉點大概係清水灣道臨時休憩處，再走10分鐘可以到達飛鵝山道上嘅飛鵝山石碑，沿途可以回望順利邨一帶風景。
沿飛鵝山道走，會途經高尚住宅區，十分寧靜，中途有分岔路，可經衛奕信徑轉出井欄樹村方向，而繼續直行會經過被冠以「機會嚟啦飛雲」嘅飛雲路，約20分鐘可以到達百花林，即飛鵝山山腰。路段稍有暗斜，但屬平坦大路，唔算太辛苦，飛鵝山道由車輛同行人共用，所以更加要小心有車駛過，百花林路附近會見到垃圾站、飛鵝山配水庫指示牌嘅車路，再走5分鐘會見到馬鞍山郊野公園分岔路口嘅公園涼亭，意味進入咗馬鞍山郊野公園範圍。
由百花林上飛鵝山，第一個位於飛霞路嘅路口為直上自殺崖路線，而第二個山徑路口就係由第一個路口前行幾十米，可直上飛鵝山電視及電台發射站嘅路線。上山路段全程只係不斷攀升山路梯級，中至尾段可見小竹林，合共走約30至35分鐘即可望到電塔，由百花林山腰直上飛鵝山頂路段比較崎嶇不平，斜度亦高，遠眺就夠，其實並非新手路線，更不用說直上飛鵝山南脊自殺崖嘅路線，所以唔可以盲目相信部份網上介紹。
山頂電塔其實係數碼廣播發射站，可覆蓋東九龍至港島東、將軍澳至西貢市同白沙灣一帶廣播，更有中華電力無線電站。而飛鵝山頂有一個大型直升機坪，頂端可環瞰270度九龍全景，包括九龍半島至香港島、獅子山至畢架山，西貢蠔涌以至白沙灣一帶壯麗景色，甚至傲視前啟德機場、香港維多利亞港，景觀非常遼闊。飛鵝山係九龍北部最高嘅山峰，山頂位置逾600米，地勢險要，風勢亦強，不時有墮崖意外，所以絕對要量力而為。
從飛鵝山頂落山，比上山更崎嶇，需要約40至45分鐘返百花林路口。由飛鵝山道轉入百花林路，就係西貢古道，路段基本上只係下降山路，平坦易行，全程有8公里，而天然石梯級亦貌似翻新過，舖砌出更清晰道路。
西貢古道內有於1910年九龍東頭村離世嘅孫中山之母楊太君夫人墓地，墓地超越百年，地方偌大，但甚為簡約，環形墓地前端只有麻石平台，並非華麗墓地，旁邊則有一座涼亭，但墓地背山面海，據知孫母墓為風水墓地。從墓地觀望，對出亦可遠眺蠔涌、西貢白沙灣，基本西貢景觀盡入眼簾。而由飛鵝山道、百花林路口走到孫母墓，只需5至10分鐘步程，其後會發現通往孫母墓嘅路段叫南陔（音﹕該）徑。
西貢古道樹蔭充足，樹木生長茂盛，遍佈林蔭，可盡情感受大自然寧靜，但毋須擔心陽光直射問題，只需擔心惡蚊較多。沿路繼續前行，會經過蠔涌谷，15分鐘後會見到一間華麗廢棄舊屋，樓高3層，窗戶裝有彩色玻璃，但室內放滿雜物。再前行5至10分鐘即可走出西貢古道，接上同古道重疊嘅衛奕信徑第4段，路口會有狗吠聲，不過狗隻被困於閘內，尚算安全。
其後，沿引水道小橋走，需要經大藍湖路穿過大藍湖村，一直沿往蠔涌嘅指示牌走，斷斷續續有分支路，但指示總算清晰，中段會見到一間廢棄學校，門口寫住漢英學校。其後會穿過唔少村屋、農地，滿滿田園氣息，充滿鄉土風情，途中會有紅磚牆路，大概步行20分鐘，即可走出村口。原來西貢古道係舊時西貢居民通往九龍嘅必經之路，可穿過蠔涌至大藍湖、百花林同飛鵝山道，方便來往九龍至西貢以購買日用品或出售農作物，古道尚算保存完整。
繼續下行，若見到一道大水管，即代表已經到達村口位置，穿過大水管底部後，繼續沿蠔涌路連綿壁畫走，只需10分鐘路程，終點即可見未有清拆嘅亞洲電視蠔涌舊廠房，即1992年啟用至2007年停用嘅錄影廠，三色毛冷狀嘅亞視台徽仍然清晰可見，該廠房曾展現舊亞視最輝煌嘅年代，同時見證一個由盛轉衰嘅本地電視台。而盡頭亦可見古色古香嘅蠔涌車公廟，係一座被列為一級歷史建築嘅逾400年古廟，沿西貢古道捷徑走，可直接離開蠔涌路，既可進入西貢，亦可返回市區。
E.A.Tips :
(1) 最簡單方法係由佐敦谷公園步行過去，由新清水灣道轉入舊清水灣道，到達飛鵝山石碑就可以繼續沿大路直上。而新清水灣道嘅高架橋不時有大貨車、巴士駛過，要多加注意安全。
(2) 飛鵝山路為單程路，最好靠埋一邊行，小心車輛，免生意外。
(3) 小巴路線1, 1A號都可以於飛鵝山道路口落車，而巴士路線91, 91M, 92號亦可於德望學校落車，然後沿飛鵝山道走，再經328 登山徑上山，位置於飛鵝山登山口，當見到百花林石碑之後，可以留意左邊登山徑。當中，巴士路線92,92R,292P,792M 分別可來往西貢至鑽石山、觀塘、將軍澳。
(4) 於蠔涌回程時，亦可以過對面馬路，然後乘搭巴士路線92號返回鑽石山。
(5) 路段除咗上飛鵝山一段為山路之外，其餘皆為平路，唔計上飛鵝山發射站，路段都屬輕鬆之路，若加埋上發射站一段路，時間大概需要3至3.5小時。
(6) 倘若走飛鵝山一段路，建議穿著長衫長褲，皆因山路崎嶇不平；同時謹記準備充足糧水，而飛鵝山頂都算比較大風，要同時留意天氣發展。
(7) 走百花林至蠔涌一段小路前，最好預先做足防蚊措施，皆因蚊隻比較多，部份石砌梯級亦長滿青苔，需要小心行走，避免滑倒；而該段路亦比較多墓地，記得保持安靜，尊重先人。
(8) 除咗蠔涌谷一段路，其餘路段都無街燈，若起步時間較晏，最好準備定頭燈或手電筒。
(9) 謹記要預先留意天氣狀況，飛鵝山一段絕不適宜落雨或潮濕天氣行走，而百花林至蠔涌一段更加係比較陰暗，最好天氣良好先行走。
(10) 上山容易落山難，雖然已經安上木製階級，但從飛鵝山頂落山時，要比上山時更注意安全，山路坡度甚大，而且山路階梯有浮沙碎石，要小心跣腳。
(11) 飛鵝山頂無圍欄，無遮擋，勿走到山邊危險位置，易生意外。
(12) 飛鵝山路段有幾條路可以銜接，任君選擇，包括經百花林入口、經東山象山入口、經扎山道入口，又或經飛鵝山道自殺崖步行而至。
(13) 據Do姐於電台節目講過，飛鵝山路係影帝周潤發（發哥）不時行山或慢跑之路，想與發哥碰面不妨多多行山啊，但人哋始終跑緊步，都係唔好截停或騷擾佢啦！
飛鵝山
馬鞍山郊野公園南部 
24hours 
百花林
清水灣飛鵝山道 24hours
孫母墓
清水灣百花林路 24hours
亞洲電視公司總部
亞視西貢蠔涌舊電視廠
