1.5小時北區邊境遊！上水賞壯觀鳳眼藍花海穿越兩條河畔步道走訪古洞河上鄉人氣景點大水管/塱原濕地/博文學校打卡【2021賞花地圖】

[sig_post_pv label=””] 個人瀏覽過

適逢鳳眼藍季節，上次帶大家去咗新界元朗睇鳳眼藍，今次編輯再帶大家去香港嘅另一面—新界北睇鳳眼藍，無論你住東定西，一樣可以睇到鳳眼藍，而北區嘅鳳眼藍更靠近人氣景點大水管、塱原濕地。一條路線，穿過梧桐河、雙魚河，由虎地坳到古洞，未必一定要踩單車走超級單車路。從上水市中心起步，再返回上水市中心，點對點上水一日遊，1.5小時保證你行路都行得完（編按﹕唔計閣下打卡時間），路段全為平坦水泥路，值得拍拖兩個人週末閒遊。

每年5月，賞花地圖都會有鳳眼藍嘅蹤影，藍紫色嘅鳳眼藍，係本月嘅熱門花卉。一般鳳眼藍會於魚塘上生長，除咗元朗魚塘可以搵到鳳眼藍，上水亦有鳳眼藍嘅蹤影！比起元朗，出現於上水嘅鳳眼藍更值得去睇，位置絕對係人跡罕至，梧桐河畔近虎地㘭村，踩單車嘅人比較少，亦只有極少人釣魚、蹓狗、晨運、跑步，人數五隻手指數得完。

延伸閱讀﹕【2021賞花地圖】近期大熱！5月鳳眼藍季節元朗超大魚塘藍紫色花海限時賞花

鳳眼藍位置靠近上水梧桐河畔U型湖，只需沿梧桐河走向羅湖方向，不難發現鳳眼藍出現於你嘅右手邊。而鳳眼藍嘅最佳欣賞時間係朝早，黃昏時份會見到鳳眼藍愈來愈少，皆因鳳眼藍係一種「一日限定」嘅花卉。鳳眼藍開花時間為朝早，每日都會枯萎，只要有陽光就會重新開花，花期期間日日如是。只要於朝早觀賞鳳眼藍，特別係9至10點，12點前都會輕易發現滿目鳳眼藍，則可見魚塘內滿佈鳳眼藍，畫面壯觀，尤如置身日本富良野花田。

延伸閱讀﹕【2021賞花地圖】近期大熱！5月鳳眼藍季節元朗超大魚塘藍紫色花海限時賞花

睇完鳳眼藍，轉個彎行5至10分鐘，可以走向人氣景點大水管。梧桐河貫穿新界北，係北區邊界深圳河支流，英文有River Indus之稱，同印度河撞名，不過係由於河流由一名印度藉測量稱命名，測量師係英國租借新界後被派遣嘅一員。而附近嘅雙魚河、石上河亦分別叫River Beas、River Sutlej，同樣為印度名。沿梧桐河向北面走，背後係石湖墟，前面可以遠眺貌似近在咫尺嘅羅湖、深圳市，沿河岸堤道走可走到羅湖邊境，一個關口之隔，種種文化差異不勝枚舉，自由度亦迥然不同。

大水管近年成為人氣打卡景點，亦係河上鄉著名景點，近期亦係ViuTV熱門節目《ERROR自肥企画》嘅拍攝場地。一道道水管縱橫交錯，水管下為大草地，基本上大水管係依火車路軌而建，可輕易見到來往上水至羅湖嘅火車經過，的確充滿日系感覺。Google搜尋大水管會出現一堆「文青必影」、「文青景點」之類嘅結果，但事實上有幾多人知道大水管本身係咩用途？眾所週知，香港政府一直耗費大量公帑買大陸東江水，而大水管就係一道輸水管道，由鋼、或纖維製造，將東江水由深圳運到香港北區，再輸送到唔同水塘位置，為香港供應食水，然後大家又有理由去感謝黨。

延伸閱讀﹕文青感滿滿！西環小公園水管打卡神還原叮噹/多啦A夢場景

走過梧桐河至雙魚河交界嘅大水管，可輕易走陸路穿越梧桐河畔至雙魚河畔。而雙魚河係梧桐河支流，英文同印度比亞斯河撞名，附近石上河英文名亦同薩特萊傑河撞名，皆因同樣由該印度藉測量師命名。上水雙魚河環境恬靜，河水清澈，靚景處處，令人放鬆心情，似足日式鄉郊地方。

沿單車路走約15至20分鐘，會經過位於雙魚河上嘅河上鄉，有山有水，有幾分似台灣花蓮，村內最大特色係食豆腐花，但其實有另一間更值得留意嘅湖畔餐廳，屬可支持商家，小花園清幽恬靜，又有如泰國度假（編按﹕Like Facebook下次有介紹）。而村內更有唔少歷史古蹟，包括獲封為法定古蹟嘅居石侯公祠。

再穿過雙魚河，會走到近古洞嘅塱原濕地，擁逾400塊農田，內有種菜田、養殖魚塘，為全港最大農耕式淡水濕地，位置偏僻，遠離繁囂，原為一片淨土，可感受田野鄉間，呼吸清新空氣。上水鄉郊大自然風景怡人，綠草如茵，充滿鄉土風情，可以暫且逃離城市嘅壓力。入冬、初夏時份都會有唔少候鳥路經塱原濕地，故有「雀鳥天堂」之稱，但目前於行人路俯視，可見塱原濕地被圍封，變成地盤。翻查資料，政府將會以塱原濕地劃為佔地37公頃嘅自然生態公園，總價約3.24億元，工程發展由2019至2022，為期3年，曾被批評為破壞天然濕地，再改建人工濕地，政府此舉令人莫名其妙。

河岸風光如畫，鳥語花香，連接鄉間小路，藍天白雲時映照河道時，美景更難以形容。沿梧桐河走，會見到至少有30隻嘅黑色羊群散步、食草；而沿雙魚河走，則可見到至少10隻嘅啡色牛群散步、食草。新界郊野遠離市區，可輕易望見羊群、牛群，感覺唔似香港。雖然羊群並非純白色或米色，但仍有幾分似穿越台中清境農場。而附近建築物、人口唔密集，更有塱原濕地，大概可幻想吓自己身處台灣。

一直沿單車路走約15分鐘，直至見到一道藍色橋，可以轉入松柏塱村，村內有一間百年歷史嘅廢棄學校。荒廢嘅學校叫博文學校，靠近客家圍，原本由村民集資興建，1919年起由村內嘅鄉村私塾改為男女津貼小學，為全新界首間註冊學校，但已經停辦。博文學校屋頂寫有1962年，以中式建築設計，簡約樸素，屋頂蓋瓦，部份磚牆空心，有冬暖夏涼作用，校舍則被列為香港三級歷史建築。

E.A.Tips :

(1) 想慳錢可以由上水市中心起步，沿馬會道到文錦道路，到達梧桐河後，見梧桐河、文錦渡路橋，即可轉入小路，沿河邊走約5至10分鐘，會到達U型湖，鳳眼藍位置就靠近虎地坳小村落。

(2) 唔想行就可以於上水總站乘搭巴士路線73K，於鳳溪第一中學或虎地坳落車，前者向前行至梧桐河，後者折返梧桐河，沿小路直入。

(3) 鳳眼藍基本只有一日花期，每日開花，快速開花，同時快速凋謝，有陽光時又會重新生長。

(4) 上水北區馬會道、文錦道路都會比較多大貨車，路段較危險，必須要比平常更注意交通安全。

(5) 全段路程都係平坦石屎路，但到達鳳眼藍位置時，要小心唔好從小橋跌落水。

(6) 鳳眼藍魚塘無遮擋，陽光極猛烈，謹記做足防曬措施，同時預備防蚊用品，但唔好向花草噴蚊怕水。

(7) 勿丟石仔或垃圾到魚塘內，記得自己垃圾自己帶走。

(8) 鳳眼藍位置靠近小村落，記得要保持安靜，唔好騷擾附近村民。

(9) 賞花謹記眼看手勿動，唔好採摘花卉。

(10) 小貼士係朝早時間觀賞鳳眼藍會比較好，因為朝早陽光充足，而且鳳眼藍剛剛開花，會輕易影到鳳眼藍花海；反而黃昏時間會開始枯萎，鳳眼藍數目較少，只係配合夕陽光線會更靚。

(11) 大水管為人氣景點，人流比較多，打卡比較需要有技巧，而上落大水管時要特別小心，最好行返最安全嘅出入口。

(12) 跨過梧桐河就係大水管、古洞，而跨過雙魚河就係塱原濕地、博文學校。

(13) 小巴路線51K可以由上水市中心直接到達河上鄉鄉公所，車程約15分鐘，逆線走到大水管、虎地坳鳳眼藍位置亦可以。

(14) 大多數人都會由上水市中心步行到上水救護站，然後經博文學校、塱原濕地到大水管，不過編輯覺得要影最靚嘅鳳眼藍，應該先遊虎地坳，再遊大水管。

(15) 唔少人都會走上大水管打卡，但事實上有一定程度危險，絕對應該量力而為，唔建議企喺水管上打卡，識影相嘅話企平地都可以影到靚相。

(16) 眼見唔少人會偷雞走入塱原濕地，但其實目前係唔容許進入，所以為個人安全都係唔好俾位人入啦。

(17) 想再輕鬆啲，最好準備遮、帽等防曬用具，既可更舒服，亦可避免中暑。

(18) 上水祝運街盡頭係地盤位置，亦近上水屠房，唔可以穿過梧桐河，最好都係走大路，經文錦道路轉入小路，再步行到U型湖。

(19) 寶石湖邨有公眾停車場，有時租車位，可於上水停車場泊車，以步行為單車方式走過上述路線。

(20) 由博文學校返回寶石湖村只係約10分鐘，再折返上水廣場亦只需5至10分鐘。