【新年路線2024】山頂廣場起步！全新配水庫公園毗鄰薄扶林水塘山腳直達伯大尼教堂／薄扶林牧場

香港太平山山頂係眾所週知嘅熱門景點，亦係獲得世界三大夜景之一嘅地方，過百年歷史嘅盧吉道更可270度環迴俯視維港兩岸。而由山頂廣場出發，除咗西高山、龍虎山、薄扶林水塘等路線，亦有一道比較鮮為人知嘅山路，中途隱藏一個最近山頂嘅配水庫遊樂場，適合拍拖兩個人走一走。山腳終點更可直達IG打卡熱點伯大尼教堂及薄扶林牧場，今次路線與薄扶林水塘並無關係。

山頂盧吉道

乘搭巴士路線直達山頂廣場後，不妨先繞山頂盧吉道環迴步行徑走一圈，路面全為平路，屬BB車路線，方便熱身。盧吉道有大概3.5米長，而且有超過百年歷史，亦係舉世知名觀賞香港夜景嘅最佳位置。世界三大夜景名副其實，由中西區到對岸九龍半島，以至九龍東方向，維多利亞港及天際線通通一覽無遺。

盧吉道其實係同英國殖民時期香港第14任總督有關係，因為當時總督中文譯名為盧吉勳爵，其全名為Sir Frederick John Dealtry Lugard，在任年期由1907至1912年。而山頂盧吉道就係1913至1914年建成，郵政總局及高等法院等都係其建設及貢獻。

好多人走上山頂廣場，落山一係乘搭巴士，一係等候纜車。香港由治及興後，旅客又再增加，山頂經常逼爆人群，旅行團、自由行旅客擠滿整個廣場。瞄一瞄山頂纜車條人龍，有如玩貪食蛇，等候時間近乎1小時！

薄扶林郊野公園

走完盧吉棧道，折返山頂廣場，可直接向下行至薄扶林郊野公園。如果要經薄扶林水塘，可以沿薄扶林水塘道、貝璐道，接薄扶林家樂徑，走到底就係薄扶林水塘。

不過，今次編輯經薄扶林公園切入港島徑2後，穿過薄扶林二號食水配水庫及薄扶林三號配水庫，路線為通往置富花園及舊牛奶公司宿舍。更重要嘅係，中途會經過隱身於薄扶林郊野公園、距離太平山山頂最近嘅配水庫遊樂場！

該路線比走薄扶林水塘更可鳥瞰港島西風景，包括伯大尼修院、薄扶林牧場等，黃昏時份更可以居高臨下觀賞日落西山景色，週邊人群比山頂盧吉道稀少10倍。

薄扶林三號配水庫休憩處

薄扶林郊野公園有多條分岔路口，其中一條係走薄扶林水塘道，而重有一條係轉入港島徑第二段，穿過植林後，既能觀賞香港仔及鴨脷洲景緻，更可前往離山頂最接近嘅配水庫公園。

該配水庫遊樂場名為薄扶林三號配水庫休憩處，為配水庫上蓋平台，於2020年9月底先至正式開放。整個平台設施不多，基本上只係一個有少量草地嘅休憩地方，遮蔭地方唔多，亦無洗手間等設施。

通往配水庫上蓋公園嘅行人道清晰易走，雖然設施不多，但有唔少座位，地方亦有半個足球場左右size。地理位置上，一方面係距離山頂廣場最接近嘅配水庫遊樂場，另一方面亦係山腳置富花園後山，亦近青春徑、薄扶林村及薄扶林花園，兩端分別大概走20分鐘即可到達。

伯大尼小教堂

近年不知不覺為成IG打卡位嘅伯大尼小教堂，亦伯大尼修院或伯大尼教堂，位於此路線山腳，從配水庫休憩處山路附近能從高空俯瞰整座伯大尼教堂，純白建築加上新哥德式風格設計，異國風造型極吸睛。

事實上，伯大尼修院有超過130年歷史，原先係傳教會士休養之地，皆因伯大尼修院係由法國巴黎外方傳道會興建，並於1875年左右建成，主要目的係讓患上熱帶疾病嘅傳教士有一個地方休養。整座修院基本上分成3部份，分別係小教堂、療養院及僱工區，但現時多數雖然可以進入教堂週邊，但大多數都係唔俾遊人進入。

伯大尼修院於2013年已被列為法定古蹟，建築物最大特色在於全港唯一採用新哥德式風格嘅教堂，無論外廊、拱柱遊廊、金字形屋頂，抑或係純白色主調牆身及扶欄，以及彩繪玻璃窗、教堂祭壇等，獨特設計滿滿異國風。

而該小教堂於1875年至1974年一直關閉，直到1978年被政府接管，其後曾租予香港大學使用至1997年，後來早於2006年起又被香港演藝學院租用作電影電視學系校舍。

薄鳧林牧場

毗連伯大尼小教堂為薄鳧林牧場，又名薄扶林牧場，只係以古字薄鳧林命名。牧場由2022年4月起開放，活化工程後，更設有導賞團，想要參觀最好事前預約。若無預約，只能於週邊走走，不過隱藏小角落為觀賞夕陽西下嘅好地方。

好多人見薄扶林牧場一詞，都誤以為真係一個有牧牛、放羊嘅牧場，但細心一想，香港有幾多牧牛、放羊嘅地方？而且，整個薄扶林牧場地方有限，幾乎一眼睇晒，旁邊伯大尼修院面積隨時更大。

薄扶林牧場只有一間賣pizza嘅食店，亦可預約參加工作坊。而牧場前身其實係一座於1887年建成嘅英式建築，當中有通風兼防潮嘅牛眼窗，亦有粉藍色門窗、花崗岩石牆、拱頂石等。若然有記憶，自然會記得係過百年歷史嘅舊牛奶公司高級職員宿舍，又名「寶馬」（Braemar），並於2009年獲評為香港一級歷史建築物。

如果無預約唔緊要，於週邊先由走一圈亦無不可，牧場有一道小橋，一隅為觀賞黃昏日落嘅好地方，拍得住旁邊伯大尼小教堂，景色優美。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 於中環交易廣場乘搭巴士路線15,X15,4,30X,91,94號、小巴路線22,22X，都能直達山頂廣場，旁邊就係薄扶林郊野公園路線。

❷ 薄扶林道有巴士路線22X, 94, 970, 970X, 973，可以往返中環等地，甚至直達九龍區。

❸ 保護歷史建築物，唔好作任何破壞。自己垃圾要自己帶走。

❹ 伯大尼修院僅開放星期六及日。

❺ 行山要保持安靜，都郊野係為咗戶外環境，唔係為咗聽人聲。配水庫嚴禁攜犬入內。

❻ 伯大尼小教堂唔需要係教徒都可以結婚行禮，有關租用場地資訊請查詢香港演藝學院官方網站。

❼ 有關舊牛奶公司高級職員宿舍「薄鳧林牧場」資訊，請參閱官方網站。