上環愛麗絲城堡花園旁尋逾百年殖民時代建築 醫學博物館連中藥園尋寶 紅磚牆小巷穿越澳門巷弄

[sig_post_pv label=””] 個人瀏覽過





港島未有九龍區如此密集,尤其係中西區,上環就係一個好地方,一方面隱藏唔少高水準小店,另一方面大多數角落都有異國感,影相位亦比比皆是,係拍拖兩個人散步好去處之一。

上環近半山位置有一座座紅磚牆建築,歷史悠久嘅同時亦建築獨特,當中位處小巷內就有一座從樹叢間透視嘅建築物,係一座以英國愛德華風格設計嘅建築物,走廊、窗戶都好寬廣,有別於香港密不透風嘅「屏風樓」建築物,不過從戶外可見有中式簷瓦屋頂,有糅(音﹕柚)合中西文化嘅感覺,滿滿殖民地時代建築風格。

原來呢座如此獨特嘅建築物係一座醫學博物館,前身係香港細菌學檢驗所,曾一度應付1894年由廣東傳來嘅鼠疫,後來叫香港病理檢驗所,有近120年歷史,現時係香港法定古蹟,仍然用作保存本地醫學文物,室內有眾多本地醫科學術歷史,亦有近年病毒介紹,由1996年重新開放至今。

而除咗室內三層樓高嘅博物館,室外亦有免費參觀嘅中藥園,小花園內不時有小蝴蝶飛舞,內有大量中草藥,當中有好多品種保證你未聽過。



從戶外觀察,博物館擁有殖民時代歷史建築,每一面由紅磚堆砌牆身,復古設計中滲出陣陣優雅感,加上環境恬靜悠然。博物館後門靠近堅巷花園、卜公花園,小巷有葡式風格,有如一秒閃現澳門街頭巷尾。

拾級而上,可以找尋博物館旁邊嘅小秘地,雖然堅巷花園只係一個遊樂場,但亦可以係打卡位。遊樂場內擁紅白相間小城堡、水池,發揮吓幻想力,會發現場景有如走入《愛麗絲夢遊仙境》(Alice’s Adventures in Wonderland)內嘅畫面。

事實上,堅巷花園建於90年代初,名副其實位處堅道(Caine Lane),靠近香港醫學博物館,而位置靠迎半山,人流比較稀少。位置前物為督察宿舍,曾為香港大學法律系系址,最終改為小花園。花園內種有棕櫚樹,感覺悠閒,公園內有一個個綠色尖頂小城堡,似足積木堆砌而成,而洗手間更以每格大小相同紅白小格砌成,狀似細個玩嘅扭計骰,充滿魔幻感,相當有趣。

離香港醫學博物館只得約4分鐘步程嘅見山書店,係上環區內一個神秘角落,兩層高黑白洋房內擁有大量本土書籍,門口更寫明「Ideas are Bulletproof.」,明就會明。

延伸閱讀﹕離文武廟僅3分鐘!上環日系書店自成一角 本土書海淹沒兩層獨立洋房


E.A.Tips :

(1) 香港醫學博物館位於堅道及樓梯街交界。

(2) 留意博物館開放時間,逢星期一休息,逢星期二至六為10:00至17:00,而逢星期日及公眾假期則為13:00至17:00。

(3) 博物館室內入場費為$20/位,而只係睇中草藥園同戶外紅磚牆就免費入場。

(4) 留意香港醫學博物館前門為上環堅巷,而後門則為上環普慶坊。


(5) 堅巷花園位處香港醫學博物館之上,不過如果香港醫學博物館關門時,兩者係唔可以直通。


(6) 堅巷花園內有洗手間,位置於紅白色扭計骰內。

(7) 可乘搭中環扶手電梯上半山,然後步行到上環;更方便嘅係直接乘搭巴士到樓梯街,即堅道,可以直接到達堅巷花園、香港醫學博物館。


香港醫學博物館

香港上環半山堅巷2號
10:00–17:00,星期一休息
2549 5123

堅巷花園

半山堅巷2號
07:00–23:00
22853 2684

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!