[sig_post_pv label=””] 個人瀏覽過
大角嘴有一間單靠餃子已經大受街坊歡迎嘅小店，小店由年輕人傳承舊店山東老闆娘手藝，以山東餃子為主打，編輯當日所見，每隔幾分鐘就有人叫堂食或外賣餃子，當中以烏黢黢嘅墨魚荸薺餃最搶手，而每隻都好飽滿，餡料新鮮又有咬口，的確係值得拍拖兩個人去試一試。
室內呈長形，座位數目唔算太多，但仍可容納十幾人，小店開宗明義以山東餃子為主打，餐牌亦寫明以香港首創墨魚水餃作賣點，牆身更寫有墨魚汁嘅功效。無論湯餃定煎餃，都受到街坊歡迎。
除咗餃子，爆汁嘅京蔥羊肉餡餅、黑糖黑醋排骨菜飯、豬扒擔擔麵都係招牌菜式，當中豬扒擔擔麵$52，每碗有兩塊豬扒，質感唔太軟腍，但炸成金黃色嘅豬扒就好香口，浸於湯底內亦未有將表皮瞬間浸軟，擔擔麵亦不過不失，略嫌上海麵麵底未夠細滑，唔太突出。而湯底則好重花生香味，但蒜末、蔥花、肉末、紅辣椒油等擔擔麵配料就比較少，欠缺少少麻辣鮮香感。
酸辣湯墨魚荸薺餃$59，一碗有8隻餃子，最大特色係餃子皮改為以墨魚汁製作，令粒粒餃子都變成烏黑色，餃子皮厚薄適中，唔易穿透，入口煙韌，餡料新鮮而飽滿，隻隻脹卜卜，夠足料，有層次感亦有咬口。以墨魚滑混入荸薺粒，質感比一般豬肉餃子軟腍，啖啖爽口彈牙，略略有鮮甜味。
餃子配上同樣為北方味道嘅酸辣湯，亦好配合，酸辣湯夠大碗，酸度適中，辛辣度僅為微辣，容易入口，內餡有豆腐絲、木耳絲、冬菇絲、辣椒、筍絲等酸辣湯材料，但餃子配搭清啲嘅湯會更突出。
自製豆漿$8 濃而不甜，甜度適中，有豆味，而自製山渣茶$8 酸味比較重，酸甜味幾消滯，每杯都夠冰涼，夠解渴。
E.A.Tips﹕
(1) 餃子可以堂食或外賣，亦可以要未煮嘅生餃子，返屋企再煮熟都得。
(2) 以為得8隻餃子無麵底或飯底到肚，會唔夠飽，其實食完都已經有飽肚感。
(3) 小店無加一服務費，先用餐，後俾錢。
山東小城
大角嘴埃華街101號大衛樓地下A1號舖 
11:30 – 22:00 
9296 3884
在〈大角嘴迷你山東小城賣餃子 烏黢黢墨魚荸薺餃隻隻新鮮脹卜卜〉中有 1 則留言
留言功能已關閉。