【台灣偽旅行】尋港版高美濕地/孤獨海島 穿梭平溪路軌打卡 歎地道台式蛋餅+逢甲鹹酥雞

[sig_post_pv label=””] 個人瀏覽過





現時要近近哋去台灣旅行亦非易事,兩個人惦記台灣就只能夠靠本地遊,拍拖找尋各種台式產物,以慰空虛心靈。今次由九龍行到新界,從觀塘走到大埔,嘗試找尋充滿台灣特色嘅景點、美食。

(1)觀塘﹕小伊甸

位於觀塘工業區內嘅小伊甸,為一間台式餐廳,主打各種台灣美食,如肉燥飯、鹽酥雞,茶飲有珍珠奶茶、冬瓜茶等。以台式美食嚟講,比較特別嘅係寶島蛋餅,並非每間本地台式餐廳有,蛋餅包裹餡料後更飽滿,帶有鹹味,整體確實有台灣早餐店感覺。

延伸閱讀﹕觀塘工廈小確幸 台式餐廳小伊甸下午茶低至$35

(2)大埔﹕香港鐵路博物館

香港人前往台北嘅話,大多數會選擇去一趟平溪鐵路一日遊,尤其係平溪站、十分站、菁桐站,一邊行吓火車軌,另一邊去放天燈許願。而乘搭巴士路線74X可以由觀塘直達大埔市中心,於廣福道落車後,步行約5分鐘就抵達充滿懷舊味道嘅鐵路博物館,館內雖然記載嘅係本地鐵路歷史,但戶外位置有舊式火車、鐵路路軌,有如台北平溪支線嘅鐵路,於路軌上打卡,可以幻想自己正處於台北平溪站。

延伸閱讀﹕大埔鐵路博物館 懷舊火車打卡一流

(3)大埔﹕元洲仔

由鐵路博物館步行約15至20分鐘,即到達大埔元洲仔公園,公園附近有一個鮮為人知嘅孤獨海島,前臨吐露港,內有紅樹林生態、法定古蹟、直昇機停機坪等,感覺遠離繁囂,狀似台灣一個平靜海島。

延伸閱讀﹕大埔元洲仔神秘海岸生態遊 孤獨海島藏古蹟紅樹林望吐露港 度假風藍色小屋/停機坪打卡

(4)烏溪沙﹕泥涌

再乘搭小巴路線26號到馬鞍山,再轉乘巴士路線99號或小巴路線807B,黃昏時份可以去到烏溪沙泥涌。泥涌石灘係以濕地、天空之鏡聞名嘅打卡勝地,淺水泥灘上更有各種紅樹林、生物,有如台中高美濕地。事有湊巧,高美濕地、泥涌石灘皆為淺水泥灘、海岸濕地,亦為觀賞日落嘅好地方,甚有詩情畫意。

延伸閱讀﹕1小時穿梭北港古道連綿竹林 茅坪古道尋樹藤皇梅大石澗 烏溪沙泥涌石灘驚變綠洲

(5)觀塘﹕哈豆

最後乘搭巴士路線299X到沙田市中心,再轉乘巴士路線80X或89B,可以折返觀塘區。另一間位於觀塘工廈內嘅小店哈豆,亦係有水準嘅台式餐廳,菜式如肉燥飯、乾拌麵、逢甲鹹酥雞、滷水拼盤等都為著名台式美食,正好為台灣偽旅行一日遊作結。

延伸閱讀﹕抗疫小店隱藏觀塘工廈 炮製超正宗台灣菜



Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!