青馬橋底睇日落!青衣西草灣賞景打卡秘地 細山步行徑近三支香談心好地方

[sig_post_pv label=””] 個人瀏覽過





想輕輕鬆鬆拍拖影吓相、睇日落,又嫌地方太多人?其實香港重有好多靚景而人少嘅地方,今次編輯帶大家去青馬大橋底,既可以影石灘日景,亦可以近距離影青馬大橋,更可以影橋底日落景、晚霞景,夜幕低垂甚至可以影吓夜景,日夜景皆宜,加上位置只有少數釣魚客,環境恬靜悠然,可以吹吓海風、聽吓海浪聲、談吓心,有時間更可以行吓市區小山,嘗試吓僅屬於兩個人嘅一日遊。

位置為青衣茜草灣,係最接近青馬大橋橋底嘅地方,落車步行而至完全零難度。西草灣原本叫茜草灣,以茜草命名,明朝就有茜草灣之戰,海戰事件發生之處就係大嶼山茜草灣,只係現時通用叫西草灣,Google地圖亦稱之為西草灣,編輯為咗多啲人Search到,以下都稱為西草灣。青衣西草灣靠近青衣西面,大多為工業地帶,以船塢、油庫為主,例如蜆殼油庫、加德士油庫、香港聯合船塢、友聯船廠,如果唔揸車,就只有一條公共交通工具路線可以抵達。

青馬大橋本身係一道全球跨度最長行車鐵路雙用懸索吊橋,連接馬灣、青衣,一度為唯一連接赤鱲角香港國際機場、大嶼山嘅通道,直至屯赤隧道通車,而青馬大橋曾於1999年獲美國建築界選為二十世紀十大建築成就獎」。

由西草灣船塢總站落車,即會見到香港聯合船塢集團有限公司,向右行到私家車停車位,然後前行至盡頭,沿左邊道路走,馬上可仰望青馬大橋。由停車場直行到末端聯合船塢車閘口,會見到有看更亭,但唔需要進入,只需要留意右邊小路口,小路左邊有圍板圍封,但唔算太狹窄。穿過小路口後1至2分鐘,會見到右邊有一缺口,入口地下遍佈垃圾,穿越路口可以到達一片草地,而草叢之上就係青馬大橋底部。由草叢位置繼續前行則可以行到更盡頭石灘方向,可以於底部拍攝橋底風景。

西草灣係攝影絕佳取景地點,一來可近距離影青馬大橋,二來橋底有草叢、石灘,三來人流極少,毋須怕有人行過阻礙拍攝。從橋底拍攝,仰視感有別於一般山上俯視,比如附近嘅青衣青欣山,西草灣仰視大橋相對較為霸氣。

延伸閱讀﹕兩條路線望青馬大橋!青衣自然徑放眼橋面vs西草灣窺探橋底風景

從西草灣折返,可以於青衣美景花園落車,步行1分鐘就可以到達青衣細山步行徑其中一個入口,細山位處西草灣東面,靠近最出名嘅三支香。而沿細山步行徑走,有時間可以接連遊走青衣山三支香,即三座高度不一嘅北峰、中峰、南峰。



細山地方唔大,而人流亦極少,編輯當日行到標高柱都未有見到一個人,直到落山折返配水庫旁嘅遊樂場,加上沿途有唔少座椅、涼亭,絕對係情侶們談心好地方。逐級而上,會發現細山難度極低,僅似平時上配水庫嘅高度,走完梯級,會見到一個淺綠色涼亭,會發現對面小山有唔少豪宅山墳。再沿右邊唯一路段走,可以去到另一個涼亭,內有青康路山頂休憩處,直到此處先有分岔路。而從細山觀望,景觀唔算太廣闊,可望藍澄灣,眺望藍巴勒海峽、維多利亞港,亦可見少少九龍風景。

分岔路一邊可連接三支香,望昂船洲大橋、太平山方向,另一邊則可隨時落山,返回配水庫方向,選擇配水庫方向可以走上標高柱,不過標高柱位置四面風景全部被遮蔽。只有繼續向下行,風景先較為明顯而無遮擋,沿青衣細山步行徑前行至青衣東二號食水配水庫,會發現配水庫對上有青康路遊樂場,內有兩個硬地足球場,為配水庫上蓋遊樂場,以附近青康路命名,同其他配水庫遊樂場相比係比較罕見以街道命名。青衣唔止有青衣東海水配水庫,青衣東一個配水庫於1980年興建,而另一個配水庫則於1999年興建,以應付人口增加等問題。

落山步行至青康邨,穿過屋邨一直步行至青衣商場方向,會發現一座好有時尚感嘅教堂。呢座聖多默宗徒堂為天主教教堂,建築比較現代化,全幢設計呈垂直向上姿態,合共六層高,有別於歐洲教堂。教堂以磚、光面混凝土舖砌,門口有中式風格,而教堂頂端亦有鐘樓、十字架,塔形設計鮮明,室內則有聖母像、祭台、聖水池、玻璃壁畫,一端更有大面落地大玻璃,採光十足,整個設計風格獨特。


E.A.Tips :

(1) 建議由葵芳巴士總站起步,乘搭小巴路線88M,一定有位,前往船塢總站,車程約15至20分鐘,回程時需要原路折返,於船塢總站上車,但可選擇青衣或葵芳落車。小巴20:00前都定時有班次,但20:30班次就比較疏落,要等候約1小時。

(2) 到達西草灣船塢總站後,落車會即時見到香港聯合船塢集團有限公司,只需向右行,前往一般私家車停車位方向,前行至盡頭會見到左邊有條路,仰望可見青馬大橋近在咫尺,不過路面不時有大貨車,要小心個人安全。

(3) 由停車場直行到末端聯合船塢車閘口,有看更亭,留意右邊有一道貌似好狹窄嘅小路口,左邊為聯合船塢車閘口,有圍板圍封,小路唔算太狹隘,兩個人絕對可容納到。穿過之後會見到右邊有一缺口,入口地下遍佈垃圾,穿越路口可以到達一片草地,而草叢之上就係青馬大橋底部。

(4) 由草叢位置繼續前行則可以行到更盡頭石灘方向,可以於底部拍攝橋底風景。

(5) 西草灣人流唔多,大多為釣魚客,而西草灣位處西面,亦有少數攝影發燒友專程前往拍攝日落景。

(6) 西草灣石灘附近石壆較狹窄,要小心安全。

(7) 盡量入夜之前離開,皆因毫無街燈,而且交通不便,最好帶定手電筒或頭燈。

(8) 西草灣橋底有草叢,最好穿著長褲,勿穿著露趾鞋。

(9) 西草灣無洗手間,最好上車前先方便。

(10) 帶備足夠糧水,謹記自己垃圾自己帶走。

(11) 前往細山可由美景花園起步,西草灣總站嘅88M亦可到達,另有巴士路線42,42A,42C,43,249M可前往美景花園,落車後繼續前行,1分鐘後即到達青衣細山徑入口位置。

(12) 細山徑路段較短,只有少量梯級,樹蔭多,難度唔高,但分支多,入口亦多,可以自由選擇。

(13) 巴士路線249M, 42, 42A, 43A, 43C, 88D, A32, X42C皆可到達青衣東二號食水配水庫,位置靠近細山徑。

(14) 巴士路線409K, 409S, 41, 413, 41A, 49X, 88可以到達聖多默宗徒堂,而教堂每日朝早都有幾次主日彌撒。

(15) 留意「茜」應該係讀「善」,而唔係「西」,好多人讀嘅字未必係正確。


(16) 最好預先上天文台網站查看日落時間。


(17) 如果想睇日落,建議先遊細山,再入西草灣;如果純粹影日光時間,就先遊西草灣,再遊細山,返回市區就更方便。


(18) 配水庫旁邊有洗手間,離山腳青康邨唔太遠。


西草灣

青衣西草灣道
24hours

細山

新界青衣島東部
24hours

青衣東二號食水配水庫

青衣

聖多默宗徒堂

青衣青綠街5號

2432 2933

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!