【區區有小店】大角嘴5間隱藏版丼飯專門店外賣堂食任君選擇

想食丼飯？唔一定要尋求熱門嘅丼飯專門店，有時候愈簡單反而愈有水準，單單一個大角嘴小區，已經隱藏咗5間丼飯專門店，不過係小店，值得拍拖兩個人去逐間試一試！

（1）御守壽司

只有外賣便當供應嘅御守壽司，同茶飲店茶星人共用一個舖位，店內出品嘅便當丼飯係5間當中美觀度最高嘅一間，簡直神複製日本新幹線外賣便當，心思十足。飯盒最大特色重有配上日本神社嘅護身符，貓味造型紙袋更可愛非常。每一份由$58至$128不等，無論飯量定魚生量都相當充足，刺身厚肉而無雪味，保持鮮美，甚為難得。

延伸閱讀﹕大角嘴限定店！超抵食外賣壽司便當連本土御守賣相精緻盒盒IG-able

（2）築匠

步行向新九龍廣場方向，會見到一間日式料理店，主打海鮮丼飯，套餐附送日式餐湯、沙律，價錢由$58至$98，竟然唔過$100！飯量適中，而刺身亦夠新鮮，厚薄同樣適中，肥美而鮮甜。餐枱上更可見到一板馬糞海膽價錢唔貴，特價只需$98，果然係街坊價。

延伸閱讀﹕大角嘴街坊價日式料理心思爆滿海鮮丼飯

（3）小島料理KOJIMA

前往櫸樹街，可見另一間主打沖繩風格丼飯嘅小島料理，屬微舖形式，只有幾個座位，菜式亦只有5款可擇，當中3款為限量款式，而其中2款牛丼則分為小盛、並盛、大盛，價錢由$55至$110不等。飯量雖然不變，但小盛、並盛、大盛嘅肉量就有分別，每一種加約3成肉量。

延伸閱讀﹕每日只做5款主食！大角嘴商場限量日本牛丼沖繩小島料理心機爆滿

（4）丼一日式燒肉丼

步向大角嘴市中心，可以找尋一間比較新嘅丼飯專門店，並非只有大角嘴分店，荃灣、葵涌皆有分店，同樣為新店。店內以日式燒肉丼飯為主打，最特別之處係外賣更抵食，二人餐$99，包括兩款丼飯，而且附送兩杯飲品，更可選擇特飲。當中燒牛肉飯係必試之選，其中一款係芝士燒牛肉飯$56，白飯不過不失，但牛肉則有水準，表面舖有芝士，略帶有芝士香，燒過後嘅牛肉並唔乾身，反而有油香，而且有肉汁，加上燒汁更滋味。

延伸閱讀﹕大角嘴全新日式燒肉丼飯兩人最平$99埋單！

（5）千の味刺身壽司專門店

而同一條街道上，就有呢間連鎖店，以日式料理丼飯、刺身壽司為主，大埔、大圍、荔枝角、長沙灣、大角嘴皆有分店，套餐配有麵豉湯或飲品，丼飯由$40至$178不等，價錢亦唔算太貴。當中四色丼$65，每件刺身都分配有兩件，其實喺刺身同丼飯上，係一間無咩驚喜同無乜特別嘅專門店。比較特別嘅係芥末並非平常坊間嘅芥末，唔會只有嗆鼻，加上同時配有丼飯豉油、壽司豉油，反而比較驚喜。

延伸閱讀﹕大角嘴街坊刺身壽司專門店丼飯全日供應最平$40