[sig_post_pv label=””] 個人瀏覽過
季夏來臨，天清氣朗，又係時候出海玩玩水，西貢變成熱門地點，最近西貢有一間全新開業嘅小食店「牛牛」，顧名思義以牛肉為主題，每款小食都有特色，而且有水準，除咗食街小巷，各位「牛魔王」情侶們一定要試試呢間新店呀！
店內裝潢簡單中帶有特色，最吸睛嘅地方莫過於一個由方形磚石舖砌嘅西貢地下鐵牆身，磚牆上更寫有「西貢」，似足西貢鐵路站，絕對可以拍拖兩個人去打卡！
牛肉小食當中有牛肉、牛脷、牛頰肉，當中招牌包系列就有香濃黑椒牛脷包$35、招牌沙嗲牛肉包$28，而沙嗲牛肉包為牛肉夾包，以長麵包配沙嗲牛肉，麵包軟熟，表皮略有烤焗感，倘若香脆啲就更好。牛肉內餡好軟腍，無乜筋位，配搭沙嗲醬汁後，有香濃沙嗲味，但唔會過於濃烈同太搶味，少少沙嗲味甚至滲透麵包內，而唔會令麵包過於濕潤。
餐點有6至8款飯、意粉，當中香濃沙嗲牛肉麵$38，另可選擇牛脷、牛頰肉，麵底亦有湯麵、撈麵、酥脆炸麵可擇，當中編輯揀咗兩款，一款係沙嗲牛肉撈麵，鮮牛肉嫩滑，有啖啖洋蔥香，配搭濃稠沙嗲汁更香口。而另一款係沙嗲牛肉配酥脆炸麵，更加有驚喜，炸麵底香脆而唔太乾身，配搭沙嗲醬汁同牛肉後，有舊時酒樓食嘅炸麵感覺，炸麵唔會太快被醬汁浸軟，入口同時有沙嗲味同脆感。
Shake Shake薯條$22，調味粉有日式海苔（寫有海苔）、四川麻辣（寫有麻辣）、印第安燒烤（寫有BBQ）、蕃茄、蜜糖芥末口味，份量同口味都可以自由調配，海苔口味非常配合薯條，香脆口感配搭調味粉，自由搖晃後的確神還原港版金拱門當年嘅Shake Shake薯條，而BBQ有微微辛辣味，較甜辣，麻辣口味則麻中有香辣，唔算太辣，可以入口。除咗薯條，重有Shake Shake雞翼尖、Shake Shake瑞士雞翼，其他小食則有流心鹹蛋黃系列，包括薯條、魚皮、爆汁雞翼，任君選擇。
E.A.Tips﹕
(1) 小店離西貢小巴總站只係1分鐘步程。
(2) 店內有少量堂食座位，但多數都係外賣自取。
(3) 非常接近西貢碼頭，適合夏天出海玩水前醫吓肚。
(4) 「牛牛」舖位前身為「嫦餐」。
(5) 店內只有簡單紙包、罐裝飲品。
(6) Shake Shake調味粉放置於餐枱上，可自由加配。
牛牛 NgauNgau
西貢福民路58號高富樓A座地下32號舖 / G/F, no 32, Ko Fu House, Fuk Man Rd, Sai Kung 
星期一全日休息、星期二至日12:00 – 20:00 
4611 6216
在〈西貢驚現地下鐵路站！全新牛肉小食店毗鄰碼頭 驚喜酥脆炸麵+5款口味Shake Shake薯條〉中有 1 則留言
留言功能已關閉。