直擊大渣哥茶記做足抗疫措施限聚令下極守規仍被重複查驗？

最「黃」食店之一、由真港姐冠軍譚小環姐姐有份開嘅渣哥小食店喺2月正式開設茶餐廳，即使多次同香港人一齊經歷風雨，最近武漢肺炎又喺社區爆發，大渣哥茶記仍然係一間排隊店。疫症肆虐，街上人流少咗，小編反而先有機會試試呢間排隊店，順便作直擊報道。

雖然香港政府實施難以實際遵從嘅限聚令，加上香港警察有一把相當奇怪嘅毅進尺，但食店仍然依法守規。不過，有網民發現大渣哥茶記被多次查驗，疑有針對成份。據記者觀察，由門口排隊入座起，兩個人或四個人一組，既自行封關只招待香港人，亦使用紅外線感應器為每位客人量度體溫，同時要求客人涉高衫袖，確保客人雙手無戴有隔離令嘅手帶，遵守規則之餘，抗疫功夫亦做足。

入座後，可以睇到每張枱之間本身都有距離，絕對有1.5米之距，同時只坐4位客人，遵守限聚令。店內注重衛生，餐具每次由侍應遞上，無擺喺餐枱上，亦設有消毒洗手液供顧客使用，而店內客人喺餐前餐後都有佩戴口罩，相當合作。記者聽到鄰座有茶客提及，當日見到朝早經過見到有香港警察直踩現場查驗餐廳係咪合限聚令規格，到中午後又見到有香港警察到餐廳重複查驗，似乎特別關心大渣哥茶記食客嘅安全。

室內裝潢既有一點懷舊色彩，又有現代風格，面積寬廣，光線充足，餐牌盡顯香港味，有啲名亦幾有創意，例如All Day Breakfast等於柯Day壁佛士，香港人先明白。

據聞呢間食店必點嘅係香滑奶茶，不過小編試咗同樣香滑嘅茶走，茶味香濃，奶味充足，入口亦滑溜。肚餓不妨直接叫個自由西餐，有豬、牛、雞任揀，可配飯、意粉、薯菜，意粉質感爽口彈牙，並唔係普通茶記求其兜埋嘅軟淋淋意粉，亦有多款醬汁可擇，仲有一款配料可以揀，值得推介係煎蛋，雞蛋要煎得靚先可以做到呢種蛋黃、蛋白兩者完整分離嘅情況。

幻彩詠西多係一個好吸睛嘅小食，顏色鮮艷，拍拖打卡都好適合。小食改良自法蘭西多士，同樣炸成金黃色，放有一片牛油，將彩虹朱古力碎灑落法蘭西多士之上，再淋上西多極少配搭嘅自選士多啤梨醬，以士多啤梨醬取代平時嘅糖漿，果醬無糖漿咁甜，西多中間餡料更有花生醬。金黃色嘅西多士厚度充足，入口有士多啤梨香甜味，朱古力碎有輕脆感，仲有啖啖花生香味夾雜西多內，層次極豐富。