彩虹係通往西貢一段必經之路，曾經試過於彩虹搵食嘅你，應該明白區內同路人小店幾乎係零，但細心之下就會發現區內有一間以售賣懷舊狗仔粉為主嘅小店，由中年女士開設，值得拍拖兩個人去支持，絕對係區內嘅One And Only！
手持彩虹區內嘅外賣，可以步行到一個上年尾新開嘅啟德大道公園，靠近啟晴邨，正對新蒲崗，旁邊有位於舊機場北停機坪嘅啟德車站廣場一期。公園內有露天廣場同大草坪，現時已經開放，面積唔算好大，但都算適合野餐、休憩，不過附近左右兩旁都係地盤，不時有小昆蟲出沒，野餐要比較小心。
食過狗仔粉會明白狗仔粉係50至60年代嘅懷舊小食，由於麵條狀似狗尾巴，所以就被坊間稱為狗仔粉。而傳統狗仔粉一般會配合唔同配料，例如肉絲、菜脯、冬菇、蝦米等，再加入湯底同麵條，撈勻即成一碗家庭式狗仔粉。
店內招牌之作係鮮味狗仔粉$30，一碗份量適中，無多無少，紙碗係獨有，而非發泡膠碗，洗乾淨可以當廢紙回收。狗仔粉配料新鮮，肉絲、菜脯粒、冬菇絲、瑤柱碎、蝦米等都充足；麵條亦粗幼適中，長短亦恰好，入口偏軟腍，係欠缺少少嚼勁；湯底濃稠，呈乳白色，略有漿口，似傳統嘅腍糊狀，湯頭有鮮味，而且係少少海鮮嘅味，似蜆肉，濃甜得宜；加上少少辣椒粉帶出嘅辛辣味，幾醒胃。
除咗狗仔粉，店內另一特色係以自家製蔥油為主嘅碟頭飯、拌麵，加上辣椒醬會更惹味。蔥油包含青蔥、乾蔥、紅蔥頭，相當香口，據悉重有一款叫炸蔥酥，編輯本來都未聽過。蔥油撈飯或蔥油拌麵同樣香氣四溢，可以配搭唔同配料，今次主體反而唔重要，的確配乜都得啦。
小店其實於2020年中先開業，由中年女士打骰，客人大多數為附近街坊，師奶嘅手勢絕對不容置疑，店內有唔少店主家鄉之作，例如家鄉炒米粉。
E.A.Tips :
❷ 留意店舖會不定期休息，一般會係星期日或星期一。
❸ 辛辣味其實係來自辣菜脯，可以自由選擇多辣、少辣、唔辣。
❹ 啟德大道公園有兩條路線可以抵達，一係由采頤花園前往東啟德遊樂場，經過景泰苑，步行上迴旋處後面新天橋，一直沿舊啟德方向走，對面為啟晴邨，旁邊就係啟德大道公園。亦可以從新蒲崗Mikiki商場起步，經商場天桶過對面，可見譽港灣太子道東巴士站，於迴旋處轉左切入小路，沿路直入就會到達啟德大道公園。
❺ 野餐時，自己垃圾謹記自己帶走！
❻ 野餐要盡量使用可循環再用之餐具器皿。
❼ 可以挑選有長櫈嘅地方，會較方便。
❽ 有需要可自備小餐枱、小型露營櫈用餐，可以隨時去到邊食到邊。
❾ 野餐時正對海景用餐會比較Chill。
❿ 最好挑選較少人嘅地方，避免接觸人群。
⓫ 野餐地同食肆最好距離不足15分鐘步程，以免食物及熱飲冷卻，有需要就自備保溫袋。狗，只要唔挑釁，基本上可安全渡過。
喜家狗仔粉
彩虹彩虹道242號采頤花園地下322號舖
星期一全日休息、
星期二至日11:30 – 20:45
3611 5809
啟德大道公園
啟德市中心
24hours
采頤花園至啟德大道公園﹕
Mikiki至啟德大道公園﹕