【區區有小店】大角嘴3間小店掀結業潮！走肉．朋友宣佈2月底最後營業 $68素食Buffet不再

2022年剛開始，政府又再擴大疫苗氣泡，下月24號起，凡進入食肆嘅客人必須接種疫苗，大角嘴區內於1月中已掀起食店結業潮，先係韓式外賣店，其後係丼飯店、素食店，接二連三宣佈結束營業，其中一間更加係以$68素食自助餐聞名嘅走肉．朋友，拍拖兩個人以後搵食變得更艱難啦！

近日，人氣甚高嘅素食Buffet店走肉．朋友正式宣佈只會營業至2月24號，並向客人暗示無奈結業原因，疑似同政府以疫情為由停食店晚市同必須打針先可以堂食有關，翻查資料，其實今個月同區已經有另外2間食店已宣佈結業，如果想做Last Minute人，就要把握Last Chance去食啦！

（1）走肉．朋友

據走肉 ‧ 朋友於Facebook 顯示，官方於近日正式宣佈只會營業至今年2月24號，其後將結束營業，留言「原因相信大家都知道」，字裏行間暗示結業原因來自該天政府擴大疫苗氣泡，並逼使所有進入食肆嘅食客都必須接種疫苗有關。官方稱歡迎客人影相留念，更表示於結業翌日25至26號可以免費拎走印有該店Logo嘅碟同杯留念，而飯券則會繼續於姊妹店走肉蔬食研究所繼續派發，而過年嘅年糕、盆菜、油器等亦仍然繼續供應。

走肉．朋友開業已經逾4年，於素食自助餐呢個Category上走於最前，一直以來為客人提供健康素食Buffet選擇，充滿田園風，每個禮拜有唔同餐單，以新派素食為主，不時有限定菜式，加上唔少菜式都添加創意，採用腐竹等食材營造葷食感覺，價錢又低廉，人均最低$68、最高$150，食足75至90分鐘，成功吸引一眾素食人士。

店舖以L形設計，偌大玻璃窗後為吧枱，而吧枱背後則為其他座位，中央有一系列素食菜式，Refill算快速，大概有30至40款菜式可擇，全為純素、蛋奶素，後者指嘅係包含雞蛋、牛奶嘅素食，只需先付款就可以入座，無加一服務費，餐具碗碟都需要自行放到後面回收處。

如果以現時質素同起初質素比較，其實係略有退步，而且感覺無咁抵食，只係最大優點係價錢不變，但以新派素食嚟講，仍然保持創意亦已經算難得。當中有改良自口水雞嘅口水素雞，以腐皮營造雞肉質感，麻辣度甚高；亦有改良自東坡肉嘅東坡素肉，由油膩變得健康，甚至改良自咕嚕肉嘅素肉，以粥店早餐必備嘅油炸鬼取代排骨。

沙律吧可見蔬菜卷、地中海沙律、薯仔沙律、南瓜沙律、麻醬雞絲青瓜、麻辣薯粉，其他沙律不過不失，不過蔬菜卷就只係影相用途，比較乾涸；而豆類菜式相當香滑，包含皮蛋豆腐、麻辣豆腐、脆炸豆腐等；另有素湯選擇，如紅蘿蔔粟米湯，湯料豐富，湯底鮮甜。

其他素菜有冷盤同熱葷，包括點心、Pizza、墨西哥卷、壽司，不單京、川、滬風味齊備，而且中西款式應有盡有，更飽肚嘅有粥粉麵飯、煎炒煮炸等菜式，例如燴冬瓜、原條粟米、炒飯、南瓜粥、炒米粉、炒意粉、麻辣陳村粉，甚至煎釀三寶中嘅素魚肉、炸三色椒、炸茄子、炸蕃薯、炸蓮藕、炸薯條等，味道上有齊酸甜苦辣鹹五味，新派素食就有別於傳統清淡素食。水果同甜品則有紫心蕃薯糖水、豆腐花、雪糕、涼粉、菠蘿、西瓜，飲品有檸檬水、涼茶。

（2）咯咯雞韓食店

早於一星期前，同區嘅咯咯雞韓食店亦於Facebook 突然宣佈已經結業，大角嘴店為外賣店，以韓式炸雞、飯卷為主打，而尖沙嘴店則仍然繼續營業，而且有堂食、有外賣店，官方更留言「結束，只係另外一個既新開始」，未知係咪於其他區另設分店。

延伸閱讀﹕大角嘴韓式炸雞店主打外賣一人份量泡菜飯卷最平$20

（3）千の味刺身壽司專門店

而於大角嘴區內營業3年嘅千之味刺身壽司專門店，日前同樣於Facebook 宣佈將於2月20日結束營業，該店以日式丼飯為主打，官方指結束原因係「完租約就不續租」，加上「政府減少堂食」、「分店距離都太近」，長遠嚟講只能結業。不過，官方往申店舖絕對唔係「告急」，所以毋須刻意光顧，店舖於區內仍然有外送服務，滿$300就可享外送優惠，而深水埗分店離大角嘴亦非常接近。

延伸閱讀﹕大角嘴街坊刺身壽司專門店丼飯全日供應最平$40