西貢行到沙田!白沙灣出發穿梭企壁山古道 麥理浩徑接長城古道徒步黃泥頭小瀝源

西貢行到沙田!白沙灣出發穿梭企壁山古道 麥理浩徑接長城古道徒步黃泥頭小瀝源

由西貢徒步到沙田或馬鞍山,有好幾條路線,包括茅坪古道、北港古道,昂坪、梅花古道,甚至經飛鵝山,今次就由白沙灣起步,走比較少人知道嘅企壁山古道,接駁麥理浩徑第四段及長城古道前往沙田小瀝源,路線較少人步行,適合拍拖兩個人穿梭其中。

如果西貢白沙灣、三塊田步行至沙田黃泥頭,途中可經過大腦、海拔達604米高嘅黃牛山、海拔達606米高嘅水牛山,而黃牛山就係水牛山嘅副峰,山嶺如同雙峰插雲。先於西貢公路轉入孟公窩路,經過佛光寺、白沙臺、九天玄女義女堂,緩緩向上行,盡頭位置為墳場,步程約需25至30分鐘。而墳場背後就有一道小山徑,左邊有一個小路牌寫明路段可通往企壁山,另一端亦寫明企壁山鄉村供水池。

前行山徑路口雖然只寫有麥理浩徑,但事實上該路段就係企壁山古道,只需依循清晰山徑走,走完瀝青路就可以緩緩攀登石砌步道,山徑路口旁邊有一間大宅,古道路段凹凸不平,多風化碎石,古道會經過大腦、打瀉油坳。

而企壁山古道相對茅坪古道、北港古道、梅花古道較少人認知,甚至不如大腦古道、石壟仔古道、水牛古道、黃竹山古道、長城古道,事實上通通同為香港嘅石砌古道,而古道本來就係用作連接山上各村同山腳交通嘅要道,每逢步行古道,都有如乘搭時光機時空穿梭,回到過去。

30分鐘後於分岔路段繼續上行,會發現雲層有時候就於自己身邊,回望可下瞰西貢白沙灣風景。步行20至30分鐘後,會到達一處芒草地。平地上滿滿芒草景,山坳芒草處處,人流稀少時更狀觀。芒草地位置有十字路口,退出點眾多,右邊可通往西貢茅坪方向,前行可到達水牛山、黃牛山、石芽山,有興趣可攀登黃牛石城,轉左則可到達基維爾營地。

沿基維爾營地方向步行,經長城古道前往花心坑,該古道為一段悠長古道,但可觀群山景況,步程約45分鐘,山徑多為下坡路段,但要小心部份山徑一旁為懸崖,後段已經可以俯瞰整個沙田谷,甚至眺望大帽山。

最後,經花心坑即可以下行至黃泥頭村方向,中途到達石芽背分岔路口就會變返瀝青路,再直行到山腳時,會發現山腳指示牌係寫有山路為通往黃牛山,轉左再穿過下行小徑,就可以經黃泥頭村返回黃泥頭巴士總站。

E.A.Tips :

❶ 巴士路線92號、小巴路線1A號都可以於白沙灣落車,而到達黃泥頭後,可以乘搭巴士路線83K、小巴路線65A折返沙田市中心,又或者向下行至廣源邨亦有車可來往九龍區。

❷ 初段上登山處較花體力,而麥理浩徑4段亦需上行,直到登上黃牛山分岔路口之後就只係落山路段居多。

❸ 路況清晰,為正式行山徑,不過石砌路段需要小心滑倒或跘倒。

❹ 中途無補給點,謹記帶備充足糧水。

❺ 謹記自己垃圾自己帶走。

❻ 孟公窩路沿途不時有狗隻,勿挑釁。

EATWO
Miss A

白沙灣

新界西貢半島中部

企壁山

西貢孟公窩路

黃泥頭村

香港沙田區