薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場

薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場

近年,一個個樹洞逐漸變成影相位,吸引唔少人專程上山打卡,唔少人為咗Like更不計安全,但事實上樹洞影相位係無處不在,編輯於薄扶林小徑就發現一個由大榕樹構成嘅神秘樹洞,人流極少,適合拍拖兩個人影吓相,樹洞既離沙灣徑海旁不遠,亦靠迎薄扶林道殖民建築物、法定古蹟等歷史建築,輕鬆一遊比跟行程走更自在㗎!

於中環碼頭野餐後,就可以乘搭小巴路線直達摩星嶺道,中途會見到摩星嶺徑,係另一道路線通往摩星嶺配水庫臨時花園。而到達薄扶林道之前,於怡林閣落車,前行會見到安利別墅,別墅斜對面就有兩道秘密小徑,分別為上坡同下坡路段。

先選往下嘅一道小徑,一直前行靠近基督教華人墳場,盡頭為折返域多利道嘅捷徑,可通往大口環道及沙灣徑海旁,雖然路段並無於Google地圖中顯示,但現場所見就係瀝青路,清晰易走。

不過,離摩星嶺道入口不遠處,先會見到一個古樸涼亭,而涼亭前方就可以見到一個神秘樹洞。鳳凰山羅漢脊嘅一樹洞海拔高約934米,飛鵝山鵝肚棧道嘅一樹洞亦高約500幾米,而鵝肚更不時出意外,至於呢個薄扶林樹洞就非常安全,海拔僅高約100米,但只等同摩星嶺道高度,全程都為平路。

薄扶林樹洞由一棵大榕樹構成,表面平平無奇,但現場所見,四週環境清幽,相當寂靜。加上高聳大榕樹矗立其中,中間恍如開闢一道行人小徑,而榕樹吊鬚更擴展至人嘅高度。

大自然的確鬼斧神工,樹洞特殊,驟眼睇嚟,穿越樹洞有如穿梭一個叢林仙境,如同童話國度,帶有幾分夢幻感。其實,亦有所謂網紅打卡點嘅條件,拍攝起嚟有如零死角,如果今日之後變成打卡點,希望大家尊重原創,唔好忘記eatwo又一次做咗元祖介紹嘅一員。

折返剛才嘅摩星嶺道入口,走向上坡方向,可快速往來薄扶林道與摩星嶺道。而薄扶林道則有唔少歷史建築物,可以同時一窺究竟。

依循薄扶林道走,穿過天橋,再經過瑪麗醫院,前行就可以轉上玫瑰邨,但到底玫瑰邨有乜特別?事實上,呢座玫瑰邨大宅不僅係歌手張敬軒租住嘅豪華府邸,而且係一座香港二級歷史建築物!

玫瑰邨(Old Alberose)位於香港島西面,為薄扶林高尚住宅地段,薄扶林道亦只係咫尺之間,據悉建於1926年,有近百年歷史,後來於2009年被列為二級歷史建築。

玫瑰邨英文名係來自法國猶太人Albert Weill,曾經用作招待外藉上流社會人士,甚至英國旅遊人作家Ellen Field,1955年由香港大學購入,用作職員宿舍,直到2019年被歌手張敬軒租下,而玫瑰邨亦係英國殖民時期建築物。

玫瑰邨外表係一座純白外牆連小花園嘅莊園,據租住玫瑰邨大宅嘅歌手張敬軒發表過嘅影片可見,大宅內裝潢豪華壯觀,置入各種古董傢俱,古樸而奢華,十分華麗。即使未能步入大宅參觀,但大宅純白色外牆嘅外觀亦能透視幾分歷史色彩。

返回下坡路段,會發現玫瑰邨位置風景優美,不單背靠太平山山頂,可俯視鋼線灣、數碼港海景。

繼續沿薄扶林道前行,會經過薄扶林家樂徑入口,前行亦可到達一座殖民建築伯大尼教堂(Béthanie),為全港唯一新哥德式教堂。而教堂亦靠近即將開幕嘅薄扶林牧場,同樣離薄扶林村不遠。

伯大尼小教堂來自巴黎外方傳教會,建於1873至1875年,由花崗岩石砌成,內有彩色玻璃窗。小教堂原為薄扶林療養院,係傳教士休養之地,現時為香港演藝學院伯大尼校園,於2013年亦係香港法定古蹟之一。

小教堂離舊牛奶公司宿舍距離接近,宿舍亦有逾百年歷史,宿舍之下為薄扶林屋邨及寮屋區,於熙來攘往嘅薄扶林道抬頭可見宿舍仍被綠色布幕遮蓋。薄扶林區原本有紮根牛奶公司牧場,專門盛產鮮奶,即將會活化成薄鳧林牧場。

而薄鳧林牧場亦係一座一級歷史建築物,建於1887年,亦為英式建築物,今年即將會開放俾公眾入內參觀,不過對於編輯呢啲無針人士,估計唔會有機會進入啩?

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好,
了解更多E.A.Two 資訊

E.A.Tips :

❶ 於中環6號碼頭乘搭小巴路線54號,可以直達摩星嶺道,落車位置應該近怡林閣,編輯因落錯車行錯路,所以經過樹洞影相位,位置大概係安利別墅斜對面,直行到底就可以折返域多利道。

❷ 注意樹洞影相位係落斜,而唔係上斜,而上斜就係一道捷徑可通往薄扶林道。

❸ 沿薄扶林道走,就可以經過玫瑰邨、伯大利尼教堂、舊牛奶公司牧場。

❹ 樹洞位置蚊蟲較多,必須做足防蚊措施。

❺ 愛惜樹木,謹記勿攀爬榕樹。

EATWO
Miss A

安利別墅; 摩星嶺道

摩星嶺
玫瑰邨
薄扶林道132號

伯大尼小教堂

薄扶林薄扶林道139號

舊牛奶公司宿舍

薄扶林薄扶林道139號