太子人氣車仔麵湯底鹵汁混腩汁 16款麵底任揀必試低卡蒟蒻麵

香港車仔麵店有好多，要突圍而出就要提供獨特嘅餸菜款式，連麵底都要與別不同，太子有一間車仔麵店於同一區「開雙」，而且受到歡迎，唔少人都拍拖兩個人去撐場，更不時出現排隊情況，變成一間人氣車仔麵店，事實上，餸菜款式有別於平常地踎車仔麵嘅簡樸，連麵底都足足有16款可擇。

以「何車」為店名，讀音似粵劇嘅「合尺」，聽落似中式或港式車仔麵，但從店內裝潢，以致餐牌上嘅麵底同餸菜款式，都似日式風格。當中，車仔餸有關東煮$18、日式豬軟骨$15、日式叉燒$15、竹輪及溫泉蛋$8，小食又有吉列炸蝦、吉列炸蠔、關東煮娃娃菜、大阪燒吉列豬扒、大阪燒餃子雞翼，將多款和食加於車仔餸嘅選擇。

老何麵十餸$62 包含豬皮、豬腸、豬紅、蘿蔔、雞翼尖或雞翼、魚蛋、肥牛、魚片頭、燒腩肉，而細何麵五餸$45 就包含豬皮、豬紅、糖心蘿蔔、鹵水雞翼皇、陳皮魚蛋，糖心蘿蔔份量唔多，但相當清甜不濁而無渣。其實，以車仔麵嚟講，價錢比較貴，到底抵唔抵食就見人見智啦。

自選車仔麵可任揀車仔餸，飛天牛腩$15、何車水魷$15、媽媽水餃$15，何車與三一餃子，有蒜芯豬肉餃、粟米豬肉餃，但今次挑選咗燒豬頸肉$15、燒牛舌芯$15、魚腐$12，豬大腸$14，當中燒物質素唔錯，牛吞芯、燒腩肉、豬頸肉、燒得香口，牛舌芯亦肉質軟嫩，肉香惹味，難得爽口而唔會韌，而魚腐亦特別吸附湯汁。