娛苑起步!142級樓梯登元朗後山豬黃嶺 超矮標高柱眺望雞公嶺淋坑山

娛苑起步!142級樓梯登元朗後山豬黃嶺 超矮標高柱眺望雞公嶺淋坑山

元朗有唔少山丘,當中有一座山隱藏於元朗後山嘅小山丘,靠近橫洲娛苑,一道小秘道就可以通往一座極少人步行登上嘅小山丘,讓大家拍拖兩個人輕鬆爬142級樓梯就能夠登頂,一方面可瞰雞公嶺,另一方面亦可眺望天水圍後山淋坑山。

離元朗市中心不遠,有一座曾經於2007年被列為香港一級歷史建築嘅英國式大宅,名為娛苑,建於1927年,有留意eatwo嘅讀者一定知道,娛苑係編輯曾經亦錯到訪過嘅地方,只不過2010年降級為香港二級歷史建築物。

娛苑本身位處橫洲東頭圍鄉公所側,內裏仍可見歐式噴水池,娛苑樓高兩層,頂端仍有陽台,門口對聯則寫有「娛覽遠山青人畫;苑環嘉樹紅葉歸。」雖然娛苑曾於50年代以前開放俾公眾參觀,一直荒廢,但都一直有人進入其中,不過目前娛苑已經被封閉,有人更於門口寫明「私人地方,不得內進」嘅警告字句。

離娛苑不遠,有一座橫洲二聖宮,拐個彎、經小路直入就感到達,而二聖宮旁邊可見被荒廢嘅橫洲公立幼稚園。二聖宮歷史可追塑至清朝康熙期間,大概建於1718年,係一座村民合資嘅廟宇,用作供奉車公、洪聖,亦為青磚建築,門口牆壁上可見浮雕設計,後來於1996年被列為法定古蹟。至於旁邊嘅荒廢幼稚園,並非位處西頭圍嘅橫洲公立學校,該學校建於50年代,而呢間橫洲公立幼稚園就建於1963年,於1976年正式建成校舍,但始終都係被廢棄。

而二聖宮與橫洲幼稚園之間,就有一道神秘小路,中間可見一個個香塔,穿過之後會發現香塔之後暗藏秘道!初段更可回望娛苑後方環境,中後亦可見雞蛋花蹤跡,前行小山路就係通往一個名不經傳嘅元朗後山豬黃嶺,全程人跡罕至。

豬黃嶺的確係香港一座小山丘,海拔僅高約52米,名字趣怪,你可能連聽都未聽過,其實豬黃嶺又叫做豬橫嶺或豬郎山,但就搵唔到資料解釋名稱由來,大膽估計係橫洲背後嘅山嶺小丘,亦可能小山峰上曾一度有野豬橫行。

向豬黃嶺標高柱嘅山路中,全程只有142級樓梯級,而且係瀝青路,輕鬆易行,不消10分鐘就可以登頂!標高柱只剩低底部,不如平常見到嘅全支三角測量站圓柱體標高柱,而豬黃嶺標高柱亦只係海拔約52米高,快則5分鐘就可以走到呢座超矮嘅標高柱。

當一步步登上豬黃嶺,會發現山腳為元朗工業邨,於Google地圖上係全無蹤影,只會勉強見到二聖宮背後有一小片綠油油小樹林,同時離娛苑極接近。豬黃嶺南脊仍可見少少山路,但北脊就只能夠見到一片密林,似乎未有完全開發,又或者係因為被完全荒廢,現時只能確認豬黃嶺山形狹長,面積不大。

涼亭有少量居民添置嘅設備,例如吊床等雜物,標高柱對出更有幾張石枱、石櫈,而石枱上更有象棋棋盤。涼亭兩邊方向皆可賞景,一端可眺望元朗雞公嶺,另一端可直視元朗髻山、天水圍淋坑山,甚至遠眺濕地、深圳后海灣,而俯視則為橫洲大地、元朗工業邨、大井圍、南生圍、大生圍魚塘、錦鏽花園一帶景色。事實上,腳下嘅元朗工業邨喺建成工業區之前,只係一片漁塘。

穿過涼亭,的確可見一道小山路,更有小石櫈,雖然稍有叢林,但初段山路仍算清晰,惟到達中段之後,則變成密林,山路被樹叢阻擋,難以前進,所以最好都係原路折返橫洲,再返回元朗市中心。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好,
了解更多E.A.Two 資訊

E.A.Tips :

❶ 巴士路線53,269D,276,276P 可到達青山公路元朗段。

❷ 青山公路元朗段步行至娛苑約10分鐘腳程。

❸ 豬黃嶺入口處位於橫洲二聖宮旁邊。

❹ 進入娛苑嘅左邊小路就係通往橫洲二聖宮。

EATWO
Miss A
娛苑起步!142級樓梯登元朗後山豬黃嶺 超矮標高柱眺望雞公嶺淋坑山

豬黃嶺

元朗橫洲東頭圍村

在〈娛苑起步!142級樓梯登元朗後山豬黃嶺 超矮標高柱眺望雞公嶺淋坑山〉中有 1 則留言

留言功能已關閉。