旺角點心專門店外賣自取！$56一個人點心拼盤唔使怕選擇現分歧

相信好多拍拖情侶都會經歷過菜式選擇嘅分歧，一個想食日式，另一個想食泰式，又或者係一個想食台式，另一個想食中式，而家外賣自取就可以同時解決兩個人喺菜式選擇上出現嘅分歧問題。當中，旺角一間點心專門店不單有點心、蒸飯，而且特別有一個人點心拼盤，份量適中，不單只適合單身人士，而就算另一半唔想食點心都可以選擇。

外賣自取包含蒸飯套餐$49至$58、，當中有土魷香菇肉餅飯，飯粒比較乾身，並非蒸飯應有嘅黏口感覺，嗱編輯所講想要蒸飯黏口，唔係等同軟爛質感。今次配搭名醬蒸美國鳳爪，鳳爪係軟腍，骨肉容易分離，醬汁濃厚，味道較重，鹹度比較高，略嫌油份較重。再加上甜品芒果布甸作結，內有芒果粒，入口係香甜嘅。

每一份套餐都配上老火湯，是日係老黃瓜薏米豬骨湯，湯底清甜中略帶鹹味，不過每一碗餡料都一樣，可見有豬骨、薏米，重有軟爛嘅老黃瓜碎。雖然聲稱無味精，但似乎鹽味略略多咗少少。

而點心套餐價錢約$59至$62，至於下午茶點心拼盤則為$46至$56，其中下午茶點心拼盤分「一個人的浪漫」、「蒸心拼盤」。今次選擇前者，點心包含鮮蝦餃、紫芋糕、鮮蝦腐皮卷、蜜汁叉燒包、芥末沙汁三文魚春卷、鮮肉灌湯小籠包、蟹肉菜苗燒賣、竹炭熔岩奶黃包，總共有8款點心，數量上算不過不失。不過，外賣整體賣相其實麻麻，只係放晒入普通外賣盒內，賣相的確比堂食差，似食淨嘅點心帶走嘅感覺，如果小店能夠改變外賣嘅賣相，至少加入分隔，相信係會更多人選擇作為野餐外賣。

經典點心當然有蝦餃、燒賣，蝦餃皮薄而晶瑩剔透，餃皮略帶油份，蝦肉份量充足，爽口鮮甜；而鮮肉灌湯小籠包質感唔錯，豬肉餡適中，湯汁唔多，尚算鮮甜；至於蟹肉菜苗燒賣顆頭大粒，內餡含豬肉、蝦肉，上有肉香，下有蝦鮮甜味，不過豬肉就略肥，頂端帶蟹肉質感，只係菜苗唔太明顯，整體鹹味好似愈來愈重。

香口系列包括鮮蝦腐皮卷，表皮仍舊略帶微脆，餡料有鮮蝦肉；而芥末沙汁三文魚春卷同傳統春卷有異，為新式創意點心，相對清爽，雖然春卷表皮因為外賣會逐漸變得有少少淋，但餡料都夠豐富，除咗以沙律醬、青瓜等作餡，更特別之處係包含三文魚肉碎，略帶三文魚魚香同魚油，似三文魚沙律卷，不過芥末味就比較輕。

包點系列就有蜜汁叉燒包；至於竹炭熔岩奶黃包就係推介之一，色調呈黑金，甚為搶眼，而表皮較厚身，以竹炭製作，味道其實都係清淡，餡料方面，即使一段時間過去，粗略計算約有半小時，蛋黃餡料都仍然保持流心狀態，而流心奶黃味道香濃，難得並非甜膩感覺。

甜品書面上寫有紫芋糕，但結果變成另一款，味道貌似紅棗糕，而絲絲入口質感就狀似黃金糕，略帶微微香甜味，可以解解膩。

延伸閱讀﹕點心界KOL？本地人爭食招牌牛肉點心女人街一盅兩件好過去酒樓

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 下午茶時段有一人下午茶，可以試點心拼盤，其他點心、蒸飯都有優惠價。

❷ 可以先打電話落單，或者Whatsapp 5703 1148都可以預先落單，然後到時候外賣自取，不過要等店員回複OK先代表確認。

❸ 凍飲加$3，黑白豆漿加$8。

❹ 外賣自取最好提早15分鐘落單。

❺ 外賣無茶介同加一。