西貢行山路線有好多，但天氣炎熱，行山並唔係好選擇，倒不如遊走海邊步道，既可以影相，又可以拍拖兩個人散吓步，海邊能驅走暑氣，有啲地方更可以避開人群，今次帶大家由林蔭秘道前往企嶺下，窺探紅樹林、小螃蟹，另一方面亦可以走出小堤壩，風景怡人。
由沙田出發，一條巴士路線可以直達企嶺下新圍，同時可以連接企嶺下老圍，我哋先從水浪窩出發，影完觀星台之後，目的地係下行至企嶺下老圍，可以從麥理浩徑第三段轉向榕樹澳方向，然後於分岔路口更亭轉入企嶺下，地勢平坦，亦可以向沙田方向回頭走一小段路，大概5分鐘就會見到企嶺下老圍入口處，沿途會經過西沙路燒烤區。
路口會見到燒烤場，亦可以輕易搵到一個殖民時代英式皇冠郵箱，該郵箱為228號，係入牆模式，鑲嵌於白色平頂石柱內，郵箱上寫有ER字樣，即係伊利沙伯二世時期建造，底下有製造商名稱W T Allen Co Ltd, London，意味來自英國倫敦。
由英國郵箱起步，下行至企嶺下老圍海旁，路段係一直下行至村屋方向，沿途皆為林蔭小道，第一個分岔路口記得走右邊方向，皆因左邊係私人地方。到達斜路盡頭之後，繼續靠右邊走，樓梯下行，就可以直抵企嶺下老圍公廁，而公廁對出就係企嶺下賞景之地，路線為捷徑。
企嶺下老圍海邊有極細小嘅泥灘，小螃蟹爬行清晰可見，海旁更有紅樹林，生態資源豐富。位置亦正對企嶺下海海灣，環境清幽，寧靜愜意，風光明媚，不過就比較多蚊蟲。翻查資料，原來企嶺下老圍嘅紅樹林一早於1994年被劃為具特殊科學價值地點，面積有48.4公頃，果然係一個小寶藏。企嶺下老圍靠近榕樹澳，從企嶺下老圍遠眺，不難發現一個小堤壩，你以為堤壩無得進入？其實，只要繼續前行就可以登上小堤壩。
從企嶺下老圍前行至企嶺下新圍，地勢平坦，另外亦可以直接於西沙路企嶺下新圍巴士站出發，只需折返分岔路口，就可以下行至企嶺下新圍海邊。企嶺下新圍堤壩位處企嶺下海，而企嶺下一詞係由於以前馬鞍山本名又叫做企嶺，而地理位置上位於馬鞍山以東，又處於馬鞍山山腳，故此呢個位置就叫做企嶺下，企嶺下老圍、企嶺下新圍就係當中兩條村嘅名稱，而對出海域就被統稱為企嶺下海。
步行約5分鐘，走出小沙灘，就能夠見到紅樹林海岸，位置人流稀少，可以眺望烏洲、榕樹澳、深涌。繼續依循本來嘅村落小路走，前行2分鐘就會見到能夠租借獨木舟、直立板嘅企嶺下水上活動中心，前方就係小企嶺下小堤壩，如果想更簡單，可以沿西沙路走，但就較近馬路。企嶺下海係凹入狀態，如同一個倒三角形，堤壩即係防波堤，可以向外面眺望，前方即為形狀似一碗飯嘅小島嶼烏洲，遠方可見深涌灣，而堤壩盡頭離榕樹澳只係咫尺之間，離漁排極接近，遠眺漁排星羅棋布，企嶺下海灣景色絕美。
離開企嶺下新圍時，可以選擇繼續前行至企嶺下老圍，約5分鐘步程之後，就可以返回企嶺下老圍公廁，然後向榕樹澳方向前行至分岔路口，腳程約5分鐘，最後於分岔路口轉右，向上行就能夠折返西沙路，斜路需要約7分鐘步程，位置為麥理浩徑第三段與第四段嘅交匯處。
E.A.Tips :
❷ 海邊公廁附近蚊蟲較多，最好做足防蚊措施。
❸ 如果要走企嶺下老圍，謹記留意潮汐漲退時間，皆因泥濘小路會被淹沒。
❹ 水浪窩有汽水機、加水機可作補給。
❺ 進出防波堤要小心，特別要注意水漲情況。
企嶺下老圍
西貢企嶺下
企嶺下新圍
西貢企嶺下
在〈西貢林蔭秘道登小堤壩眺榕樹澳漁排 水浪窩闖企嶺下賞紅樹林尋港英時代郵箱〉中有 1 則留言
留言功能已關閉。