土瓜灣早前被拆卸重建，現時再步入土瓜灣區內，會發現多條街道已經空空如也，土瓜灣本來有多個殖民時代舊式T字形街牌，但現時隨住舊有建築物拆去，連T形街牌都被消失得無影無蹤，你又估吓今時今日土瓜灣區內淨返嘅舊式街牌有幾多個呢？有時間不妨拍拖兩個人前往舊區，找尋真正嘅歷史足跡啦！
如果自問係英屬香港居民，應該會記得舊式T形街牌係咩一回事，歷史甚至可以追塑至19世紀末。呢種舊式街牌為鑄鐵街牌，大多數係黑框白底，本身就係從英國複製過嚟香港，係屬於30至60年代製造嘅街牌，比較活躍於60年代。T形街牌上嘅字係凸字字粒，非常獨特，係字粒式街牌，將陶瓷字母鑲入以生鐵鑄成嘅街牌上，並非只係單純黑框白底街牌，同皇冠郵筒一樣，係全金屬鑄造，經歷百年都能夠堅固如新。
而英式鑄鐵街牌呈T字形，有別於新式長方形街牌，連街名寫法都與別不同，新式街牌係上中下英，但舊式街牌就係上英下中，上層會寫有英文名稱，而中文名稱就會寫於T字形嘅下層。而中文街名更加係有別於新式街牌由左至右讀，反而係從右向左書寫，都係中文方面嘅歷史見證。
事實上，土瓜灣區內本來有至少10個舊式T形街牌，包括木廠街、龍圖街、鴻福街、榮光街、環發街、環樂街、九龍城道、鴻光街、永耀街、美善同里，原來大多數舊式街牌已經被消失，有2個剩低嘅T形街牌都係位處近馬頭圍方向，至於榮光街唔知會唔會成條街都無埋呢？
編輯於土瓜灣區內踩線所搵到嘅舊式T形街牌有3個，除咗九龍城道暫時未能確認，就只有木廠街、鴻光街、美善同里嘅街牌能夠完好保存。本來全港有近200個T形街牌，後來被指剩低約80個，但現時單單一個土瓜灣區，10個街牌就已經有至少一半被蒸發，果然係見一個少一個，原來舊式T形街牌至今仍未獲得保育。
3個T形街牌都係屬於凹角T型嘅街牌款式，當中鴻光街相對保留得較新簇，而木廠街、美善同里嘅街牌都係有生鏽感覺。而位置上，就只有木廠街街牌位於大街十字路口，其餘鴻光街、美善同里都係位處小巷內，若然唔係刻意抬頭，應該係唔會目睹街牌。
E.A.Tips :
