免用匙羹!大角嘴全新馬來叻沙椰香味重非咖哩叻沙 自家炒製醬料湯底濃稠超掛湯

免用匙羹!大角嘴全新馬來叻沙椰香味重非咖哩叻沙 自家炒製醬料湯底濃稠超掛湯

相對於旺角鬧市,大角嘴隱藏嘅美食更被低估,當中離奧海城不遠嘅富多來商場,就一間接一間小店,值得拍拖兩個人參觀吓,近月呢個舊式商場又有一間新店進駐,以馬來叻沙為主打,最先吸引眼球嘅地方係門口寫有每個禮拜都有休息時間,而店舖休息嘅理由係需要專心炒製醬料,原因都算係別具一格,更特別之處係湯底果然非常濃稠,麵條掛湯程度高,唔需要匙羹都能夠試到叻沙湯,款式並非似平常坊間最易見到嘅咖哩叻沙。

商場由80年代至今,係典型未被拆走嘅舊式商場,內有一個個小寶藏可以發掘。今次呢間小店並非星期六、日全日開舖,門口特別寫有休息時間,甚至特別寫明休息時間係用作專心炒製醬料,反而挑起編輯嘅好奇心,到底湯底醬料有乜咁特別?故此,一日突意前往查看一下,方才見到門口餐牌上包含4款湯底加1款乾撈麵,每款湯底都可以配搭唔同配料,包含招牌椰爺秘傳叻沙湯、檳城白咖喱湯、馬來香濃咖喱叻沙湯、三重蝦叻沙湯、香草特濃椰奶湯、參巴麻辣干撈,小食與飲品亦有馬來炸香蕉、班蘭咖央多士、3款班蘭特飲,似乎真係全馬拉菜式。

編輯對叻沙唔算好認識,雖然叻沙名稱本來係來自古印度,但對東南亞一帶比較有影響力,以馬來西亞叻沙嚟講,可以分成4種,香港人最常見嘅係咖哩叻沙,即係亞參叻沙、砂拉越叻沙、東海岸叻沙,編輯驟眼睇嚟,小店嘅叻沙應該係偏向東海岸叻沙,到底點解?

店方寫明醬料係由自家炒製,醬料必須爆炒並煎煮發酵,需時逾9小時,而且無添加味精,每一碗配料都有深海魚蛋、芽菜、豆卜、青瓜絲等,更自誇食材新鮮、採用天然香料。當中以招牌椰爺秘傳叻沙湯麵為例,配搭煙鴨胸及滷水燉金沙骨嘅椰爺秘傳叻沙摻摻$88,金沙骨夠入味,軟腍得入口即骨肉分離,唔會黐牙,而叻沙味獨特,湯底有濃郁椰奶香,椰味濃厚得久久不散,質感則極為濃稠,色調呈奶白色,另外香辣味較另一款重些少。

麵條以米粉配油麵,係典型叻沙內嘅摻摻,每條都能夠輕鬆掛湯,皆因湯底極濃稠,即使唔需要匙羹,單靠麵條都可以品嚐叻沙湯。一碗叻沙內除咗可見芽菜、豆卜、魚蛋,更有青瓜絲,而加入青瓜絲就等同馬來式沙律,呢樣係東海岸叻沙獨有做法。聽聞東海岸叻沙會採用魚湯作底,而呢款湯底又的確有啲鮮甜味,只不過小店加入豆卜嘅做法就似乎混合咗咖哩叻沙。

猶記得,店員端出食物時,特別提醒獨有食法,呢款叻沙會配有一粒青檸,但唔需要一開始就加入青檸,反而食到一半先至將青檸汁擠下。編輯當時仍然百思不得其解,到底食到一半先落青檸汁有何用意呢?最初辣椒的確醒胃,當食到一半之後就清楚明白,由於湯底濃稠,好易令人覺得飽飽滯滯,食到半路中途加添青檸汁之後,湯底帶上酸爽,再次變得開胃,方才可以繼續食完一碗叻沙。

至於三重香蝦叻沙湯麵,配搭虎蝦帆立貝嘅三重香叻沙摻摻$98,兩大隻虎蝦非常吸睛,中間又有一粒帆立貝,蝦肉結實,魚蛋亦算彈牙,湯底同上述以椰奶味為重心唔同,反而只係重蝦湯味,所謂三重蝦包括有櫻花蝦、叻沙蝦、爆炒蝦米,入口有濃濃蝦味,相當可口。

以蝦肉為主嘅湯底,色調相對偏橙紅,而非奶白色,反而似另一款叻沙,應該係砂拉越叻沙,只不過同樣加上青瓜絲就令編輯有啲疑惑。叻沙色調似紅咖哩,但又無咖哩香料成份,反而加入馬拉盞醬料,縱然有椰奶味,但就無上述一款叻沙咁重,主要就係層層蝦湯味,蝦味基本上蓋過椰奶味,香辣味則較剛才一碗低。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好,
了解更多E.A.Two 資訊

E.A.Tips :

❶ 星期一至五午市送羅漢果水一杯。

❷ 新開業Like IG送小食一款,多兩粒深海魚蛋。

EATWO
Miss A

馬來椰爺

大角嘴櫸樹街62號富多來商場2期地下14號舖
星期一全日休息;星期二至五12:00 – 15:00、18:00 – 20:30;星期六12:00 – 15:00;星期日12:00 – 15:00、18:00 – 20:30;公眾假期12:00 – 15:00、18:00 – 20:30;公眾假期前夕12:00 – 15:00、18:00 – 20:30
5129 8887