【野餐隨行】街市背後賣美式漢堡包？將軍澳屋邨尋寶開迷你墨西哥小食Party 歎惹味墨西哥烤餅/捲餅/Nachos

若然你有搵食經驗，大概會知道出色嘅小店未必一定係座落大街大巷，有機會係躲藏於一二個角落，拍拖兩個人瓹窿瓹罅隨時搵到鮮為人知嘅美食。今次編輯於將軍澳屋邨內發現一間微舖，以外賣食物為主，但都有一至兩個座位，一方面賣嘅係美式漢堡包、小食，另一方面亦有墨西哥小食，原來餐廳被分類為美國菜、墨西哥菜、秘魯菜，到底有咩好食呢？你可能會問美墨西哥菜同美國有咩關聯，點解會叫「American Snack Bar」？轉頭再話你知，呢間小店選擇漢堡包嘅人比較多，是次先集中試吓墨西哥風格嘅小食，嘗試一個墨西哥小食Gathering啦！

以「Vortex」命名嘅外賣店，中文直譯為「渦漩美國小食」，室內有少量偏向美式街頭風格嘅裝飾，幾吸引眼球，小枱為高枱同高腳椅模式，隱藏於將軍澳寶康花園內，而且位處街市背後，若然唔係刻意尋找，除咗附近街坊，應該好難會搵到呢間小店，除咗招牌上有少量微弱光芒，基本上難以發現佢嘅存在。

店內有唔少美國小食，除咗Vortex招牌嘅漢堡包，亦有以4個國家命名嘅漢堡包，包含New York、Chicago、Miami、Los Angeles，以屋邨地理位置嚟講，價錢上相對坊間漢堡包貴。其他小食有Buffalo Wings、Portobello、Sausage Platter、Truffle Fries、Roasted Chicken，令人垂涎，似乎想用香口食物俘虜客人嘅胃，似乎都係佐酒嘅好選擇，想飽肚亦有意粉可擇。不過，今次編輯挑選嘅係全墨西哥小食，並唔係上述嘅美式漢堡包，想知食咗咩？我哋先帶大家去野餐點先啦！

將軍澳富康花園位於香港單車館公園對面，要找尋野餐點，最直接嘅方法就係前往最接近餐廳嘅地方。雖然叫單車館公園，但就並唔係一個可以踩單車嘅公園，所謂嘅公園其實只係「單車館」座落一個公園內。園內有偌大草地，但夜晚天色已晚，若然無自備燈光嘅情況下，草地位置可能偏暗，呢個時候可以選擇直接到有枱有櫈嘅地方，自製一個小餐廳，今次開以自行舉辦一個墨西哥小食Gathering，食完真係想吮埋手指。

Quesadillas 即係墨西哥烤餅$68，呢款餡餅係一款相當出名嘅墨西哥獨有小食，一般集中於墨西哥中部地區，以墨西哥薄餅Tortilla中夾住芝士、蔬菜、香料等，然後烤焗而成。Quesadillas 係兩塊薄餅中間夾住餡料，然後再對摺，邪惡嘅拉絲芝士就躲藏其中。薄餅餡料中不單有經熱力而逐漸融化嘅芝士，亦有一啲蔬菜，包含切碎洋蔥、三色椒絲、酪梨醬，既有墨西哥辣椒，再加入莎莎醬，所以薄餅入口本身就會比較辣，但的確係正宗墨西哥風味。

California Chicken Burrito 加州雞卷$98，Burrito亦係一款屬於墨西哥嘅小食，亦叫做Taco de harina，同樣係以墨西哥薄餅Tortilla製成，只不過就係一款墨西哥捲餅。捲餅內包含軟嫩雞胸肉、豆、碎芝士，同樣有加入洋蔥，重有啲醬汁、軟滑嘅牛油果，然後捲起，完全包裹起嚟。如果同上述嘅烤餅相比，同樣係以墨西哥薄餅炮製，Burrito嘅薄餅就相對軟身，只有略有煎香，唔會被烤至硬化，或者係因為需要捲起、包覆食物啩？呢款小食於墨西哥同美國受到歡迎，或者係一款改良過嘅Burrito。

另有小店附送一客薯條，變得更有飽足感，粗身薯條炸成金黃色，香脆可口，內裏軟綿，只係配搭蕃茄汁，都已經比連鎖店嘅好幾倍，不過就已經唔清楚係邊款小食附送。另外，除咗上述兩款小食，墨西哥小食當中最為人熟悉嘅一定係Nachos 墨西哥粟米片$68，Nachos係一款來自墨西哥北部嘅小食，配搭烤焗芝士，略帶辛辣味。翻查資料，原來墨西哥菜中最受歡迎嘅小食Nachos 係由毗連美國德州邊境嘅一個墨西哥北部小鎮Piedras Negras 發明！

皆因二戰時美國女人去隔離墨西哥北部遊覽，喺一間就關門嘅餐廳要求用餐，餐廳經理名為Nacho，以廚房剩低嘅材料作招呼，就只採用墨西哥餅皮、芝士、墨西哥辣椒炮製，將餅皮炸成脆片，再連同芝士放入焗爐，最後灑上墨西哥辣椒，結果美國人就將呢款小食名為Nachos，因為係經理特製嘅小食，後來更演變成唔同嘅版本，每年10月21日更係「國際 Nacho Day」。

而小店嘅Nachos上面亦舖上芝士，芝士於粟米片上融化，左右兩邊分別放有醬汁，一款呈白色，另一款則吐青綠色。Nachos從紙盒取出時，係唯一並無盒蓋嘅小食，接近純白色嘅醬汁係Sour Cream，而青綠色嘅醬汁係牛油果醬，兩款都係偏稠身，後者入口唔似純牛油果醬，貌似混合咗其他材料，牛油果味似乎偏淡，編輯始終都係鍾意重牛油果味。Nachos係一款好方便嘅小食，啖啖脆口，芝士微微溶化，蘸上醬汁，都真係幾惹味。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 小店位於富康花園內街，近屋邨，喺街市後面，如果有大街過去，可能要穿過小路。

❷ 付款方式只限現金或Payme。

❸ 店內有Wi-Fi、酒精飲品供應，包含手工啤酒。

❹ 巴士路線91M,93M ,98A,98C,98D, 290X,296A,296C,296D,296M, 297,298E,792M,796C,796X,798 或小巴路線 11M,15,15A,16,101M, 102,102B,103M,108A,109M 都可以到達將軍澳香港單車館公園。

❺ 有二人套餐Combo for 2，包含2 Burger Set $350，又或者Burger + Pasta Set $350。

❻ 套餐加$8都有少量Nachos，加Egg$10、加Portobello$20、加Bacon$10。

❼ 食物即叫即製，可能要等待比較長時間，大概係15至20分鐘。

EATWO

Miss A

【區區有小店】菜式篇！港九新界尚存素食店 10間本土推介素食餐廳｜素食推薦2023

E.A.Tips :

Vortex American Snack Bar

香港單車館公園