荔枝角添福分店只賣漢堡包 餡料足秤厚過連鎖店

荔枝角添福分店只賣漢堡包 餡料足秤厚過連鎖店

太子與深水埗之間嘅添福小食係一間著名小食店,上年中該食店就於荔枝角開設分店,食物款式唔再多元,反而只以漢堡為主打,目前漢堡包低至$27,都算係拍拖兩個人抵食之選。如果想食快餐漢堡包,唔需要只去揀連鎖店,其實重有好多選擇。

上年中旬,添福小食插旗荔枝角,開設一間平民漢堡包店,唔係賣最出名嘅炸雞髀,但仍吸引該區街坊同打工仔,餐牌上價錢等同麥記連鎖店,而價錢最平嘅係經典芝牛堡,單買一件$27,相對連鎖店嘅漢堡包,至少足料。唔想食漢堡包,亦可以揀墨西哥雞卷,合共有7至8款可擇,不過有一半只係材料上有少少分別,比如係多咗黑椒或芝士。

招牌之選有添福漢堡套餐$46,漢堡扒以手打製作,相對於連鎖店肉質軟嫩,而且厚身唔鬆散,入口肉汁豐腴,漢堡包內夾住半溶芝士,上下則有爽脆生菜同新鮮蕃茄,層次豐富之餘,亦減低膩感。

至於黃金炸魚柳堡套餐$40,亦即係魚柳Bell餐,魚柳包份量十足,唔會只有薄薄一片魚柳,魚肉嫩滑,炸得外脆內軟,除咗生菜、蕃茄等,內裏更擠滿沙律醬,應該係千島醬先啱,與魚柳相當配合。

麵包軟熟,微微烘烤過,芝麻更香,不過大概唔係店內自家製作,但就似傳統港式快餐店嘅漢堡包。不過薯條就唔係港式快餐店嗰種,反而真係西式快餐店嘅著條,只係比麥記粗身少少,有啲鹹,但就乾身而唔油膩。薯條可以配2款醬汁,包括黑松露醬、蜜糖芥末醬,前者唔算好重味,較滑溜,而後者味道亦簡單,比較稠身。

一杯草莓菠蘿鮮奶$22,看似平凡,味道唔突出,但杯上寫有「堅持初心」,就只係簡單一句,無特別反諷或反對意思,不過就令人有回憶同進入反思狀態。

E.A.Tips :

❶ 炸燒賣加$5。

❷ 汽水可轉特色飲品,正價減$5。

❸ 有Dim Order跨區外送。

❹ 添福小食地址為深水埗長沙灣道80-82號文海樓地下A1舖,添福漢堡地址則為荔枝角長沙灣道648號中國船舶大廈地舖。

❺ 出餐比較慢,可能需要20分鐘時間。

EATWO
Miss A

添福漢堡

荔枝角長沙灣道648號中國船舶大廈地舖
11:30 – 20:30
9221 1725