【野餐隨行】西灣河人氣掃街場太安樓中港日台大集匯 6蚊串魚蛋醬汁係靈魂對面海旁公園任坐任食

台灣夜市係令香港人稱羨嘅美食街，可以隨時行到邊食到邊，而香港能夠容許拍拖兩個人掃街嘅地方已經買少見少，最為人熟悉嘅係葵芳葵涌廣場、西灣河太安樓商場，以後者為例，場內有多間小店可擇，每一間都可以邊行邊食，編輯發現愈出名嘅地方反而未寫過，都係寫返一次啦！

西灣河太安樓係香港地一個地痞風格街坊夜市，由港式地道小食至各地飯麵都應有盡有，例如咖哩魚蛋、車仔麵、腸粉、牛雜、雞蛋仔、糖水，港式味道就係能夠隨街篤魚蛋。雖然食店有幾十間，但其實啱食嘅小店並唔算多，記得要小心選擇啦！

太安樓係香港第一批私人屋苑，臨海地段可享維港海景，屹今有54年歷史，不過填海之後，屋苑離海旁變成要步行至少5至10分鐘。而太安樓地下商場就只係一個屋苑之下、匯聚美食嘅地方，有約30年歷史，分三條街，可從八個入口可供進入，中間係互通，地下商場設計就如同屋苑嘅「H」字設計一樣，被筲箕灣道、東區走廊、太康街、太安街、康祥街等街道包圍。

另外，商場內有唔少充滿歲月痕跡嘅老店，包含漫畫店、出租店、五金店、書店、修理店等，唔少食店更會營業至凌晨，故居住港島嘅應該唔陌生，因為係一個夜晚可以買宵夜嘅地方。

（1）魚蛋佬

其中一個入口可見一間不斷大排長龍嘅小食店，招牌寫有「魚蛋佬」，顧名思議係賣魚蛋，令有牛丸、麵筋齋、魷魚等，你以為重點真係只賣$6串、竹籤串起5粒嘅魚蛋？咁就大錯特錯啦！因為美其名係魚蛋，但其實魚蛋質素好麻麻，口感參差，而且並非陳皮魚蛋。

事實上，魚蛋係配角，醬汁先係靈魂，濃稠醬汁香口惹味，無論你放乜落醬汁內，都一樣可以令人垂涎欲滴。醬汁係咖哩混沙嗲，有少許花生醬味，香味十足，只有輕微辛辣度，容易入口而唔會太嗆，略帶甜味，醬汁稠身令魚蛋容易掛汁。

（2）曜嚐

想飽肚嘅話可以前往一間台式料理店「曜嚐」，既有吐司、台式飯、小食，亦有酥餅、拌麵，當中台式吐司係比較受歡迎嘅產物，款式有廿幾款任揀，例如滑蛋吐司，而Crossover鰻魚亦係受歡迎之作。

最飽肚嘅一定係肉燥飯、招牌拌麵，其中秘製豬腩肉拌麵$44，拌麵會另配醬油，每份更有一罐鳥龍茶附送。拌麵相當足料豐富，內有大量木耳絲、青瓜絲、香蔥、洋蔥等，連豬腩肉份量亦多，腩肉醃製後夠入味，唔會太肥膩，有部份入口即溶。而麵底一般，但至少唔會太軟身，拌麵倒入醬汁後，鹹甜適中。

（3）桜

另一間係價錢平嘅連鎖店，全港擁有4間分店嘅「桜」，以日文字命名，一望而知係賣日本嘢，除咗日式丼飯供應，最大特色係賣超平價手卷，餐牌上有幾十款，現時最平$12手卷，款式包含炸魚皮、炸蝦、蟹柳或甜蛋。

簡單揀兩款，海膽拼甜蝦手卷$38、吞拿魚蓉手卷$20 份量相近，海膽溶化得好快，甜蝦只有兩條，吞拿魚蓉亦算綿密。只不過，手卷原來較坊間細小，故整體料係較少，只係紫菜亦算夠脆，不過就似足一口手卷。

（4）來來小吃店

飽餐之後，最啱搵間糖水舖食個甜品「來來小吃店」食嘅唔食小食，而係台式甜品，位置毗連台式吐司店「曜嚐」，不時大排長龍，但原來並非真實人龍店，只係小店管理問題，每次係批量取貨，故即使買一杯飲品，等候時間同買其他嘢一樣，隨時要20分鐘或以上。

店內以芋圓、刨冰聞名，既然出名到咁，不如試吓其他。黑糖三色豆花$30，包含布丁、仙草、豆花，黑調仙草配搭白色豆花，再加上黃澄澄嘅布丁，三者合一，入口同樣順滑，口感一致，就算無芋圓刨冰，都可以消暑、解膩。豆花為台灣品種，有豆味，少少偏硬身，加上黑糖水，成為獨特黑糖豆腐花，冰凍又充滿香甜味。

一杯蜜桃烏龍$21 縱然要等20分鐘，但唔代表水準好高，因為茶味一般，蜜桃味亦較輕，但冰度好高。

（5）其他食店

其他良心小店包括有潮米石磨腸粉、文興記、逾30年嘅老店林記車仔麵，連鎖店則有茶星人、齊柏林熱狗店、木衛二鑄茶所、水門泰式海南雞飯專門店。

離太安樓不遠嘅愛秩序灣公園，靠近海旁，地方偌大，由筲箕灣至西灣河都可以進入，內裏基本以舊式漁村為主題，以木材等建設，就算有一隻實物般嘅漁船、舢舨，但其實都無乜漁村感覺，附近全為高樓大廈，只有一面向海旁，但公園內安心野餐點亦非正對海旁。

你以為「愛秩序灣」一次係來自某個中文？其實，「愛秩序灣」係源自於英文名，「愛秩序」係「Aldrich」，「愛秩序灣」係紀念一位皇家工程師「Major Edward Aldrich」，佢曾經改善香況治安問題。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 太安樓大多數都係外賣店，只有少量店舖係有堂食。

❷ 多數小店都收得夜，部份會營業至凌晨，但都要注意營業時間。

❸ 愛秩序灣公園離太安樓不遠，5分鐘步程左右可以步行至公園。

❹ 愛秩序灣公園地方偌大，可以任揀座位，行多兩步可以到避風塘。

❺ 夜晚其實景觀不太清楚，所以坐公園內或海旁都差唔多，海旁要行遠啲。

❻ 桜 Sakura係一間連鎖店，全港有4間分店，地址為荃灣荃興徑8號昌泰大樓地下4B號舖、西灣河筲箕灣道57-87號太安樓地下A48B號舖、元朗又新街35號地下7B號舖、觀塘觀塘道436-446號官塘工業中心4期1樓B室。

❼ 巴士路線如102號可以到達西灣河，電車亦可以到達筲箕灣道。