位處鳳凰村嘅呢間抗疫小店，舖面面積較細，限聚令下座位數目更緊張，小店不單支持學生，亦為醫護提供優惠，加上疫症期間，小編兩個人決定以外賣自取方式幫襯。
喇沙海鮮麵 $48 可以配搭拉麵、烏冬或米粉，材料有蝦肉、魚蛋、豆卜、蟹柳、椰菜，魚蛋彈牙，蝦肉爽口，豆卜勁掛湯，通通只係平民食材，不過湯底有驚喜，原本以為湯底會同平時啲喇沙湯底咁會濃到鹹，但原來湯底有喇沙味之餘竟然唔鹹，仲有啖啖椰香，拉麵會比烏冬掛湯。
日式卷腩麵 $46 同樣可以配搭拉麵、烏冬或米粉，建議配搭拉麵，會更有日式風味。拉麵質感合格，外賣湯同麵底分開放，返到去都唔會淋晒。卷腩採用五花腩，一層肉、一層脂肪，層層相扣超療癒，腩肉入口油脂香十足，腩肉有些微甘香，但略帶鹹味，肉質軟腍，似煎香過先放上湯麵。湯底濃厚，比喇沙湯底較重味，建議先食喇沙湯底再食卷腩湯底。
日式麻醬手撕雞 $38 上面係手撕雞，下面係青瓜絲，份量唔少，手撕雞雞肉嫩滑，有雞髀肉、有雞胸肉，淋上胡麻醬汁後，雞肉帶有酸甜味，好開胃，麻醬好充足，有啖啖芝麻香，最啱當前菜食。而青瓜絲配搭胡麻醬汁亦非常適合，青瓜絲亦切得好幼細，簡單冷盤暗藏心思。
紅油抄手 $40 可以選擇配搭韭菜豬肉或素菜，雖然有紅油香，但今次紅油抄手唔辣，適合唔嗜辣又想食抄手嘅朋友。抄手餡料比手指公大，粒粒拱起似三角形，形狀幾一致。
刀鋒雞翼 $22/4隻 同樣係冷盤嘅招牌雞翼，加入蒜蓉同辣椒，辣椒微微辣味加上啖啖濃郁蒜香味，醃得超入味！
另外，叫仲有兩杯仲送台式飲品，挑選咗玫瑰花蜜果茶同龍眼蜂蜜，前者花香味重，好清香；後者蜂蜜味較重，好香甜。
| e.a.tips （1）只要憑店內派發嘅優惠，憑指定QR Code去其他相關嘅小店消費，即可享有優惠，各位拍拖搵食記得要留意啦。 （2）學生穿著校服同醫護人員有特別優惠，醫護出示證件即可減10蚊。 |
延伸閱讀﹕真正平民食堂 加藤屋20蚊牛肉飯超抵食
刀鋒寶貝
| 地址﹕ | 黃大仙銀鳳街1-11號鳳凰邨大廈地下4號舖 |
| 營業時間﹕ | 星期一至五 12:00 – 21:00；星期六全日休息；星期日 12:00 – 21:00 |
| 電話﹕ | 6844 8474 |
在〈黃大仙低調街坊小店 冷盤小食激平有驚喜〉中有 2 則留言
留言功能已關閉。