eatwo 兩個人醫吓肚

【#偌大草地】提到地質公園，大多數人諗起嘅都係橋咀島等熱門景點，編輯反而想提及荔枝莊內鮮為人知嘅香港世界地質公園，各種風化岩石極具觀賞價值，而荔枝莊既連接白沙澳，亦可直通往深涌，擁有綠草如茵大草地嘅深涌曾一度係露營發燒友愛到嘅戶外露營地，拍拖兩個人於大草地內散步行逛，空氣清新，令人放鬆又自在。

【#紅白格重現】景觀橫跨九龍仔、樂富、九龍塘嘅格仔山，一直以來昔日色彩盡褪，但今年中格仔山被重新髹上紅白相間格仔，終於回復舊有面貌，而早年格仔山鐵絲網破損，山頂位不時有人於懸崖邊緣打卡，現時則已加設欄杆，減低危險度，兩個人前往格仔山拍拖閒遊亦可保障安全。

【#港人口味】新蒲崗雖然係一個小區，但其實潛力幾高，從編輯個人記錄嘅地圖可見，餐廳小店比比皆是，每間都係街坊價錢，但又有水準，參差嘅小店唔多，即使係水準唔高嘅餐廳亦可以接受，當中新蒲崗廣場就有一間二合為一嘅店舖，一次過滿足同時想食日本菜、泰國菜嘅朋友。

【#9寸越南包】要留住客人，唔少食店都會各出奇謀，出奇不意地推出有新意嘅菜式，但大角嘴一間小店雖然開業已3年，但仍然獨沽一味只做越南包，呢份堅持可算難得，值得拍拖去試一試。

【#半月堤圍】以西貢曝罟灣為行山路線，路段並唔複雜，最特別嘅地方係當中小海灣內有一道半月形小堤壩，中間可見小閘門，包圍曝罟灣，不過當中半月堤圍經已荒廢，目前係釣魚容、行山客嘅一個小地方，只係人流唔多，未演變成遊客勝地。大多數人都會選擇經起子灣前往，編輯就挑選一道比較容易步行嘅路線，無需要綑邊而走，亦無需要辛苦爆林，但時間相若，適合拍拖兩個人一齊找尋呢一道神秘嘅半月堤圍。

【#船河路線】提到遊船河，大多數人都會諗到西貢出發嘅船P（船上派對），如果想兩個人更切身感受海上風光，不妨挑選另類路線，無需要落水都可以於船上觀賞兩岸風景，今次推介連接屯門至大澳嘅航線，拍拖每人$25至$30即可以於1小時內享受海上景觀，左右兩岸皆風光如畫，風景方面比西貢出發更壯麗，而當中日落限定嘅航線更加係拍拖兩個人非搭不可！ 注意上船要好好保管個人物品，千祈唔好跌落地下，因為上層地下係無遮掩，隨時會跌落海，跌嘢唔好搵唔好執啦。

【#外賣便當】香港地租金高昂，飲食業百上加斤，加上堂食又諸多限制，外賣店愈來愈多，近年大多數都係只提供外賣嘅小店，油麻地彌敦道就有一間外賣店一直受到街坊歡迎，菜式以台日菜為主，價錢相宜，唔少街坊都會幫襯吓，亦可算係拍拖兩個人掃街嘅好地方。

【#偏僻沙灘】港島南區水質優良嘅沙灘比比皆是，但要挑選人流較少嘅沙灘就比較困難，大多數人都會選擇赤柱沙灘或淺水灣泳灘，其實行完些少會發現附近有兩個人流相對較稀少嘅沙灘，其中一個係聚集同志拍拖Sweet Sweet嘅沙灘，另一個則被評為一級水質嘅泳灘，值得兩個人去曬吓太陽兼玩吓水。