躲藏大角嘴舊商場內微舖獨沽一味只賣越南包

要留住客人，唔少食店都會各出奇謀，出奇不意地推出有新意嘅菜式，但大角嘴一間小店雖然開業已3年，但仍然獨沽一味只做越南包，呢份堅持可算難得，值得拍拖去試一試。

位處櫸樹街嘅富多來商場，係大角嘴區內一個舊式商場，人流極少，只有附近街坊行逛，當中有一間離新九龍廣場只有1分鐘步程嘅蔥仔越南包，店主老實地只賣越南包，如果勉強要講越南包以外嘅菜式，就係越南包套餐內嘅餐湯、沙律。

室內只有三兩個座位，店內一眼睇晒，裝潢簡潔。而餐牌亦夠簡單，只以經典越南法包為唯一售賣產品，半個有4.5吋，每個$30；一個有9吋，每個$50。每件越南包都可以單買或配有套餐，包含一碗餐湯或兩款蔬菜，又或者一碗餐湯及兩款蔬菜，半個包套餐價錢介乎$38至$45，而一個包價錢則介乎$58至$65，尚算貼地。

9吋越南包分成兩半，並非一條過，適合細嚼，亦啱晒兩個人撐枱腳，每份越南包配料豐富，內含有扎肉、烤肉、甘荀、蘿蔔、肝醬、蛋黃醬、青蔥、芫荽、辣椒、豬肉鬆。薄切札肉幾彈牙，似乎不只原味，蘿蔔絲經醃製，帶酸甜味，清爽而開胃，而法包內塗滿肝醬、蛋黃醬，略帶鹹香，調味簡單。配合脆脆法包，相當有法國殖民地色彩，越南法包內有菜有肉，餡料飽滿，足夠頂肚。

餐湯有南瓜湯或蘑菇湯可擇，沙律則有冬菇、西蘭花、秋葵任揀2款，南瓜湯軟綿，有南瓜蓉之餘亦有粟米粒點綴，香甜味似熬煮過嘅南瓜湯。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 位置於富多來商場地下，對面為新九龍廣場。 ❷ 如果想唔要某款配料，記得點餐時講低。

❸ 每件越南包都係即叫即做，可以預先於Whatsapp落單，減少等候時間。

❹ 留意小店雖無加一，但只收現金。

❶ 每叫一個包，記得於門口攞一個號碼牌，最後埋單時於店內歸還，而錢銀亦於店內自行找續。

❷ 堂食嘅話，記得自行清理枱面，將餐碟、垃圾歸還於盤內。