eatwo 兩個人醫吓肚

【#大碗泰北菜】夏日炎炎，氣溫高嘅情況下就最啱食東南亞菜，而辣椒有助排毒祛濕，泰國人通常愛好以辣椒炮製菜式，當中泰國菜就係於香港最常品嚐到嘅東南亞菜式，平常主打泰國菜嘅餐廳有唔少，但講到泰北菜就似乎唔太多。深水埗基隆街就有一間主打泰北菜嘅小店，價錢平民，而出品又相當正宗，拍拖兩個人走入小店內有如穿越泰國一樣。

【#神秘樹屋】隨行山郊遊人士日益增加，香港秘景愈趨減少，要拍拖兩個人找尋人流稀少嘅秘密境地，變得難上加難，編輯今次就帶大家前往隱藏於城中嘅秘點，環境幽靜，既係歷史遺跡，亦係攝影打卡好地方，遺跡中同時有一座高聳樹屋，充滿東南亞風格，霸氣非常！

【#村落探索】深井以燒鵝聞名，大多數人腦中都將深井同燒鵝自然聯繫，但事實上深井又點只燒鵝呢？今次編輯想帶大家拍拖兩個人去深井半日文化歷史遊，其實深井連繫唔少山徑，但現時夏日天氣炎熱，決定先撇除山路，簡單探索吓深井呢個鮮為人知嘅村落，上山？秋季再講啦！

【#石澳角落】夏日來臨，又係時候兩個人搵個沙灘玩吓，當中石澳就有兩個沙灘，一邊聚集港人，而另一邊則聚集西人，海水清澈，任君選擇。另一邊廂，石澳情人橋曾因颱風「山竹」吹襲而倒塌，但月前已經重開，搶眼嘅粉藍色情人橋又再次演變成拍拖情侶朝聖之地，而情人橋背後其實重有一道小路，可以於高點回望石澳漁村風景。

【#最紅燈塔】盛夏向來係玩水季節，唔少人都遍尋水質良好嘅沙灘，編輯就帶大家去西貢三星灣，向來係水質良好嘅泳灘，海水碧綠得如玻璃水，不過今次唔係搭船入去，而係步行入去，兩個人簡單行完山再落水，感覺會更爽！離開三星灣泳灘後，並唔代表唔再有景點，來往三星灣至白沙灣，細心留意會發現一座神秘燈塔，寫有近月最紅嘅一組數字，而到達白沙灣碼頭亦可觀賞遊艇海上嘅唯美日落景。

【#街坊星馬菜】編輯認為小店最突出嘅地方並唔係菜式，而係店內嘅男侍應，佢絕對做足一個餐廳侍應嘅本份，有禮貌又有親切感，語氣、說話非常有趣，可以令繃著臉嘅香港人回心微笑，感覺好搞笑，呢啲真係香港人精神。呢位男士應該係可以15分鐘唔停口講嘢，而且係全無悶場嘅人，如果有最佳侍應選擇，佢大概有資格打入頭三甲。

【#手打烏冬】位於大角嘴嘅東京手打烏冬專門店，講到明主打係手打烏冬，手打烏冬店的確比拉麵店少，呢間價錢幾親民，每款以街坊價，拍拖兩個人去都會覺得係經濟型嘅選擇。