【中秋好去處2021】大澳水鄉特色花燈節取消開幕儀式走勻全島尋幻彩手繪燈籠同場加映元朗大橋街市五彩燈籠街+灣仔利東街紅噹噹燈籠海

距離中秋只剩下約兩個星期，又係時候搵搵中秋拍拖好去處，除咗找尋賞月好地方，亦可以兩個人去吓充滿中秋節日氣氛嘅地方打吓卡，今次編輯就帶大家實地探訪三個以燈籠為主嘅中秋攝影好地方，絕對係期間限定之作！

（1）大澳水鄉花燈節2021

由2018年起，每年大澳都會舉行水鄉花燈節，今年亦唔例外，由8月起至10月會舉行大澳水鄉花燈節2021，公眾都可以到大澳觀賞以一個又一個藝術燈籠交織而成嘅花燈海，據主辦單位⼤澳非茂⾥稱，大澳現場懸掛有逾1800個燈籠，來自18區學校、社區中心，由街坊、義工合力佈置，期望為港人帶來希望，而大澳水鄉花燈節由⼤澳非茂⾥、香港開⼼D共同主辦。

不過，日前（3號）⼤澳非茂⾥宣佈將會取消原先安排嘅花燈節巡遊、開幕儀式、秋月音樂祭，只有花燈會持續由9月11號懸掛至9月30號，據編輯實地觀望，花燈於下晝5點已經陸續亮起，但想拍攝花燈夜景則可6點半左右到達現場，皆因官方稱每晚6點半會亮起花燈。

想觀賞最多花燈，可以到大澳鄉事委員會廣場，位置聚集最多圓滾滾燈籠，色彩繽紛，鮮艷奪目，當中有多個卡通人物幻彩燈籠，如叮噹、Hello Kitty、Minions、蜑彈虎等，全由手工繪製，設計相當可愛！

每個手工燈籠都僅由竹枝、皺紙編成，似足傳統手作燈籠，想影晒全島特色手繪燈籠，就要行勻幾道大街小巷啦，唔少燈籠都加插大澳水鄉特色，除咗建築物，亦包含大澳特產銀蝦、蝦膏、鹹魚、貓咪，順道於中秋節日感受水鄉情懷。

而人氣組合Mirror嘅鏡粉們亦要注意，去大澳唔單止可以影早前憑《大叔的愛》爆紅嘅紅橋（被稱為田牧橋）、棚屋，中秋更可以於水鄉燈籠海中找尋牧田燈籠、Anson Lo燈籠呢！

（2）元朗﹕大橋街市

位處元朗政府合署嘅大橋街市，表面上只係一個平凡街市，每年中秋都特別有氣氛，皆因當中有一個檔口將燈籠佈置成獨特燈籠街，為元朗市中心內嘅街市點綴一番，每年都有人慕名去打卡。事實上，佈置於五彩燈籠街嘅只係一間元朗紙紮鋪，平常係售賣香燭祭品，據稱店主為元朗原居民，至於消費與否由讀者自行決定。

現場所見，天花佈滿色彩艷麗嘅有趣燈籠，兩旁亦有多個燈籠整齊列隊，各款燈籠亦為人手製作，手紮燈籠大多以可愛為主，包括多款金魚、白兔等造型燈籠，更有卡通紙燈籠，每款價錢約$200樓下。不過，大家要留意街市開放時間由06:00至20:00，夜晚8點後就會完全關閉。

（3）灣仔﹕利東街

另一個觀賞燈籠嘅地方係最接近市區嘅被稱為囍帖街嘅灣仔利東街，整條街道佈置簡單，但仰頭一看，可見頭頂有一個又一個紅噹噹燈籠，充滿節日氣氛。對比大澳係比較弱，但算係交通最方便嘅中秋打卡地。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 前往大澳有幾個方法，一係乘搭大嶼山巴士11號或1號來往東涌或梅窩，車程約1小時；一係乘搭渡輪來往屯門碼頭及東涌新發展碼頭至大澳，船程約1.5小時；一係由昂坪轉乘21號巴前往大澳有幾個方法，一係乘搭大嶼山巴士11號或1號來往東涌或梅窩，車程約1小時；一係乘搭渡輪來往屯門碼頭及東涌新發展碼頭至大澳，船程約1.5小時；一係由昂坪轉乘21號巴士到大澳，車程約25分鐘；一係由東涌乘搭的士直入大澳，車程約30分鐘，車費約$150。

❷ 步入大澳觀賞花燈嘅同時，謹記保持安靜，遵守秩序，勿亂丟垃圾，同時唔好阻礙村民出入。