雞蛋花

大尾督單車路賞花 5月雞蛋花優雅現身



大尾督向來以休閒活動聞名,唔少人都會踩單車入去,既有燒烤場又有天然風景,最啱拍拖休閒遊。大尾督靠近船灣淡水湖、八仙嶺,可遙望吐露港、馬屎洲,天氣晴朗時風景優美,仰望藍天白雲,俯首海天一色,加上附近有碧綠青翠山巒,清靜環境更Chill。不過,今次去大尾督係賞花,估唔到過咗春天賞花季節,仲有燦爛嘅雞蛋花,3至4月抗疫期間錯過咗嘅朋友可以再賞花啦!

提到雞蛋花,唔少人都會諗到夏威夷花串製成嘅花環,用嚟裝飾一流!而且雞蛋花可以提取香精製化妝品、番梘等,以香港人嘅認知,白花黃心嘅雞蛋花係最正規,但事實上白花黃心係變種花,紫紅色先係正宗雞蛋花。

雞蛋花花期一般為3月至9月,今次呢款花朵呈乳白色,花心顯鮮黃色,聞落氣味芳香,清香而優雅。樹葉葉脈清晰,邊緣連接。花朵基本形態聚於樹枝頂,抽出聚傘花序。再翻查資料,雞蛋花嘅果實為黑褐色木質果,將於6月至12月結果。一般栽種喺深厚肥沃又通透嘅泥土中,茂盛嘅雞蛋花需要充足陽光照射。

雞蛋花可以同菊花、槐花、木棉花、金銀花一拼為五花茶成份,不過只用黃花,雞蛋花不含毒性,但白色樹液就有毒,會導致嘔吐、噁心、發燒、腹瀉、心跳加速、嘴唇紅腫。雞蛋花有基本藥用價值,其性味甘、微寒,可以防中暑、腸炎、細菌性痢疾、消化不良、小兒疳積、傳染性肝炎、支氣管炎等,而樹液外敷亦可治疥瘡、紅腫等。

由於雞蛋花花香似梔子,故為緬梔屬,英文名為Common Frangipani,學名為Plumeria rubra L.,係夾竹桃科雞蛋花屬,亦係落葉喬木,落葉後樹形更突出,一枝又一枝枝條伸出,似足鹿角,所以同時被稱為鹿角樹。雞蛋花基本生長喺全世界亞熱帶同熱帶地方,香港其他雞蛋花觀賞之處有深水埗公園、荔枝角公園同香港公園。

而想睇正宗雞蛋花,可以去元朗公園,栽種咗紫紅色嘅正宗雞蛋花,比黃心白花更罕有。

e.a.tips
(1)雞蛋花主要係觀賞用途,亦可以影超靚文青相,但切記唔好隨意採摘,同時唔好接觸樹枝位,因為一拉隨時會斷或掉落。
(2)大尾督雞蛋花生長位置靠近單車路末段,小心避免被經過嘅單車撞到。
(3)即使雞蛋花有藥用價值,都唔應該隨便試用,必須先請教醫生。

交通﹕
(1)近港鐵大埔墟站交通交匯處乘搭75K巴士,可以喺大美督巴士總站落車,車程約20至30分鐘,步行返單車路即達。
(2)同樣喺旁邊小巴站乘搭20C小巴,喺大尾督落車,步行返單車路就會見到。

雞蛋花出現位置﹕雲華單車舖同忠誠茶座之間,靠近單車路,兩個人踩單車到末端即可觀賞。

延伸閱讀﹕大埔白色貨櫃露天茶座 周末限定文青打卡熱點

延伸閱讀﹕大埔激罕無人沙灘 發掘大自然生態靚景

大美督

地址﹕香港新界大埔汀角路大美督
開放時間﹕24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈大尾督單車路賞花 5月雞蛋花優雅現身〉中有 2 則留言

留言功能已關閉。