【區區有小店】全港11間本土粥品大搜查大埔最老粥店屹立73年荃灣最平艇仔粥僅賣$16

當拍拖兩個人想食清淡啲，又或者病倒唔舒服，想搵粥舖都感到困難？今次編輯就為大家整合推介全港嘅良心粥品，港九新界合共約有11間適合香港人選擇，當中有屹立多年嘅老舖，亦有反通脹嘅時光倒流價粥品，都算係平靚正之選。

九龍區

大角嘴﹕餃子店

位於大角嘴嘅「餃子店」雖然以餃子為主打，兩款餃子$10有4隻，但除咗餃子之外，亦有小炒、粥粉麵飯可擇，魚腩粥$30、艇仔粥$27，粥底清淡，似住家味道，只係單靠材料帶出少少鹹味。

延伸閱讀﹕【區區有小店】菜式篇！港九新界尚存餃子店 6間本土推介餃子餐廳｜餃子推薦2023

佐敦﹕糖水雄

有指渡船角八文樓即將會拆卸重建，而渡船角位處油麻地至佐敦之間，小區內有少量良心店，最為人熟悉嘅係以法式布甸聞名嘅嘉多莉餅店，另一間受歡迎嘅就係港式糖水店「糖水雄」，經常為Mirror、Error、Collar應援店之地。糖水雄糖水選擇眾多，包含白果腐竹薏米$27、芒果紫米露$32、紫薯圓紫米露$34等，亦有小食可擇，例如亂咁嚟燒賣$27、蒜香麻辣雞翼尖$28、糖水雄狗仔粉$27、家鄉炒米粉$25等，當中更有鴨腎菜乾豬骨粥$32，粥底有濃厚豬骨味，加上鴨腎、菜乾點綴，令粥底略帶甘香，鹹甜適中。

新蒲崗﹕滿粥順德粥底海鮮火鍋

而新蒲崗嘅粥店只有「滿粥順德粥底海鮮火鍋」，粥品只係講緊粥底火鍋嘅粥，而唔係上述嘅粥店。

旺角﹕富記粥品

以燒鵝、廣東粥、生滾湯聞名嘅老字號小店「富記粥品」，由街邊攤檔擺賣，到於上海街、花園街開設舖頭，至今屹立逾50年，頂頭霓虹招牌亦有懷舊感，由朝早7點半營業至夜晚11點半，一直有唔少街坊支持。除咗芥菜咸蛋肉片湯受街坊歡迎，燒鵝、生滾粥都係馳名菜式，簡單啲可以一次過品嚐火鵝魚片粥$56，粥底綿稠，料足而豐富，燒鵝固然香口，油香十足，雖然放落粥係明顯比較削，但都唔乾柴，燒鵝肉香與鹹味滲透粥底，令魚片粥帶有甘香鹹味。而乾炒牛河$58 其實都係推介之作，牛河有油香而炒至乾身，啖啖有層次，鑊氣十足，配搭老派人嘅芥醬$2更滋味，芥醬嗆鼻而不辣，辣醬帶辣而不嗆鼻，將兩者混合就同時有適當辣味同嗆鼻感，牛肉片蘸上芥醬係比較適宜。

旺角／深水埗﹕標記樂園潮州粉麵菜館

於旺角、深水埗各有分店嘅「標記樂園潮州粉麵菜館」，以潮州菜為主打，蠔餅、滷水鵝片等都係受歡迎菜式，而蠔仔粥亦係主要菜式之一，粥內蠔仔份量豐富，不過潮州粥同廣東粥分別在於比較鹹。

新界區

荃灣﹕德發粥品專家/德發龍粥麵店

「荃灣德發粥店」係咁多間粥店當中最平嘅一間，而且係24小時營業，如果你係荃灣街坊就一定認識。小店靠近荃灣德華街街市、賽馬會德華公園，以生滾粥聞名，同時有炒麵、腸粉，甚至傳統粥店牌有嘅油器、糕點。室內裝潢陳舊，貌似幾迫狹，進入嘅街坊人流絡繹不絕，每份明火油器$8/8粒，而炸兩$10 亦甚受街坊歡迎，芝麻可按喜好隨意添加。油器麵糰頓變油炸鬼，件件呈金黃色，炸得鬆脆，入口煙韌，而鬆糕一件則賣$8，狀似天然發酵，啖啖鬆軟，剛好相反。

以為只有傳統粥品，原來餐牌都有新式嘅粥品，比如竹笙加北海道帶子$37加$10，而傳統嘅雙拼粥如皮蛋魚片粥$18固然有，最平嘅粥品係艇仔粥，一碗低至$16，相當抵食，粥底軟綿，略有豆香、米香、蔥香，鹹淡適中，加上粥料土魷、豬皮、花生、魚蛋、碎牛肉，更有舊式風味，都算係碩果僅存嘅老牌廣東粥店之一。

大埔﹕廣記粥店

講到香港最老牌嘅粥店一定係大埔嘅「廣記粥店」，由1949年至今足足有73年歷史，粥品幾十年嚟亦一直受到街坊歡迎。小店門面古老，店內裝潢亦相當陳舊，懷舊味濃，但又有足夠空間，唔會太迫狹。店內粥底可以揀生滾或灼熟，粥底軟綿而無味精，清淡得嚟又靠配料帶出微微鹹味，因為粥底可以再自己挑選單拼或雙拼粥料，材料豐富。當中，菜乾排骨粥$19 味道層次豐富，菜乾令色澤搶眼，菜乾味滲透粥內，而排骨帶上肉香，米粒又唔會好鹹。

一般粥底都唔係有味粥底，而係真白粥作粥底，比如生滾粥雙拼$30，配搭滑牛、豬潤等，同樣綿滑，只係靠粥料滲出味道。滑牛肉唔老，肉質軟腍，豬潤無雜質，亦唔嚡口，粥料份量都唔少。除咗粥品之外，亦有腸粉、炒麵，當中油條、炸兩、鬆糕都係傳統粥店先做到咁出色。油條$11 厚身又鬆脆，唔會好重油味，油炸鬼入口外脆內軟，新鮮炸出嚟係特別出色。腸粉有牛肉腸$19，有兩大條，腸粉表皮滑溜，粉漿有少少厚。而傳統粥店都有出色嘅鬆糕$11、豆漿$11，前者啖啖鬆軟，後者充滿豆香。

上水﹕華記蠔仔泡粥泡飯專門店

至於上水就有一間以潮州菜式為主嘅隱藏式小店「華記蠔仔泡粥泡飯專門店」，泡飯、潮州粥都係不俗選擇，比如招牌潮州泡粥，當中有蕃茄鯪魚球魚片泡飯$42，而蠔仔肉碎粥$47 亦甚出色，蠔仔份量充足，粥底味道相對港式粥品重味，鹹度尚算適中。另外亦有潮州小食可擇，蚵仔煎$32 即係蠔餅，蠔仔夾雜蛋香，啖啖香口惹味。

元朗﹕泰豪燒

元朗都有粥品選擇，當中「泰豪燒」以串燒為主打，亦有海鮮粥，不過就需要買二人套餐或四人套餐嘅海鮮粥，而價錢就相對比較昂貴。

港島區

北角﹕太平飯店

北角有一間以潮州菜為主嘅飯店「太平飯店」，內有兩款粥可擇，包括有鮮甜蠔仔肉碎粥$52，亦係一款潮州粥，味道比港式粥品略鹹，蠔仔都算飽滿，份量不過不失。

延伸閱讀﹕【野餐隨行】北角潮州飯店高水準鹵水鵝片尋海旁小型狗公園野餐

灣仔﹕雄記美食

而灣仔嘅「雄記美食」喺近市中心位置，店內有平粥食，都算係區內少見嘅粥店，以糯米飯、豬骨粥等為主，重有碟頭飯、牛腩麵等可擇，其中可以試試花生元貝皮蛋豬骨粥，係區內CP值高嘅小食店。